MA YA bi nrru̱u̱ e Sansón, o bʼu̷bʼu̷ e Samuel mi menzumu̷ a Israel, mi ngeje juez ñe mi profetakʼu̷. Na nu paa kʼo israelita o maa xipjiji e Samuel: Juankʼu̷jmedya na bʼe̷zo kʼu̷ ra kjapu̷jme rey jakʼo nzi ga ñʼeje o rey yo ñaja jñiñi. Nukʼua e Jeoba zo me ko zichʼi kja o mu̷bʼu̷ o juajnu̷ e Saúl ngekʼua ro tsjaa rey. E Saúl me ma jonte mi a̷ta̷ Mizhokjimi, pero ma o kjogu̷ yo paa go mbu̷ru̷ go ñeʼestjo, dya kja mi a̷ta̷ Mizhokjimi mi kjaa kʼo mi nee angeze, ngekʼua e Samuel o xipji e Saúl: Ya mama e Jeoba dya kja ri tsjaa rey kja Israel. E Jeoba o xipji e Samuel e David ro tsjaa rey, kja mi trʼiikʼu̷ ngekʼua xi ro mezhe ma kja ro ñesʼeji rey a Israel.

Kʼo kjuarma e David mi xundaro kja o tropa e Saúl. Angezeji mi ka̱ra̱ji kja bʼatrju̷ o maa a̷sta̷ji pje ro tsjaji kʼo filisteo. E David kja mi trʼii o maa ja mi bʼu̷bʼu̷ o kjuarmaji. Nukʼua o e̱je̱ na trʼabʼe̷zo mi chju̱u̱ Goliat mi pe̷sʼi na jñii metro me ma nrra̱ʼa̱ mi filisteo, o ne̱e̱ bobʼu̷trjo kja bʼatrju̷ mi mapju̷ ga kjaba: Juankʼeji naja in dyoji ra chu̱ʼu̱gobʼe, ma ra ndo̱kʼu̷go nuʼma ra kjagojme in bʼepjigeji, ma ra to̱pu̷go nuʼma ri tsjageji in bʼepjigojme. Ma o dya̷ra̷ e David me ko u̷dʼu̷ angeze o mama: Dya ri su̱u̱geji kʼe trʼabʼe̷zokʼu̷, nuzgo ra maa sogobʼekʼu̷. Kʼe David o penchʼi o trʼenzho o jñutru̷ janzi tsʼinrrojo kja o tsʼimape, o maa chjebi e Goliat. E Goliat mi trjembe e David, pero e David o nrru̷ru̷: E Jeoba ra mboxkʼu̷go ra to̱jo̱. Kjanu o jñu̷ʼmu̷ na tsʼinrrojo kjanu o pjatrʼu̷ e Goliat. E Goliat ix ko nu̷gu̷ a jomu̷, kjanu o makʼua e David jankʼo mi mʼana e Goliat, o jñu̷mbu̷ kʼu̷ o espada kjanu o dyopku̷ a ñiʼi. Nukʼua kʼo tropa kʼo filisteo ma go nuji kʼu̷ ya bi nrru̱u̱ kʼe trʼabʼe̷zokʼu̷ me go zu̱u̱ji, o bʼu̷gu̷ji o moji.

Nudyakʼua e Saúl me ko ngentrjodyakʼua, kjanu o ñeme e David ro manda o xundaro. E David kʼo o xundaro mi to̱ji na punkju̷ chu̱ʼu̱, ngekʼua e Saúl mi u̷mbu̷ e David mi nee ro mbotrʼu̷. Nudyakʼua e David o kʼueñe o maa na je̱e̱, e Saúl ñe o tropa mi jyodʼu̷ji e David, ja nrre mi chja̷jna̷ji mi nee ro mbotrʼu̷ji o mezhe na punkju̷ kje̷e̷ dya mi jeziji. Pero e David mi pa̱ra̱ ke mi ngeje e Mizhokjimi o ñeme e Saúl ro mbe̷zhi rey, ngekʼua dya o nzhopkʼu̷ jama tsjaa e Saúl. Na nu paa, kʼo israelita o tsjaji chu̱u̱ ko ñaja jñiñi, nujnu nge maa o nrru̱u̱ e Saúl, nudyakʼua o za̷dʼa̷ kʼu̷ o mama Mizhokjimi, o ñesʼeji e David ro tsjaa rey a Israel.

E David mi nee ro jya̷bʼa̷ da ngumu̷ ja ro matrʼu̷kjimi. E Jeoba o xipji: Nutsʼkʼe dya ri jya̷bʼa̷ kʼe ngumu̷, ngeje in chʼiige. E Jeoba o ñeme e Salomón ro jya̷bʼa̷ kʼe ngumu̷. E Jeoba o tsjapu̷ na promesa e David, o xipji ke nrreze angeze jesta o mboxbʼeche kʼu̷ kja ro e̱ji ro mbe̷zhiji rey. Ñe je rgui ñe̱je̱ kʼe Ntee ke ro ne̱e̱ salvazu̷ji jaba mama e Jeoba kja Edén. E Mizhokjimi ro juajnu̷ ro mbe̷zhi Rey kja o Reino ra manda nrrexe yo paa.

E David me ko ma̷ja̷ kʼo o dya̷ra̷, o jmutu̷ material, ñe oro, ñe plata, ngekʼua ro jya̷bʼa̷ji kʼe trʼangumu̷. E Mizhokjimi o ñu̷nbu̷ o mu̷bʼu̷ ro pjebʼi bʼizhi, mi to̱njo̱, mi unu̷ pojo e Jeoba, mi ngeje salmokʼo. Ma a mi pale o mama mi nge Mizhokjimi o unu̷ ro mba̱ra̱ ngekʼua o opju̷kʼo, o mama ga kjanu: “O espíritu e Jeoba nge kʼu̷ mi kjaa ke ro ñaago, o jñaa angeze ix mi bʼu̷bʼu̷trjo kja in tsʼijñigo” (2 Samuel 23:2).

(Nu kʼo gua e̱je̱ba xo ri jyodʼu̷ kja yo libro 1 Samuel, 2 Samuel, 1 Crónicas, Isaías 9:7, Mateo 21:9, Lucas 1:32 ñe Juan 7:42.)