PAGKATAPOS sang panahon ni Samson, nag-alagad subong propeta kag hukom sa Israel si Samuel. Pirme sia ginasilingan sang mga Israelinhon nga gusto nila mangin kaangay sang iban nga pungsod nga may tawhanon nga hari. Bisan pa masakit kay Jehova ini nga pangabay, ginsilingan niya si Samuel nga pasugtan sila. Ginpili sang Dios nga mangin hari ang mapainubuson nga tawo nga si Saul. Sang ulihi, nangin matinaastaason kag masinupakon sia. Ginsikway sia ni Jehova subong hari kag ginsilingan si Samuel nga pilion ang pamatan-on nga si David. Pero tinuig pa antes nangin hari si David.

Sang pamatan-on pa si David, ginkadtuan niya ang iya mga utod nga mga soldado ni Saul. Ang tanan nga soldado nahadlok sa ila kaaway nga higante nga si Goliat, nga pirme nagayaguta sa ila kag sa ila Dios. Bangod naakig si David, ginbaton niya ang panghangkat sang higante. Ang armas ni David labyog lamang kag pila ka bato. Gin-atubang niya ang iya kaaway nga nagataas sing halos tres metros. Sang ginyaguta sia ni Goliat, nagsabat si David nga mas nasangkapan sia sangsa higante kay nagapakig-away sia sa ngalan ni Jehova nga Dios! Napatay ni David si Goliat sa isa lang ka bato kag gingamit ni David ang espada ni Goliat sa pagpugot sa iya. Sa kahadlok, nagpalalagyo ang mga soldado nga Filistinhon.

Sang primero, nagdayaw gid si Saul sa kaisog ni David kag ginhimo niya sia nga lider sang iya mga soldado. Apang nahisa si Saul bangod sang mga kadalag-an ni David. Nalagyo si David kag nangin laaslaas sa sulod sang mga tinuig. Sa gihapon, nagpabilin si David nga matutom sa hari nga luyag gid sa pagpatay sa iya, bangod nahibaluan niya nga gintangdo ni Jehova nga Dios si Hari Saul. Sang ulihi, napatay si Saul sa inaway. Wala magdugay nangin hari si David, suno sa ginsaad ni Jehova.

Subong hari, handum gid ni David nga magpatindog sing templo para kay Jehova. Pero, ginsilingan ni Jehova si David nga isa sa iya mga kaliwatan ang magapatindog sini. Sia amo ang anak ni David nga si Solomon. Apang ginpadyaan sang Dios si David paagi sa isa ka makalilipay nga katipan: Ang iya kaliwatan magapatubas sing pinasahi nga mga hari. Sa ulihi, magapatubas ini sang Manluluwas, ukon Binhi, nga ginsaad sa Eden. Amo ini ang mangin Mesias, buot silingon, “Hinaplas,” nga gintangdo sang Dios. Nagsaad si Jehova nga ang Mesias mangin Manuggahom sa isa ka gobierno, ukon Ginharian nga magapabilin tubtob sa wala sing katubtuban.

Bangod sang daku nga pasalamat ni David, nagtipon sia sing tuman kadamo nga materyales kag malahalon nga mga metal para sa pagpatindog sang templo. Nagkomposo man sia sing madamo nga ambahanon paagi sa panuytoy sang Dios. Sang madali na lang sia mapatay, si David nagsiling: “Ang Espiritu sang GINOO nagpamolong paagi sa akon, ang iya polong yari sa akon dila.”—2 Samuel 23:2.

—Base sa 1 Samuel; 2 Samuel; 1 Cronica; Isaias 9:7; Mateo 21:9; Lucas 1:32; Juan 7:42.