TSAʼAN ja cham ja Sansoni, jun winik sbʼiʼil Samuel aʼtiji jastal jwes sok aluman ja bʼa Israeli. Ja israʼelenyoʼiki yalawe yabʼ ja Samueli wanbʼi skʼana jun smandaranume, pes yujni ja tuk chonabʼiki naka ayni yiʼoje june. Anke ja Jyobaji mini lek yabʼ ja jas skʼanaweʼi, och akwerdo sok yala yabʼ ja Samueli aya och mandaranumil ja Sauli. Ja Sauli jelni nux xyaʼa sbʼaj ajyiʼa, pe, yajni ekʼ ja tyempo jel niwan kʼe skʼul sbʼaj sok skʼoko ja smandar ja Dyosi. Jachuk ja Jyobaji mixani lek yila jastal mandaranum ja Sauli, ja yuj yala yabʼ ja Samueli aya och jastal slokʼol ja Sauli jun kerem sbʼiʼil David. Pe, ojtoni ekʼ jitsan jabʼil bʼa oj kʼe ya mandar ja kerem jaʼwa.

Jun kʼakʼu, ja Davidi waj yulatay ja sbʼankil jumasaʼ wane aʼtel jastal skʼakʼanum ja Sauli. Yajni kʼoti yila ja kʼakʼanum jumasaʼ xkʼitʼkʼuniye yuj ja xiweli. ¿Jas yuj? Yujni jun niwan winik, jun kʼakʼanum bʼa Filistea, sbʼiʼil Goliat wa stselay sok wa skʼenay ja kakʼanumik bʼa Israeli sok ja sDyoseʼi. Ja Davidi jelni kʼe yolom yajni yabʼ ja jaw, ja yuj yala oj tiroʼanuk sok ja niwan winik iti, chikan maʼ chami. Yaman yuj jun yal sjimichʼ sok chabʼ oxe yal ton, ja yal kerem it wa staʼ ja niwan skontra, ja xchaʼanil ja skontraʼi jun maʼ oxe metro. Ja Goliati stselay ja yal skontraʼi. Pe, ja Davidi yala masni chapan ay ja yeʼn, pes ojni tiroʼanuk bʼa sbʼiʼil ja Jyobaji. Ja Davidi kechanta ya makunuk jun ton bʼa oj ya ko luʼum ja niwan skontraʼi. Sok jata ya makunuk ja yespada ja Goliati bʼa oj skʼuts yiʼ ja s-olomi. Yajni yilawe ja kʼakʼanum bʼa Filistea ja jas ekʼi, spakawe ajnel yuj ja xiweli.

Ja Sauli jelni cham skʼujol ja yuja mix xiw ja Davidi sok ya ochuk jastal olomal ja bʼa skʼakʼanumi. Pe, ja Sauli kʼe kʼajbʼuk ja skʼujol yuja skoraja ja yajni kʼe aljuk ja Davidi jel skʼulunej ganar tiroʼanel yuj ja yeʼn. Ja Davidi spakani ajnel bʼa mi oj miljuk yuj ja Sauli, sok jitsan jabʼil snakʼa ekʼ sbʼaj. Pe, ja Davidi mini yaʼ kanyi spatik ja Saula. ¿Jas yuj? Yujni wa snaʼa ja Jyobaji yeʼn yaʼunej ochuk mandaranumil ja Sauli. Ekʼa kʼakʼuji, ja Sauli milji bʼa jun kʼakʼanel. Anto, ja Davidi yeʼnxa och kan mandaranumil, jastal ni yalunej ja Jyoba oj ekʼuk.

Ja Davidi jelni sgusto oj skʼul yi jun stemplo ja Jyobaji. Pe, ja Dyosi yala yabʼ ja Davidi mini yeʼn oj skʼuluk ja aʼtel jaw, jani oj skʼul june ja yuntikili. Yeʼnani waj ja Salomoni. Ama mi yeʼn oj skʼuluk ja templo, ja Jyobaji yaʼ yi jun niwan smajtan ja Davidi, yaʼa kulan sok ja trato it: ja bʼa spamilya ojni el jitsan mandaranum sok mini maʼ oj slaj ja jastal oj yaʼe mandara. Chomajkil, tini oj el tiw ja Intil kʼapubʼali ma ja Koltanum skʼapa ja Dyos bʼa Edeni. Ja winik jaw yeʼnani oj wajuk ja Mesiasi, wa stojolan «ja maʼ Tsaʼubal» yuj ja Dyosi. Ja Jyobaji yala ja Mesías it oj och jastal Mandaranum bʼa jun gobyerno mi oj chʼay snajel.

Yuj wa xyaʼ yi tsʼakatal sok spetsanil skʼujol ja Dyosi, ja Davidi stsomo jitsan jastik junuk oj makunuk bʼa skʼulajel ja templo sok stsomo jitsan plata sok oro. Chomajkil, ja Davidi yuj ja yip ja Dyosi stojbʼes jitsan salmo, ma tsʼebʼoj jumasaʼ bʼa stoyjel ja Jyobaji. Ja yeʼn jani ya niwanbʼuk ja Dyosi yuja jastik skʼulan ja bʼa sakʼanili, pes yajni mojanxa oj chamuki yala: «Ja yip ja Jyobaji yeʼnani ya makunuk ja jtiʼi, soka jas oj yali tini ajyi bʼa kakʼ» (2 Samuel 23:2).

(Akʼubʼal eluk bʼa 1 bʼa Samuel, 2 bʼa Samuel, 1 Crónicas, Isaías 9:7, Mateo 21:9, Lucas 1:32 sok bʼa Juan 7:42.)