SANSON ñi antü mew, Israel mu mongelekefuy kiñe pelon wentru Samuel pingekefuy. Pu israelche ayüyngün ñi nieal kiñe longko ülmen wentru kangelu pu che reke. Jewba ayülay ñi feypin engün, welu eluñmay (eluwi) ka feypifi ta Samuel ñi üytuafiel ta Saul ñi longko ülmen-ngeal. Tüfachi wentru ñom piwkengekefuy, welu rupalu chi antü mallmawi ka feyentuwelafi ta Ngünechen. Feymew Jewba famentueyew, ka feypikünuy ta Samuel ñi üytual kiñe we longko, kiñe weche wentru David pingekefuy. Welu fentren tripantu rupay ñi longkongerpual.

Kiñe antü, David amuy ñi pemeafiel tañi pu peñi, koneltulekelu Saul ñi pu weychafe engün. Fey ñi akun pey tati pu weychafe müllmüllküleyngün ñi llükan mew. ¿Chumngelu (chemu) llükaleyngün? Kiñe fütra filisteo weychafe Goliat pingelu üyawtumekefi pu israelche ñi weychafe ka Ngünechen. David doy wechengelu rume, allkülu ñi üyawtumeken ti filisteo, feymew rume (mütre) illkunagi fey layefule rume, amuy ñi chaftuafiel. David yeniey kiñe witruwe müten, ka kiñeke kura ñi kewafiel ti fütra wentru doy niefi epe epu rume ta kakelu che mu. Tüfa ti Goliat ayeniefi ta David, welu kidu feypieyew ñi doy pepikawkülen kewakelu am Jewba ñi üy mew. Duamniey kiñe kura müten ñi langümafiel. Feymew müntuñmafi ñi wayki ka katrünentuñmafi ti filisteo ñi longko. Fey kakelu pu filisteo weychafe pefilu ñi femün tüfa, rume llükayngün fey lefmawtuyngün.

Ti longko ülmen Saul müna afmatufi David ñi llükanon, feymew elkünufi ñi kewal pu weychafe engün. Feymew wewlu tüfachi weche wentru, Saul rume ütrirfi ñi femün. Feymew David lefmawi ñi montual ñi mongen. Ka fentren tripantu ellkayawi, welu rumel (molkechi) yamniefi ta Saul. ¿Chumngelu (chemu)? Kimnielu am Jewba elkünuy ñi longkoleal. Mülen antü mu Saul petu kewalu lay. Feymu Jewba ñi feypikünuel mew, David longkongerpuy.

David rume ayüy (mütre küpa) ñi dewmayal kiñe ngillatuwe ruka. Welu Ngünechen feypieyew kiñe tañi pu yomelche (küpalelu) ñi dewmayal feychi duam. Fey tañi fotüm Salomon dewmay. Welu Jewba kümelkafi David femlu kiñe afmatufalchi eldungu kidu mu: Tañi pu reñma mu, tripayay pu inan-ngechi longko ülmen trürümfalnolu. Feymew tripayay ti feypikünuelchi Montulchefe, feyta chi Yomelche feypikünulu Ngünechen Eden mülewe mew. Feyta Mesia ürke, ti Dullingelu (Ngümintungelu), Jewba ñi ayüel ñi Longko Ülmen-ngerpual tañi Ngünenien mu, feyta rumel (molkechi) müleafuy.

David rume mañumtulu, feymew trapümi milla, ka pañilwe ka fentren chemküfkechi ñi dewmangeal chi ngillatuwe ruka. Ka, Ngünechen ñi lif küme püllü mew wirintukuy fentren ülkantun salmo pingelu ñi püramyeafiel ta Jewba. Epe aflu ñi mongen David feypifi tüfachi dungu ñi püramyeafiel ta Ngünechen: “Jewba ñi lif püllü dunguy iñche mew, ka kidu ñi dungu mülekefuy iñche tañi kewün mew” (2 Samuel 23:2).

(Tuwlu 1 Samuel, 2 Samuel, 1 Crónicas, Isaías 9:7, Matew 21:9, Luka 1:32 ka Juan 7:42.)