KI MANNYER lavi ti pou ete, si en nasyon antye ek son dirizan ti swiv Zeova konman zot Souvren e obeir Son lalwa? Larepons sa kestyon ti evidan pandan sa 40 an ki Salomon ti dirize konman lerwa.

Avan ki i ti mor, David ti swazir Salomon konman son sikseser. Dan en rev, Bondye ti demann Salomon ki i ti a kontan gannyen. Salomon ti demande pour ganny lasazes ek konnesans pour kapab ziz lepep dan en fason zis e avek lasazes. Zeova ti vreman kontan e i ti donn Salomon lasazes ek konprenezon. Zeova ti osi promet ki i ti pou donn li larises, laglwar ek en lavi pli long si i ti kontinyen obeir li.

Salomon ti vin popiler akoz i ti ziz avek lasazes. Dan en ka, de madanm ti pe dispit konsernan en pti baba, zot tou le de zot ti dir ki se zot manman sa zanfan. Salomon ti donn lord pour ki sa pti garson i ganny koupe an de pour donn zot de sakenn en bout. Sa premye madanm ti dakor, me deswit sa vre manman ti sipliye pour donn sa lot madanm sa pti baba. Salomon ti vwar klerman ki sa madanm ki ti annan konpasyon ti sa vre manman e alor i ti donn li son pti garson. Pa bokou letan apre, Izrael antye ti tann konsernan sa zizman e bann dimoun ti rekonnet ki lasazes Bondye ti avek Salomon.

Enn parmi bann pli gran lakonplisman Salomon ti konstriksyon tanp Zeova ki ti en zoli batiman Zerizalenm e ki ti pou ganny servi konman sant ladorasyon dan Izrael. Kot linogirasyon tanp, Salomon ti priye: “Gete! Lesyel li menm, wi dan lesyel bann lesyel ou pa kapab reste; alor ki nou pou dir lo lakaz ki mon’n batir pour ou?”—1 Lerwa 8:27.

Dimoun dan lezot pei ti tann koz lo Salomon, menm ziska Seba, an Arabi. Larenn Seba ti vwayaze pour vwar splander ek larises Salomon e osi pour vwar ki degre saz i ti ete. Sa larenn ti vreman enpresyonnen par lasazes Salomon ek prosperite Izrael, ki i ti loue Zeova pour lapenn i ti’n plas en lerwa sitan saz lo tronn. I vre, avek benediksyon Zeova, renny Salomon ti sa renny pli prospere e anpe dan listwar ansyen Izrael.

Malerezman, Salomon pa ti reisi kontinyen azir an armoni avek lasazes Zeova. I ti dezobeir komannman Bondye, i ti marye avek plizyer santenn madanm, ki bokou parmi ti ador bann bondye etranze. Ptitapti, son bann madanm ti fer li elwannyen avek Zeova e ador bann zidol. Zeova ti dir Salomon ki i ti pou ganny arase en parti sa rwayonm. Bondye ti dir ki zis en parti ki ti pou reste dan son fanmir akoz sa promes ki i ti’n fer avek son papa David. Menm si Salomon ti dezobeir e aret servi Li, Zeova ti reste fidel anver son lalyans avek David konsernan en Rwayonm.

—Baze lo 1 Lerwa sapit 1 a 11; 2 Kronik sapit 1 a 9; Deterononm 17:17.