TÁ NI̱ ya̱ʼa kuia̱ ni̱ si̱io Sansón, jaá ni̱ si̱io iin ta̱ ni̱ si̱naní Samuel ta̱ yóʼo ni̱ si̱kuu profetá xíʼín juez nuu̱ ñuu Israel. Ta ni̱ si̱nde̱ʼé na̱ ñuu Israel ña̱ ió ta̱ rey nu̱u java ka̱ ñuu, ña̱káa ni̱ kachi na xíʼín Samuel ña̱ kúni̱ na̱ koo iin ta̱ kukuu rey nuu̱ ná. Ko̱ ní nátaʼan ini Jeová Ndio̱s ña̱ ni̱ sika̱ na̱yóʼo iin rey, jo ni̱ sinajo̱ʼo va si ña̱ ni̱ kaʼa̱n na̱, ta ni̱ kachi si xíʼín Samuel ña̱ ná ka̱si ra Saúl já ná kukuu ra rey nu̱ú na̱ ñuu Israel. Iin ta̱a ndaʼví ini ni̱ si̱kuu Saúl yóʼo, jo tá ni̱ ya̱ʼa kuia̱ ni̱ nduu lándo̱ ra, ta ko̱ ní sinajo̱ʼo ka̱ ra̱ ña̱ ni̱ kaʼa̱n Ndio̱s. Sa̱ʼá ña̱yóʼo ko̱ ní nátaʼan ka̱ ini Jeová Ndio̱s ña̱ kukuu ta̱ yóʼo rey ta ni̱ kaʼa̱n si xíʼín Samuel ña̱ ná ka̱si ra iin ta̱ lóʼo̱ ni̱ si̱naní David já ná nduu ra rey nu̱ú na̱ ñuu Israel. Jo kua̱ʼá kuia̱ ni̱ ya̱ʼa já ni̱ ka̱sáʼá rá néʼe ra chuun.

Iin kivi̱ ni̱ saʼa̱n David ni̱ na̱ndukú rá ñani ra̱, ta̱ kúú soldadó Saúl, nu̱ú ñúʼu ra naá ra̱ xíʼín java ka̱ ta̱yiví. Tá ni saa̱ David nu̱ú ndóyi ta̱ soldadó yóʼo, ndéei̱ ni̱no uun ví ta̱ yóʼo ndóyi ra. Jáchi̱ yuʼú ra̱ kée iin ta̱ chi̱káʼno naní Goliat, jáchi̱ káʼa̱n ta̱ yóʼo ña̱ ko̱ó ña̱ kúú mií vá na̱ ñuu Israel ni Ndio̱s nuu̱ rá. Ta ko̱ ní nátaʼan mií vá ini David ña̱ ni̱ kaʼa̱n ta̱ yóʼo, sa̱ʼá ña̱yóʼo ni̱ kiʼin ra kuaʼa̱n ra̱ na̱á ra̱ xíʼín ta̱ chi̱káʼno yóʼo, va̱árá iin ta̱ lóʼo̱ ni̱ si̱kuu ra. Ta ju̱tú yuu̱ xíʼín java yuu̱ kuálí ni ni̱ ka̱chúun David já ni̱ na̱á ra̱ xíʼín ta̱ chi̱káʼno ni̱ si̱naní Goliat, ta yati uni̱ káa metró ni̱ si̱io jikó ta̱ yóʼo. Ni̱ saku̱ndaa Goliat yóʼo David, jo ni̱ kachi David ña̱ mií rá kandeé jáchi̱ kivi̱ Jeová kándeé ini ta̱ yóʼo já kuaʼa̱n ra̱ na̱á ra̱ xíʼín Goliat. Ta iin túʼún láá vá yuu̱ lóʼo̱ ni̱ ka̱chúun David já ni̱ ja̱kánkava ra ta̱ chi̱káʼno yóʼo. Ta ni̱ ji̱tá rá espada ta̱yóʼo já ni̱ saʼnda ra xi̱ní ta̱ yóʼo. Tá ni̱ sini java ka̱ ta̱ soldadó filisteo ña̱ ni̱ siʼi̱ Goliat yóʼo, ni̱ yu̱ʼú ndiva̱ʼo ra ta ni̱ sino ra kuaʼa̱n ra̱.

Ni̱ na̱taʼan ndiva̱ʼo ini ta̱ rey Saúl ña̱ ndeé ni̱ si̱io ini David, sa̱ʼá ña̱yóʼo ni̱ ka̱si ra ta̱ yóʼo já ná kukuu ra ta̱ kaneʼe nuu̱ nu̱ú ta̱ soldadó ra̱ tá kuaʼa̱n ra̱ na̱á ra̱. Jo sa̱ʼá ña̱ ni̱ si̱ka̱ndeé rá tá ni̱ si̱sáʼa̱n ra̱ si̱na̱á ra̱ ni̱ ka̱sáʼá ta̱ rey yóʼo xiní iʼvi̱ ndiva̱ʼo ñaʼá rá ta ni̱ kuni̱ ra̱ kaʼní ñaʼá rá. Sa̱ʼá ña̱yóʼo ni̱ kanian ni̱ sino David já ko̱ ní saʼní ñaʼá Saúl. Ta va̱árá kua̱ʼá kuia̱ ni̱ sika síno ra, jo ni iin kivi̱ ko̱ ní káʼán ta̱ yóʼo kaʼní rá ta̱ rey Saúl. Jáchi̱ ni̱ si̱síni̱ va̱ʼa va David yóʼo ña̱ mií vá Jeová Ndio̱s ni̱ ka̱si Saúl já ni̱ si̱kuu ra rey. Tá ni̱ ya̱ʼa kuia̱ já ni̱ siʼi̱ va Saúl yóʼo nu̱ú nákaa̱ ra̱ naá ra̱. Jaá ví kía̱n David ni̱ nduu ta̱ rey nu̱ú na̱ ñuu Israel, tátu̱ʼun ni̱ kaʼa̱n Jeová Ndio̱s.

Ni̱ kuni̱ David kava̱ʼa ra iin veʼe nu̱ú keekáʼno ra Jeová Ndio̱s. Jo ni̱ kachi Ndio̱s xíʼín rá ña̱ iin de̱ʼe va ra kukuu ta̱ kava̱ʼa veʼe ikáa. Ta ta̱ ni̱ ka̱va̱ʼa veʼe yóʼo ni̱ si̱kuu de̱ʼe ra Salomón. Jo ni̱ si̱ʼa Jeová Ndio̱s iin chuun káʼno chááka̱ nuu̱ David, tá ni̱ ka̱ndo̱o si xíʼín rá ña̱ xinañúʼú mií rá kukuu ta̱ rey nu̱ú na̱ ñuu Israel nu̱ú ndijaá ka̱ na̱ veʼe ra, ta ko̱ó ka̱ java ta̱ rey kukuu tátu̱ʼun ta̱ yóʼo. Ta tein na̱ veʼe ra kana ta̱ ni̱ kachi Ndio̱s kisi jáka̱ku na̱yivi nu̱ú kua̱chi sa̱ʼá ña̱ ni̱ si̱io nuu̱ ñúʼu̱ ñúchí Edén. Ta yóʼo kukuu Mesías ta ni̱ ka̱si Ndio̱s kukuu rey nuu̱ Gobiernó si, iin gobiernó ña̱ koo ndijaá táʼa̱n kivi.

Sa̱ʼá ña̱ ni̱ na̱ke̱ʼe ndiva̱ʼo David yóʼo ndivéʼe nuu̱ Jeová Ndio̱s kuaʼa̱ ndiva̱ʼo ña̱ʼa ni̱ ketútú rá já kasáʼá kava̱ʼa veʼe nu̱ú keekáʼno ra Ndio̱s. Ta ni̱ si̱ʼa Ndio̱s ña̱ ndichí nuu̱ rá já ni̱ taa ra kuaʼa̱ Salmo, á yaa ña̱ kéekáʼno Jeová Ndio̱s. Tá si̱ ni̱ kuyati ña̱ kivi David, ni̱ na̱ki̱ʼa ra ña̱ñúʼú nuu̱ Ndio̱s saʼa̱ ndijaá ña̱ ni̱ kee ra: “Espíritu ii̱ Jeová Ndio̱s kúú ña̱ ni̱ kaʼa̱n kuendá yuʼu̱, ta ni̱ si̱na̱kaa̱ va tu̱ʼun si yúʼi̱” (2 Samuel 23:2).

(Ña̱yóʼo va̱sian nuu̱ 1 Samuel, 2 Samuel, 1 Crónicas, Isaías 9:7, San Mateo 21:9, San Lucas 1:32 xíʼín San Juan 7:42.)