ΜΕΤΑ κατά Σαμψών, προφήτης ντα κριτής κο Ισραήλ ισινέ ο Σαμουήλ. Ο Ισραηλίτες βακερένας λέσκε συνέχεια ότι μανγκένας τι αβέν σαρ ο γιαβερά τθεμά ντα τι τθερέν βον-ντα εκχέ τζενές για τι αβέλ λένγκο βασιλιάς. Παρόλο σο προσβαλιντέ ι Ιεχωβάς οντουλέσαρ σο μανγκλέ, βοβ βακερντάς κο Σαμουήλ τι κερέλ οντουβά σο βακερντέ. Ο Ντεβέλ τραμπιντάς εκχέ τζενές σο ισινέ ταπεινός για τι αβέλ λένγκο βασιλιάς. Ο ναβ λέσκο ισινέ Σαούλ. Σοράν, όμως, ο Βασιλιάς Σαούλ αβιλό υπερήφανος ντα να ντέλας καν ι Ντεβλές. Οτθάρ, ο Ιεχωβά βακερντάς κο Σαμουήλ τι τσσουβέλ εκχέ γιαβερές για τι αβέλ βασιλιάς λέσκε θεσιάτε​—εκχέ τερνές σο βακερένας λέσκε Δαβίδ. Όμως, κα νακχένας μπρεσά για τι αβέλ βασιλιάς ο Δαβίδ.

Ο Δαβίδ ίσως ισινέ ατζέκ τερνό όταν γκιλό τι ντικχέλ πι πφραλέν σο υπηρετίνενας κο στρατός του Σαούλ. Σαρό ο στρατός νταρασάλοας κατά Γολιάθ, εκ γίγαντας πολεμιστής σο πρασάλας εμ λεν εμ ι Ντεβλές σο πακιάνας. Ο Δαβίδ χολιασάλο ντα γκιλό τι τσσουβέλ-λεν οντουλέ γιγαντάσαρ σο ισινέ περίπου τριν μέτρα. Γκιλό σάντε χάνικ μπαρέντζαρ ντα με εκ σφεντόνα. Όταν ο Γολιάθ πρασαντάς-λες, ο Δαβίδ βακερντάς ότι τθερέλας πιο μπουτ πράγματα για τι πολεμίνελ ι γιγαντάς, επειδή τζάλας ι Ιεχωβάσκε ναβέσαρ! Ο Δαβίδ μουνταρντάς τον Γολιάθ σάντε εκχέ μπαρέσαρ ντα σοράν τσσιντάς λέσκο σορό λέσκε σπαθίσαρ. Ο στρατός των Φιλισταίων νασλό κατά νταρ.

Κι αρχή, ο θάρρος του Δαβίδ κερντάς μπαρί εντύπωση κο Σαούλ ντα οτθάρ τσσουντάς-λες τι κερέλ κουμάντος σαρό λέσκο στρατός. Αλλά επειδή ο Δαβίδ καταφερίνελας τι κερέλ μπουτ πράγματα, ο Σαούλ αρχισάλο τι ζηλίνελ-λες μπουτ. Οτθάρ, ο Δαβίδ έπρεπε τι νασέλ ντουρ για τι σώντιβελ ντα τι τζουβντιόλ σαρ κυνηγιμέ για μπουτ μπρεσά. Παρόλο σο ο Βασιλιάς Σαούλ προσπαθίνελας τι μουνταρέλ-λες, ο Δαβίδ να μανγκέλας τι κερέλ λέσκε κακός επειδή σκεφτίνελας ότι ο Ιεχωβά τσσουντάας-λες τι αβέλ βασιλιάς. Τελικά, ο Σαούλ μουλό σε εκ πόλεμος. Χάνικ πιο σοράν, ο Δαβίδ αβιλό βασιλιάς, αντικάς σαρ βακερντάας ο Ιεχωβά.

Αφού αβιλό βασιλιάς, ο Δαβίδ μανγκέλας μπουτ τι κερέλ εκ ναός ι Ιεχωβάσκε. Όμως, ο Ιεχωβά βακερντάς λέσκε ότι κα χτίνελας-λες εκ κατά τσσαβέ σο κα κερέλας. Τελικά, οντουβά σο κερντάς ο ναός ισινέ ο Σολομών, λέσκο τσσαβό. Ο Ντεβέλ, όμως, ευλογιντάς τον Δαβίδ με εκ μπουτ σημαντική συμφωνία σο κερντάς λέσαρ: Κατά Δαβίδ κα αβένας μπουτ βασιλιάδες σο κα κυβερνίνενας ο εκ παλάλ κατά γιαβέρ. Ντα τελικά, λένταρ κα αβέλας Οντουβά σο κα ελευθερώνελας ι τζενέν, ή γιαβέρτουλους ο Προσάγγονος, οντουβά σο βακερντάας ο Ιεχωβά κι Εδέμ. Βοβ κα αβέλας ο Μεσσίας, δηλαδή ο Χριστός, σο μανγκέλα τι βακερέλ οντουβά σο τσσουντάς-λες ο Ντεβέλ. Ο Ιεχωβά ντινάς πο λάφι ότι ο Χριστός κα αβέλας ο Βασιλιάς σο κα κυβερνίνελας εκχέ Βασιλειάτε σο κα ατσσόλας για πάντα.

Για τι ευχαριστίνελ ι Ντεβλές, ο Δαβίδ γκιντιντάς μπουτ χρυσάφι ντα ασήμι, αλλά γιαβερά-ντα πράγματα για τι χτίντιβελ ο ναός. Επίσης, γραφιντάς μπουτ ύμνους. Αντιβές μπορίνασα τι αρακχάς οντουλά ύμνοι κο βιβλίος κι Γραφιάκο σο βακέρντιβελα Ψαλμοί. Μήπως ο Δαβίδ κορκορό νικαντάς οντουλά ύμνοι; Όχι, ο ίδιος βακερντάς: «Ο πνεύμας ι Ιεχωβάσκο κερντάς λάφι μέσω μάνταρ ντα λέσκο λάφι ισινέ μι τσσιμπάτε».​—2 Σαμουήλ 23:2.

​—Στηρίντιβελα κο βιβλία 1 Σαμουήλ, 2 Σαμουήλ, 1 Χρονικών, ντα κο εδάφια Ησαΐας 9:7· Ματθαίος 21:9· Λουκάς 1:​32· Ιωάννης 7:42.