HAN mamatay hi Samson, hi Samuel an nagin propeta ngan hukom ha Israel. Pirme hiya ginsisidngan han mga Israelita nga karuyag nira magkaada hin hadi pariho ha iba nga nasud. Bisan kon ini nga hangyo nakapasubo kan Jehova, iya ginsugo hi Samuel nga sundon ito. Ginpili han Dios an mapainubsanon nga hi Saul nga magin hadi. Kondi ha urhi, hiya nagin mapahitas-on ngan matinalapasnon. Salit, iginsalikway hiya ni Jehova sugad nga hadi ngan ginsidngan hi Samuel nga magpili hin iba​—an batan-on nga hi David. Kondi, malabay anay an mga tuig antes magin hadi hi David.

Posible nga han tinedyer pa hi David, ginbisita niya an iya kabugtoan nga mga sundalo ni Saul. Hito nga takna, an ngatanan nga kasundalohan may nahahadlokan nga kaaway​—hi Goliat nga usa nga higante—nga padayon nga nagtatamay ha ira ngan ha ira Dios. Nasina hito hi David, salit iya ginkarawat an pangayat ni Goliat. Labyog la ngan pipira nga bato an dara ni David han makigkita hiya hini nga higante nga sobra noybe piye an kahitaas. Han gintamay hiya ni Goliat, binaton hiya nga mas nasangkapan hiya tungod kay nakikig-away hiya ha ngaran ni Jehova nga Dios! Ginpatay ni David hi Goliat pinaagi hin usa la nga bato ngan katapos ginpugotan ito gamit an espada mismo han higante. Nahadlok an Pilisteohanon nga kasundalohan salit nandadlagan hira.

Ha siyahan, gindayaw ni Saul an kaisog ni David ngan gintagan hi David hin katungdanan ha pagpanguna han iya kasundalohan. Kondi tungod han mga kadaogan ni David, naawa hinduro hi Saul. Tungod hito, kinahanglan pumalagiw hi David basi panalipdan an iya kinabuhi, ngan magkinabuhi sugad nga puga ha sulod hin mga tuig. Bisan pa hito, nagpabilin hiya nga maunungon ha hadi nga nag-iiparatay ha iya, ginhunahuna niya nga hi Jehova an nagpili kan Saul sugad nga hadi. Ha urhi, namatay hi Saul ha away. Waray pag-iha, nagin hadi hi David, sugad han iginsaad ni Jehova.

Sugad nga hadi, hingyap gud ni David nga magtukod hin templo para kan Jehova. Kondi, hi Jehova nagsiring nga usa han iya katulinan an magtutukod hito. Ito amo an iya anak nga hi Salomon. Bisan pa hito, ginbalosan han Dios hi David pinaagi hin usa nga makalilipay nga saad: An iya la pamilya, ngan waray na gud iba, an pagtitikangan hin dinastiya hin mga hadi. Ha kataposan, dida magtitikang an Manluluwas, o Binhi, nga iginsaad ha Eden. Ito nga usa amo an Mesias, nga nangangahulogan hin “Dinihogan nga Usa,” an ginpili han Dios. Nagsaad hi Jehova nga an Mesias an magigin Magmarando han gobyerno, o Ginhadian, nga magpapabilin ha waray kataposan.

Tungod kay mapasalamaton gud hi David, nagtirok hiya hin damu hinduro nga materyales ngan presyoso nga metal para ha pagtukod han templo. Nagkomposo liwat hiya hin damu nga giniyahan nga salmo. Han tikamatay na hi David, hiya nagsiring: “An Espiritu ni Jehova naghimangraw pinaagi ha akon, ngan an iya pulong nakada han akon dila.”​—2 Samuel 23:2.

​—Iginbasar ha 1 Samuel; 2 Samuel; 1 Kronikas; Isaias 9:7; Mateo 21:9; Lukas 1:32; Juan 7:42.