SANSONPA wañupusqan qhepamanmi profeta Samuel kawsarqan. Huk nacionkuna hina kayta munaspan Israel runakuna Jehová Diosmanta huk reyta mañakurqanku. Diosqa phiñakurqanmi chay mañakusqankumanta, ichaqa Samueltan kamachirqan Saulta reyta hina akllananpaq. Payqa huch’uyyaykukuqmi karqan, qhepamanmi ichaqa hatunchakurqan, Diostapas manan kasukurqanchu. Jehová Diosqa manan allinpaqchu payta qhawarirqan, chaymi Samuelta kamachirqan paypa rantinpi David waynachata reyta hina akllananpaq. Ichaqa askha watakuna qhepamanñan kamachikunan karqan.

Huk p’unchaymi David wawqenkunata watukuq rirqan, paykunaqa Saulpa ejercitonpin kasharqanku. Chayaspan rikurqan soldadokuna manchasqa kashasqankuta. ¿Imarayku? Filistea llaqtamanta Goliat sutiyoq hatunkaray soldadon Israel ejercitoq contranpi Diospa contranpiwan hatarisharqan. Chayta rikuspan Davidqa sinchita phiñakurqan, chaymi waynachalla kashaspapas paywan churanakurqan. Warak’antin rumichakunallantinmi Davidqa chay kinsa metro sayayniyoq soldadowan maqanakuq rirqan. Davidta rikuspan Goliatqa paymanta burlakurqan, Davidmi ichaqa nirqan Jehová Diospa sutinpi maqanakunanta. Chaymi huk rumillawan wañuchirqan, hinan Goliatpa espadanta horqospa umanta qhorurqan. Chayta rikuspan Filistea soldadokuna mancharikuspa ayqekurqanku.

David mana manchakuq kasqanmantan rey Saúl anchata admirakurqan, chaymi ejercitonpi umalliqta churarqan. Ichaqa askha guerrakunapi atipasqanraykun Saulqa envidiakuspa Davidta wañuchiyta munarqan. Chaymi Davidqa huk llaqtakunaman ayqekuspa chaykunapi askha watakuna tiyarqan. Chaywanpas manan hayk’aqpas Saúl contra hatarirqanchu, ¿imarayku? Diospa akllasqan rey kasqanrayku. Qhepamanmi Saulqa maqanakushaspa wañurqan. Chhaynapin Davidqa reyman tukupurqan Diospa prometesqanman hina.

Davidqa huk wasitan ruwayta munarqan Diosta yupaychanapaq. Diosmi ichaqa nirqan huknin churinña chay ruwananta. Chaymi qhepaman churin Salomón chay wasita sayarichirqan. Chaywanpas, Jehová Diosqa Davidwanmi rimanakurqan paymanta qallarispa mirayninmanta reykuna kananpaq. Hinaspapas mirayninmantan hamunan karqan Kacharichiq, Edenpi Diospa prometesqan Miray. Chay Mirayqa karqan Mesiasmi otaq Akllasqa runa. Paytan Jehová Dios akllarqan Gobiernonpi kamachinanpaq. Chay Gobiernonqa wiñaypaqmi kanqa.

Agradecekuspan Davidqa yupaychana wasita hatarichinanpaq qorita, qolqeta, imaymana materialkunatawan askhata huñurqan. Hinaspapas Diospa yuyaychasqanmi askha takikunata qelqarqan. Manaraq wañupushaspan tukuypi yanapasqanmanta Diosta hatuncharqan, nirqanmi: “Señor Diospa Espiritunmi ñoqanta riman, siminkunan simiypi kashan”, nispa (2 Samuel 23:2).

(1 Samuel; 2 Samuel; 1 Crónicas; Isaías 9:7; Mateo 21:9; Lucas 1:32; Juan 7:42.)