KAYARI impatey nen Samson, nanlingkor si Samuel bilang propeta tan ukom ed Israel. Naynay ya ikekerew na saray Israelita ed sikato a labay day nawalaan na ari a singa saray arum a nasyon. Anggaman makapainsulto ed si Jehova iyan kerew, inwanwan toy Samuel pian gawaen so kerew da. Amili so Dios na mapaabeban laki a manngaran na Saul pian magmaliw ya ari. Pero, asabi panaon et nagmaliw a mapaatagey tan agmaunor si Arin Saul. Impulisay nen Jehova si Saul bilang ari tan imbaga to ed si Samuel a manuro na sananey—sakey a kalangweran a manngaran na David. Balet, kaukolan ya onlabas ni tao-taon antis a magmaliw ya ari si David.

Sanen tinedyer ni David, binisita to ray agagi to a kaiba ed armada nen Saul. Amin a sundalo so tinmakot ed sakey a higanten kalaban, si Goliat, a naynay a mankakantiaw ed sikara tan ed Dios da. Asyodotan si David tan labay ton labanan si Goliat. Say armas labat nen David et palsot tan pigaran bato, tan inarap toy Goliat, a say katagey to et masulok a siameran piye. Sanen kakantiawan nen Goliat, imbando nen David a magmaong so armas to nen say sikato, lapud milaban si David diad ngaran nen Jehova a Dios! Intumba nen David si Goliat panamegley na sakey labat a bato insan to pinutotan na ulo ya inusar toy mismon espada na saman a higante. Batik iray sundalon Filisteo lapud takot da.

Nen primero, mandinayew si Saul ed pakpel nen David tan ginawa ton sundalo to. Balet saray impanalo nen David et angimonan a maong nen Saul. Kaukolan ya ontakas si David tan manamot-amot a pigay taon. Anggaman sikatoy labay a pateyen na ari, nansiansian matoor si David ed sikato, a say katunongan to et si Jehova a Dios so anuro ed si Arin Saul. Diad kaunoran, inatey si Saul ed panlalaban. Ag-abayag, nagmaliw ya ari si David, a singa insipan nen Jehova.

Bilang ari, labalabay nen David so mangipaalagey na templo parad si Jehova. Pero, inkuan nen Jehova ed si David a say mangipaalagey ed satan et sakey ed saray ilalak to. Saman et si Solomon. Benendisyonan na Dios si David, panamegley na makapaliket a sipanan: Manlapud poli to so mantutumbokan ya ari. Tan nidumaduma itan ta diad kaunoran et satan so panlapuan na Manangisalba, odino Bini, ya insipan ed Eden. Natawag itan a Mesias, a kabaliksan toy “Say Alanaan,” a tinuro na Dios. Insipan nen Jehova a say Mesias et magmaliw a Manuley ed sakey a gobierno, odino Panarian, ya agmangangga.

Lapud baleg a pisasalamat to, nantipon si David na dakel a materyales tan ankabli iran metal parad pamaalagey na templo. Nankompos met na dakel iran kanta odino salmo. Nen magano lan ompatey, onia so inkuan nen David: “Say espiritu nen Jehova nansalita ed panamegley ko, tan say salita to wala ed dilak.”—2 Samuel 23:2.

—Nibase ed 1 Samuel; 2 Samuel; 1 Awaran; Isaias 9:7; Mateo 21:9; Lucas 1:32; Juan 7:42.