PES 9
Lôk Israél ba mbat kiñe
Saulô, kiñe bisu i Israél, a ndogbene Yéhôva. David a yoñ yééne Saulô. Djob a boñ malômbla ni David inyu ane i i ga nom boga ni boga
MBUS dilo di Simsôn, Samuel a yila mpôdôl ni nkéés i loñ Israél. Lôk Israél ba bôdôl kal nye le yak bo ba ngwés bana kiñe kiki biloñ bipe. To hala kii ba noode Yéhôva ni i sômbôl yap, a gwélél Samuel i yônôs ngôñ yap. Djob a pohol mut suhul nyu le Saulô le a ba kiñe. Ndi mbus ngéda, kiñe Saulô a yila ngôk ni ndog. Yéhôva a héa nye kiñe, a kal Samuel le a téé njohok mut le David. Ndi ngandak ñwii i nlama tagbe ilole David a mbôdôl ane.
Ki a ngi yii mange wanda, David a ke i yuuga bilôk binyañ bi bé bisônda bi Saulô. A koba le ntôñ wap gwét u nsehla ni woñi ngéda ba ntehe le mbala wap, mpémba mut le Gôliat, a pam. A bé a bet inyu yahal Lôk Israél ni Djob jap. Ni David a ñunup, a kal le a njôs nye. A yoñ ndik ngoksébi yé ni ndég ngok, a ke kolba nye. Gôliat a bééna ntel u bebe ni méta maa. Gôliat a bôdôl bañ yahal nye, ni David a timbhe nye, a kal le a gwéé bijôl bi gwét bi nloo bi Gôliat inyule nye David a nkolba nye i jôl li Yéhôva Djob. Ni mpom ngok wada won David a nôlôl Gôliat. A sodol pansoñ i mpémba mut u, a kit nye ño. Ha nyen miñem mi bisônda bi Filistia mi bi so bo, ni bo ba ôt ngwéé.
Maként ma David ha ngéda i, ma hélés Saulô ngandak, ni nye a jubus mange wanda nunu i ntôñ wé gwét. Ndi kii David a yémbél ngandak mintôñ mi gwét, Saulô a kahal ke nye njôñ. David a bé nyégsaga i ke ngwéé inyu sôñ niñ yé. A niñ ngandak ñwii kiki mut a ndeng, a bedek a sôhôk. Ndi tohala a téñbe nit Saulô nu a bi noode nol nye, a bigdaga le Yéhôva Djob nyen a téé nye kiñe. Ndi i bi sôk bañ, Saulô a wo i gwét. Ni David a yila kiñe kiki Yéhôva a bôn.
“M’a lédés ki yééne ane i pot yé mbok letee ni mba ni mba.”—2 Samuel 7:13
Kiñe David a lôôha gwés le a oñôl Yéhôva témpel. Ndi Yéhôva a kal nye le man wé wada nyen a’ oñ yo. I sôk nene le Salômô, man David nyen a’ oñ témpel. Yéhôva a sayap David, a boñ malômbla ma mahak ni nye, a kal nye le lihaa jo ki jo l’a gwal bé bikiñe kiki lihaa jé. A kal ki nye le Mbôô i Djob a bôn i wom Éden a’ lôl mu lihaa jé. Ntohol nu nyen a bé lama ba Mésia, tole “Nhook,” nu Djob a ga téé. Yéhôva a bi bôn le Mésia a’ ba Kiñe i Ane i ga nom i boga ni boga.
Inyu ti Yéhôva mayéga, David a kot ngandak gwom bi maoñ: bikei, mamuna, gôl ni silba inyu témpel. Mbuu Djob u tinde ki nye le a tila ngandak tjémbi. Kii David a bé bebe ni nyemb, ni nye a pahal le: ‘Mbuu Yéhôva u bi pot ni nyo wem, banga yé i yé hilémp hiem.’—2 Samuel 23:2.
—Biniigana bini bi nyôñna i bikaat bi 1 Samuel; 2 Samuel; 1 Miñañ; Yésaya 9:7; Matéô 21:9; Lukas 1:32; Yôhanes 7:42.
