စီၤၡံၣ်ၡိၣ်သံဝံၤအလီၢ်ခံ စီၤၡမူၤအ့လးမၤတၢ်ဒ် ဝံဒီးစံၣ်ညီၣ်ကွီၢ်အသိး လၢကီၢ်အံၣ်စရ့လးအပူၤန့ၣ်လီၤ. ပှၤအံၣ်စရ့လးဖိတဖၣ် စံးဘၣ်စီၤၡမူၤအ့လး တလီၢ်လီၢ်လၢအဝဲသ့ၣ်လိၣ်ဘၣ်ဝဲ စီၤပၤတဂၤ ဒ်ထံကီၢ်အဂၤတဖၣ် အသိးန့ၣ်လီၤ. အဝဲသ့ၣ်အတၢ်ဃ့အံၤမ့ၢ် တၢ်လၢအထီဒါယဟိဝၤယွၤသနာ်က့ ကစၢ်မၤလိာ်စီၤၡမူၤအ့လးလၢ ကမၤဝဲဒ်အဝဲသ့ၣ်ဃ့ဝဲအသိးန့ၣ်လီၤ. ဒီးကစၢ်ယွၤဃုထၢထီၣ် ပှၤလၢအအိၣ်ဒီးတၢ်ဆီၣ်လီၤသး တဂၤလၢအမံၤမ့ၢ်စီၤစီလူး လၢစီၤပၤန့ၣ်လီၤ. ဘၣ်ဆၣ်တၢ်ဆၢကတီၢ်လဲၤပူၤကွံာ်ဒီး စီၤပၤစီလူးပာ်ထီၣ်ထီအသး ဒီးတဒိကနၣ်ယွၤအကလုၢ်လၢၤဘၣ်. လၢတၢ်န့ၣ်အဃိ, ယဟိဝၤယွၤညိကွံာ်အီၤလၢ စီၤပၤအလီၢ်ဒီး စံးဘၣ်စီၤၡမူၤအ့လးလၢ ကဃုထၢပှၤသးစၢ်တဂၤ လၢအမံၤမ့ၢ်စီၤဒၤဝံးန့ၣ်လီၤ. ဘၣ်ဆၣ် နံၣ်တဖၣ်လဲၤပူၤကွံာ်အါမးသနာ်က့ စီၤဒၤဝံးတပၢဘၣ်တၢ်ဒ် စီၤပၤအသိးဒံးဘၣ်.

ဖဲစီၤဒၤဝံး ဒိၣ်ထီၣ်သီသီ အဆၢကတီၢ်န့ၣ် အဝဲလဲၤဆူ အဝဲၢ်သ့ၣ်တဖၣ်အအိၣ် လၢအကဲသုးလၢ စီၤစီလူးအသုးမုၢ်အပူၤန့ၣ်လီၤ. ဖဲန့ၣ်အဆၢကတီၢ်န့ၣ် သုးမုၢ်ဒီတဖုအံၤပျံၤတၢ်ဖုးတၢ်နးနးကလဲာ် လၢအဒုၣ်အဒါသုးဖိ တဂၤလၢအမံၤမ့ၢ် စီၤကၤလယး အဃိန့ၣ်လီၤ. ပှၤဖးဒိၣ်ဖးထီတဂၤအံၤန့ၣ် ဒုၣ်ဒွဲၣ်စံးအၢအဝဲသ့ၣ်ဒီး အဝဲသ့ၣ်အယွၤန့ၣ်လီၤ. စီၤဒၤဝံးအသးဒိၣ်ထီၣ်ဒီး အၢၣ်လီၤဝဲလၢ ကဒုးတၢ်ဒီး စီၤကၤလယးန့ၣ်လီၤ. စီၤဒၤဝံး ဟံးန့ၢ်ဝဲနီၣ်ဘျုး ဒီးလၢၢ်စှၤဖျၢၣ်ဝံၤဒီးလဲၤဝဲဒ်သိး ကဒုးတၢ်ဒီးဒုၣ်ဒါတဂၤအံၤလၢ အနီၢ်ထီ ၉ ပ့ၣ်ဘျဲၣ်န့ၣ်လီၤ. ဖဲစီၤကၤလယး ဒုၣ်ဒွဲၣ်စံးအၢအီၤအခါ, စီၤဒၤဝံးစံးဆၢ ကဒါက့ၤအီၤလၢ ယဟဲဆူနအိၣ်လၢ ယဟိဝၤယွၤအမံၤလီၤ. လၢတၢ်န့ၣ်အဃိ စီၤဒၤဝံးအိၣ်ဒီး တၢ်စုကဝဲၤဂ့ၤန့ၢ်ဒံးအီၤန့ၣ်လီၤ. ဒီးစီၤဒၤဝံးမၤနၢၤ အီၤလၢလၢၢ်ထဲတဖျၢၣ်ဧိၤ ဒီးထုးထီၣ်ဝဲစီၤကၤလယးအနးဝံၤ ဒီၣ်တဲာ်ကွံာ်ဝဲအကိာ်န့ၣ်လီၤ. ဖဲန့ၣ်အခါ ပှၤဖလ့ၡသးအသုးမုၢ်န့ၣ် ပျံၤတၢ်ဒီး ဃ့ၢ်ကွံာ်ဝဲန့ၣ်လီၤ.

သီသီခါန့ၣ် စီၤစီလူးဆိကမိၣ်ဒိၣ် စီၤဒၤဝံးအတၢ်သးဒူ ဒီးပာ်အီၤလၢသုးဖိအခိၣ် လၢအသုးမုၢ်ပူၤန့ၣ်လီၤ. ဘၣ်ဆၣ် စီၤဒၤဝံးအတၢ်မၤနၢၤတဖၣ်န့ၣ် ဒုးအိၣ်ထီၣ်စီၤစီလူး အတၢ်သူၣ်က့ၣ်သးကါလီၤ. လၢတၢ်န့ၣ်အဃိ စီၤဒၤဝံးဘၣ်ဃ့ၢ်ကွံာ်ဝဲလၢအသးသမူအဂီၢ်ဒီး ဘၣ်အိၣ်ဝဲဒ် ပှၤဃ့ၢ်ပူၤဖျဲးသးတဂၤအသိး အါနံၣ်အါလါန့ၣ်လီၤ. ဘၣ်ဆၣ်သနာ်က့ စီၤဒၤဝံးသ့ၣ်ညါဝဲလၢ ယဟိဝၤယွၤဃုထၢထီၣ် စီၤပၤစီလူးအဃိအသးတီလၢ စီၤပၤလၢအအဲၣ်ဒိး မၤသံအီၤတဂၤအံၤအဖီခိၣ်န့ၣ်လီၤ. လၢခံ, စီၤစီလူးသံကွံာ်လၢ တၢ်ဒုးတခါအပူၤန့ၣ်လီၤ. လၢတၢ်န့ၣ်အလီၢ်ခံ, တယံာ်ဘၣ်ဒီး ဒ်ယဟိဝၤယွၤစံးပာ်ဝဲအသိး စီၤဒၤဝံးကဲထီၣ်စီၤပၤန့ၣ်လီၤ.

ဒ်အမ့ၢ် စီၤပၤတဂၤအသိး, စီၤဒၤဝံးအသးဆူၣ်လၢ ကသူၣ်ထီၣ်ယဟိဝၤယွၤ အတၢ်လုၢ်ဟံၣ်န့ၣ်လီၤ. ဘၣ်ဆၣ် ယဟိဝၤယွၤစံးဘၣ်စီၤဒၤဝံးလၢ အဝဲဒၣ်အစၢၤအသွဲၣ်အကျါတဂၤ ကဘၣ်သူၣ်ထီၣ်ဝဲန့ၣ်လီၤ. ပှၤလၢကသူၣ်ထီၣ်တၢ်လုၢ်ဟံၣ်အံၤမ့ၢ်ဝဲ စီၤဒၤဝံးအဖိခွါစီၤၡလိၤမိၤန့ၣ်လီၤ. ဘၣ်ဆၣ်သနာ်က့, ယွၤဆိၣ်ဂ့ၤစီၤဒၤဝံးဒီး မၤဝဲတၢ်အၢၣ်လီၤအီလီၤဒီးအီၤ ဒ်သိးတၢ်အုၣ်က့ၤခီၣ်က့ၤကစၢ် မ့တမ့ၢ် တၢ်အချံအသၣ်လၢ ဘၣ်တၢ်စံးပာ်အီၤဖဲ ဧ့ၤဒ့ၣ်အပူၤန့ၣ် ကဟဲလီၤစၢၤလၢ စီၤဒၤဝံးအစၢၤအသွဲၣ်န့ၣ်လီၤ. အဝဲကမ့ၢ်မ့းၡံအၤ ဒီးအခီပညီမ့ၢ်ဝဲ “ပှၤလၢအဘၣ်တၢ်ဒိးဖှူအီၤ” လၢယွၤဃုထၢထီၣ်အီၤန့ၣ်လီၤ. ယဟိဝၤယွၤစံးပာ်ဝဲလၢ မ့းၡံအၤကကဲထီၣ် တၢ်ပၢတၢ်ပြးကစၢ် ဒီးဘီမုၢ်အံၤကအိၣ်ဝဲလီၤထူလီၤယိာ်န့ၣ်လီၤ.

စီၤပၤဒၤဝံးအိၣ်ဒီးတၢ်စံးဘျုးစံးဖှိၣ်ဖးဒိၣ်အဃိ ပာ်ဖှိၣ်ထီၣ်ဝဲ တၢ်သူၣ်ထီၣ်အပီးအလီ ဒီးတၢ်အပီးအလီအဂၤလၢ အလုၢ်ဒိၣ်ပှ့ၤဒိၣ် (အဒိ– ထူ, စ့, တိၢ် ) တဖၣ်လၢ ပှၤကသူၣ်ထီၣ်တၢ်လုၢ်ဟံၣ်အဂီၢ်န့ၣ်လီၤ. ဒီးတၢ်ထိးဘၣ် စီၤဒၤဝံးအသးလၢကကွဲးပာ်ဖှိၣ်ဝဲ ထါစံးထီၣ်ပတြၢၤတဖၣ်န့ၣ်လီၤ. ဒီးဘူးထီၣ်လၢအတၢ်အိၣ်မူ ကကတၢၢ်ကွံာ်န့ၣ် စီၤဒၤဝံးအၢၣ်လီၤအီလီၤဝဲ ဒ်အံၤလီၤ– “ယွၤအသး ကတိၤတၢ်ဒီးယၤ, ဒီးအကလုၢ် အိၣ်ဝဲလၢ ယပျ့ၤလိၤလီၤ.”—၂ ၡမူၤအ့လး ၂၃:၂.

​—ဘၣ်တၢ်ဒိးသန့ၤထီၣ်အီၤလၢ ၁ ၡမူၤအ့လး; ၂ ၡမူၤအ့လး; ၁ ကွဲးနီၣ်တၢ်; ယၡါယၤ ၉:၇; မးသဲ ၂၁:၉; လူၤကၣ် ၁:၃၂; ယိၤဟၣ် ၇:၄၂ န့ၣ်လီၤ.