SANSON wañukuptinmi Israelpi karqa Samuel sutiyoq juez hinaspa profeta. Israelitakunaqa huk nacionkuna hina kayta munaspankum huk reyta mañakurqaku. Chayqa Jehová Diostam piñarachirqa, ichaqa uyarispanmi Samuelta nirqa Saulta reyta hina akllananpaq. Saulqa humildem karqa, ichaqa tiempopa risqanman hinam hatunchakuspan Diosta manaña kasukurqachu. Chaymi Jehová Diosqa qepancharuspan Samuelta nirqa Saulpa rantinpi David mozota akllananpaq. Ichaqa watakunaraqmi pasanan karqa kamachinanpaq.

Huk kutipim Davidqa wawqenkunata watukurqa, paykunaqa Saulpa tropankunawan kuskam guerrapi peleachkarqaku. Chayaruptinmi tropakunaqa mancharisqallaña kachkarqaku. ¿Imanasqa? Filisteamanta hatunkaray Goliat soldadom israelitakunatawan Diosta insultachkarqa. Davidqa mozollaraq kaspanpas, piñakuruspanmi chay runawan peleayta munarqa. Warakantawan iskay-kimsa rumita aparikuspanmi Goliatwan peleaq rirqa, Goliatqa yaqa kimsa metro sayayniyoqmi karqa. Burlakuptinmi Davidqa nirqa Jehová Diospa sutinpi peleaq risqanta. Hinaspam huk rumillawan wañurachirqa. Chaymantapas espadanta qechuruspanmi umanta qorururqa. Filistea tropakuna chayta qawaykuspankum mancharisqallaña lluptikurqaku.

Davidpa mana manchakuq kasqanmanta Saul admirakuspanmi tropankunata kamachinanpaq churarurqa. Ichaqa guerrakunapi David atipasqanmantam Saulqa envidiakuspan wañuchiyta munarqa. Chaymi Davidqa lluptikunan karqa. Unay watakuna Saulmanta lluptikuspanpas anchatam respetarqa. ¿Imanasqa? Davidqa yacharqam Saulta rey kananpaq Dios akllasqanta. Tiempo pasaptinmi, Saulqa guerrapi wañukurqa. Chaymi Jehová Diospa prometesqanman hina, Davidña mosoq rey karqa.

Davidqa anchatam munarqa Jehová Diospaq templo rurayta. Ichaqa Diosmi nirqa huk kaqnin mirayninña rurananpaq. Payqa karqa churin Salomonmi. Chaywanpas, Diosqa Davidwanmi contratota rurarqa, nirqam paymanta qallaykuspan mirayninkunapas reykuna kanankupaq. Paynintakamam prometesqa Libraq otaq Eden huertapi Diospa rimasqan Miray rikurimunan karqa. Chay miraymi Mesias otaq Akllasqa karqa, paytam Jehová Diosqa akllarqa Gobiernonpi wiñaypaq kamachinanpaq.

Davidqa anchata agradecekuspanmi Diospa templonta ruranankupaq tukuy necesitakusqanta huñurqa, qoritawan qollqetapas. Chaymantapas chuya espiritunwan Dios yanapaptinmi achka salmokunata otaq takikunata rurarqa. Wañukunanpaqña kachkaspanmi Davidqa Jehová Diosta alabarqa tukuy rurasqanmanta, nirqam: “Diospa Espiritunmi ñoqantakama rimarirqa. [. . .] Palabrallanmi simillaypipas tarikurqa”, nispa (2 Samuel 23:2).

(1 Samuel; 2 Samuel; 1 Cronicas; Isaias 9:7; Mateo 21:9; Lucas 1:32; Juan 7:42.)