KEMA ya miktoya Sansón, Samuel pejki tekiti ne Israel kej se tetlajtolsenkajketl uan tlajtolpanextijketl. Nopa israeleuanij, kinekiyayaj itstosej kej sekinok altepemej, yeka kitlajtlanijkej ma kitlali se tlanauatijketl. Maske Jehová kualanki, kena kinejki uan kinauatik Samuel ma kitekitlali Saúl. Achtouia amo moueyichiuayaya, teipa moueyimatki uan ayokmo kineltokak toTeotsij. Uajka Jehová ayokmo kinejki ma tekichiua, yeka kiiljuik Samuel ma kitekipatla ika se telpokatl tlen itoka David. San monekiskia panos se keski xiuitl kema peuaskia tlanauatis.

Se tonali, David kinpaxaloto iikniuaj, katli eliyayaj Saúl itlapaleuijkauaj uan kipiayayaj tlauilankayotl. Kema asito kinitak nopa soldados tlauel majmajtoyaj. ¿Kenke? Pampa se tlauel ueyi tlateuijketl filisteaejketl tlen itoka Goliat kinijixnamiktoya israeleuanij uan toTeotsij. David tlauel kualanki, yeka kinejki moteuis iuaya, maske eliyaya san se telpokatl. Uajka kinamikito nopa tlakatl tlen nechka eyi metro iuejkapanka, maske kiuikayaya san se teuitlatstli uan se keski tetl. Goliat kipinajtik, uan David kiiljuik ueliskia kitlanis, pampa kipixtoya Jehová itetikayo. Yeka san ika setsi tetl kimiktik. Teipa kikixtilik iespada uan kikechtsontejki. Kema nopa sekij soldados filisteaeuanij kiitakej, cholojtejkej pampa tlauel majmajkej.

David amo majmauiyaya, yeka tlanauatijketl Saúl tlauel kipaktik uan kitlalik ma kinyakana itlapaleuijkauaj. Maske ni telpokatl tlauel tlatlaniyaya kema tlateuiyayaj, Saúl tlauel kikualankaitak uan kinejki kimiktis. Yeka David monekiyaya cholos, uan kej nopa momanauiskia. Maske miak xiuitl cholojtinenki, amo kema kikajki kitekipanok Saúl. ¿Kenke? Pampa kimatiyaya toTeotsij Jehová kitekitlalijtoya. Teipa, Saúl mijki kampa tlateuiayayaj. Uajka David mochijki nopa yankuik tlanauatijketl, kej Jehová kiijtojtoya.

David kinekiyaya kichiuilis Jehová se teokali. Uan Jehová kiiljuik amo ya kichiuaskia, kichiuaskia ikone: Salomón. Maske David amo kichijki, Jehová kimakak se ueyi tlateochiuali: kichijki iuaya se tlajtolsenkaualistli, kampa kiiljuik eliskia nopa achtoui tlanauatijketl tlen nochi tlanauatianij katli onkaskia. Uan tlen inijuantij ualaskia nopa Temakixtijketl, katli toTeotsij ipa kiijtojtoya ne Edén. Ya eliskia nopa Mesías o tlen Kitlapejpenijtokej, katli Jehová kitlaliskia ma nochipa tlanauati kej Tlanauatijketl ipan iTlanauatijkayo.

Pampa David tlauel kitlaskamatiyaya toTeotsij, kinechikok miak tlamantli tlen ika kalchiuaj uan yejyektsitsij tepostli kej oro uan plata tlen kitekiuiskiaj ipan nopa teokali. Nojkia toTeotsij kichijki ma kiijkuilo miak salmos, o uikatl tlen ika kiueyichiuaj Jehová. Uan kema nechka mikiskia, David kinextik toTeotsij kipaleuijtoya, yeka kiijtok: “Itonal toTeko kitekiuia nokamak para ma nikijtos itlajtol. ToTeko kichijki para itlajtol ma kisa nokamako” (2 Samuel 23:2).

(Mokixtijtok ipan 1 uan 2 Samuel, 1 Crónicas, Isaías 9:7, Mateo 21:9, Lucas 1:32 uan Juan 7:42.)