SAMSONI wati wafwa, Samuele wangwamba kuteŵete nge mchimi mu Yisraele. Ayisraele angulutirizga kumupempha kuti aje ndi fumu kuti yiŵawusengi nge po yenge mitundu inyaki. Pemphu ili, linguguŵiska Yehova chifukwa chakuti iyu ndiyu wenga fumu yawu, kweni wangukambiya Samuele kuti wavwiyi vo Ayisraele amupemphanga. Chiuta wangusankha munthu wakujiyuyuwa zina laki Sauli kuti waje fumu. Pati pajumpha nyengu, Fumu Sauli yingwamba kujikuzga ndipuso yinguleka kuvwiya. Yehova wangumukana Sauli kuti waje fumu ndipu wangukambiya Samuele kuti wasankhi fumu inyaki. Yo wangusankhika wenga mnyamata zina laki Davidi. Kweni pangujumpha vyaka vinandi kuti Davidi wayambi kuwusa nge fumu.

Nyengu yo Davidi wenga mnyamata, wanguluta kuchiwona aku ŵaki wo ateŵetiyanga mu gulu lankhondu laku Sauli. Gulu losi lankhondu linguchita mantha ndi murwani yimoza wakofya zina laki Goliati. Iyu waŵanyozanga ndipuso wanyozanga Chiuta wawu. Mwakukwiya, Davidi wanguzomera kuchikumana ndi Goliati ku malu nga nkhondu ko wenga. M’nyamata uyu, wanguto waka fyata ndi mya yimanavi ndipu wanguluta kuchikumana ndi murwani waki yo wenga mutali pafufupi mamita ngatatu. Goliati wati wamunyoza, Davidi wangumuka kuti wenga ndi vidya vamampha va nkhondu kuluska vaki, chifukwa iyu warwanga nkhondu mu zina laku Yehova Chiuta. Ndipu Davidi wangubaya Goliati ndi mwa umoza pe, pavuli paki wangumudumuwa mutu ndi lipanga lakumweneku. Ankhondu a Chifilisti ŵenga ndi mantha ndipu anguthaŵa.

Pakwamba Sauli wangukondweseka ndi chiganga chaku Davidi ndipu wangumuŵika kuti wawoneriyengi asilikali ŵaki. Kweni kupunda kwaku Davidi kunguchitisa kuti Sauli waje ndi sanji yikulu. Davidi wanguthaŵa kuti wataski umoyu waki ndipu wajanga umoyu wakuthaŵathaŵa kwa vyaka vinandi. Chinanga wuli venga viyo, Davidi wangulutirizga mbwenu kugomezgeka kwaku Sauli chinanga kuti wakhumbanga kumubaya, chifukwa waziŵanga kuti Chiuta ndiyu wangusankha Sauli kuti waje Fumu. Pakumaliya paki Sauli wangufwa ku nkhondu. Sauli wati wafwa waka, Davidi wanguja fumu nge mo Yehova wangulayizgiya.

Nge fumu, Davidi wakhumbisiskanga ukongwa kuti wazengi nyumba yakusopiyamu yaku Yehova. Kweni Yehova wangukambiya Davidi kuti yumoza wa ŵana ŵaki, ndiyu wazamuzenga nyumba yo. Ndipu Solomoni mwana waku Davidi ndiyu watingi wazizengengi nyumba yakusopiyamu. Chiuta wangumutumbika Davidi mwa kuchita nayu phanganu lakukondwesa lakuti: M’banja laki ndimu mutuliyengi fumu yakuluska mafumu ngosi. Pakumaliya, banja lo latingi lizituzgengi Mtaski pamwenga Mbewu yo yingulayizgika mu Edene. Mphapu yeniyo yinguzija Mesiya, kung’anamuwa kuti “Wakupakika,” yo wakusankhika ndi Chiuta. Yehova wangulayizga kuti Mesiya wazamuja Wakuwusa boma pamwenga Ufumu wo wazamuja kwamuyaya.

Chifukwa cha kuwonga, Davidi wanguwunganiska vidya vinandi ndipuso golidi ndi siliva wakuti azenge nyumba yakusopiyamu. Iyu wangulemba so sumu zinandi zakukondwesa. Ndipu wepafupi kufwa, Davidi wangukamba kuti: “Mzimu wa Ambuya urongorore mwangu, mazu ghake ghe pa lilimi langu.”​—2 Samuele 23:2.

​—Nkhani iyi yatuliya pa 1 ndi 2 Samuele; 1 Mikoka; Yesaya 9:7; Mateyu 21:9; Luka 1:32; Yohane 7:42.