YOG tias ib tug vajntxwv thiab nws cov pejxeem, cia Yehauvas ua tus kav lawv, thiab lawv ua raws li Yehauvas tej kevcai, lawv lub neej yuav zoo li cas xwb? Lub sijhawm Vajntxwv Xalaumoo kav cov Yixayee tau 40 xyoo, tau muaj li ntawd. Cia peb kawm seb lawv lub neej zoo li cas.

Ua ntej Davi yuav tuag, Davi tsa nws tus tub Xalaumoo ua vajntxwv hloov nws chaw. Muaj ib hmos, Xalaumoo ua npau suav pom Vajtswv los nug seb Xalaumoo xav tau dabtsi. Xalaumoo thov Vajtswv pub tswvyim thiab kev txawj ntse rau nws, kom nws paub txiav txim ncaj rau cov pejxeem. Yehauvas txaus siab heev rau Xalaumoo. Yehauvas thiaj li pub Xalaumoo muaj laj lim tswvyim thiab muaj kev thoob tsib. Yehauvas kuj cog lus tias yog Xalaumoo mloog lus, ces Yehauvas yuav pub nws muaj nyiaj txiag, muaj koob meej, thiab muaj txojsia nyob ntev.

Xalaumoo nto moo heev vim nws muaj tswvyim tu plaub ntug. Muaj ib zaug, Xalaumoo tu plaub rau ob tug pojniam uas sib txeeb ib tug menyuam mos. Xalaumoo hais kom muab tus menyuam phua ob sab rau ob tug pojniam ntawd, ib leeg ib sab. Thawj tug pojniam pom zoo ua li ntawd, tiamsis leej niam tiag tiag tsis kam. Nws thov kom Xalaumoo muab tus menyuam pub rau thawj tug pojniam. Thaum Xalaumoo pom li no, nws paub tseeb tias tus pojniam uas mob siab txog tus menyuam ntawd, yog leej niam tiag tiag. Yog li ntawd, nws thiaj li muab tus menyuam rau tus pojniam ntawd. Tsis ntev tom qab ntawd, tag nrho ib tsoom Yixayee hnov txog qhov no. Lawv thiaj pom tias Xalaumoo muaj Vajtswv lub tswvyim tiag.

Ib yam zoo tshaj plaws uas Xalaumoo tau ua yog Yehauvas lub tuam tsev. Lub tsev ntawd, zoo nkauj kawg nkaus li thiab nyob rau hauv Yeluxalees. Cov Yixayee tuaj pe hawm Yehauvas ntawm lub tuam tsev no. Thaum lawv muab lub tuam tsev cob rau Yehauvas, Xalaumoo thov Vajtswv tias: “Saib maj, txawm yog saum nruab ntug thiab nruab ntug uas siab kawg nkaus los twb tsis txaus rau koj nyob. Mas lub tuam tsev uas kuv ua no yimhuab tsis txaus rau koj nyob.”​—1 Vajntxwv 8:27.

Xalaumoo lub koob meej nrov ncha mus deb heev, kuj txog Senpa thiab. Senpa nyob rau hauv tebchaws Alanpia. Tus poj vajntxwv uas kav Senpa thiaj tuaj saib seb Xalaumoo muaj koob meej, muaj nyiaj txiag, thiab muaj tswvyim npaum li cas tiag. Tus poj vajntxwv pom tias Xalaumoo muaj tswvyim heev, thiab cov Yixayee muaj nplua mias. Nws thiaj qhuas Yehauvas rau qhov Yehauvas tau tsa ib tug vajntxwv muaj tswvyim kawg li los kav. Yog li ntawd, vim Yehauvas foom koob hmoov rau Xalaumoo, cov Yixayee thiaj muaj nplua mias thiab muaj kev thaj yeeb. Tsis tau muaj kev vam meej npaum li ntawd hauv Yixayee tebchaws ib zaug li.

Tiamsis tom qab no, Xalaumoo tsis coj raws li Yehauvas lub tswvyim. Nws tsis quav ntsej Vajtswv tej lus sam hwm, nws thiaj yuav ntau pua tus pojniam. Coob tus pe hawm tej vajtswv cuav. Ntev mus Xalaumoo cov pojniam ntxias tau kom nws tso Yehauvas tseg thiab mus pe dab pe mlom. Yehauvas thiaj hais rau Xalaumoo tias, nws yuav muab lub nceeg vaj faib thiab tseg ib feem rau Xalaumoo tsev neeg kav xwb. Vim li cas Yehauvas ho tseg ib feem cia li no? Vim nws nco ntsoov nws tej lus cog tseg rau Davi. Txawm tias Xalaumoo tsis mloog lus los, Yehauvas tseem ua raws li nws tej lus cog tseg rau Davi, txog lub Nceeg Vaj.

Zaj no muaj nyob rau hauv 1 Vajntxwv tshooj 1 txog 11; 2 Vaj Keeb Kwm tshooj 1 txog 9; Kevcai 17:17.