UNÔICHRIT minë sakāmö Sëmsön, vīlöng ang Samu-ĕl nö prôfĕt nö ikui Israel. Havëkö rācha re yik aṅ Israel pön hòṅ asīnken më tahëng pumnāmö nö rāchavö tö tarik, lökten chā-a nöng iṙūöhö ṙô tö vinīlö rācha re. Pòrô ngam Tēv Yāvē nö meuk ngam havëkö cha nö sā innāichngen Ò, sön anga-aṅ nö vë-ekūö Samu-ĕl nö hateungngö kuilōn cha. Katöllen Sôl ngach anga-aṅ nö rācha cha, ngam töyāichö ellōn. Irô-òtö nuk sakāmö Sôl pöri nö rācha yīhih tanāilö ellōn ngach anga-aṅ, hĕnghöre öt hang chööngö inrē. Lökten ngach ngam Tēv Yāvē nö sōḵ-en Sôl nö rācha. Katöllö ök ṙāl tarik anga-aṅ ang Tāvit nö rācha nö i chūöktit ò. Öltö yanīhi pöri ngam ṙētak sakāmö Tāvit nö hayöng.

Hĕng heuh ngach ik sā Tāvit nö chöhkö yik mëm re yik mi-in Sôl nö im kinyūngö. Meuk më kumyung ngach anga-aṅ nö pōi pinhe-eṅkūö tök lā-al cha tökiröng tarik ang Kōliat, ök tö miyëḵ ṙô tö yik Israel töm Tēv cha inrē. Yīhi tanānyö ngach Tāvit pön ötkô nö hang innāchngen më Israel tö ngam Tēv Yāvē inrē, lökten ò nö kunyi-inyre nö kiyung nö lā-al ngam tönangnyi kumlēḵ tarik. Aṅtī tö ngam chinvil kunleh tö aṅtö ihong ngach ngam ṙāl tarik Tāvit nö kunyi-inyre nö chuhkūö ngam tökiröng lā-al re tö machuöhtör fīt rôlòng. Miyëḵ ṙô ngach ang Kōliat tö Tāvit. Sapṙô ò pöri Tāvit nö ngö ṙô, yih man me-eṅ öm sanëtu, vööyu, lanaklu elngòh inrē, yih pöri chū-ö in meh öich la-al meh i minë-eny ngam Tēv Yāvē. Aṅtī tök töng hĕng mikööchö ihong ngach ang Tāvit nö afukngen Kōliat ngach rökngö likeun ò nö aṅti tök sanët Kōliat. Falngöre ngach yik aṅ Filistian kumyung.

Ṙamtörelōn ang Sôl nö meuk kumlēḵ hēk öt pinhe-eṅkūö Tāvit nö kiyung, lökten ò nö ilööṙen nö vīlen ò nö mākūö yik kumyung. Unôchngöre pöri anga-aṅ nö kalēḵ-ĕ ranānyngö tö Tāvit lökten ò nö pōi kumnyahlōn nö in ò pön hang inrōyö ò. Kūö Sôl pöri nöng iṙūhölōn tö kunsīkngövah Tāvit, lökten anga-aṅ nö ṙōl samyeūheu nöng apāṙaṙen nö laklö ngam nômö re. Sön Tāvit nö kööpö hanāngenlōn töm rācha ngam tö hòṅ fëlngen ò, pön akahalōn tö Sôl nö tö hachāmö elkui töm Tēv Yāvē. Unôichngöre ngach Sôl nö kapah nö lökngen el kinyūngö. Rācha ngach ang Tāvit asā kinlēḵngô ngam Tēv Yāvē.

Ik sā Tāvit ngach nö rācha, kuyulōn anga-aṅ tö re nö hòṅ mānlö patī ngam Tēv Yāvē. Lökten ngam Tēv Yāvē nö urĕhngöre ṙô nö vë-eny nang Tāvit töp mamānlö ngam patī ò min, nö öp kūön ò Sòlòmön. Kētö kinlēḵngô pöri ngam Tēv Yāvē nö in ò töp rācha min aṅ Israel nö lamöknyö im mikūönö ò ngam tökilēḵĕyö ṙama-any ngam kūön ngam kikānö ang Kristū sā ngam kinlēḵngô Ò nö el ök panô-òṅ i Ēten. Anga-aṅ an Mesayā ngam tö ngö manah “Tö hachāmö elkui.” Kilēḵngô re ngam Tēv Yāvē tö Mesayā nö anga-aṅ min mahayöng në pūlngö nöng örheūheu.

Pōyen ṙanamlōn ngach Tāvit, ngach hamūllö tö pōyen chōn aṅtī mamānö tö nuk töpōiṙāi inrē humlum, mās, vët inrē nö chöö-öny tö insöklö ök patī ngam Tēv. Pōyen nuk salmai nööinyö nö lökten i inlaha re nö uhômhötvö ellōn töm Tēv nö vī-i u. Ik ranöhtö kinpaha Tāvit māngôre anga-aṅ nö ngö ṙô: “In chu ṙô ngam fanöinylö ngam Mā Tēv, i rōi litāk chu inrē ngam ṙô ò.”—2 Samuĕl 23:2.

—Lökngörit im 1 Samuĕl; 2 Samuĕl; 1 Kinṙötngö; Isayā 9:7; Mëtiv 21:9; Lūkös 1:32; Yôhan 7:42.