Abọ 10

Solomọn—Ovie nọ O Wo Areghẹ

Jihova ọ kẹ Solomọn Ovie na areghẹ; evaọ etoke esuo riẹ, ahwo Izrẹl a reawere udhedhẹ gbe ọruẹriọ vi epaọ anwẹdẹ kpobi

ẸVẸ eware e rẹ jọ nọ orẹwho soso gbe osu riẹ a te bi yoẹme kẹ Jihova wọhọ Osu nọ ọ mai kpehru je bi lele izi riẹ? A jọ etoke esuo ikpe udhuvẹ Solomọn ruẹ uyo onọ nana.

Re Devidi o te whu, ọ rehọ ọmọ riẹ Solomọn mu ovie nọ ọ te rehọ ẹta riẹ. Nọ Solomọn ọ jọ ewezẹ, Ọghẹnẹ ọ tẹ ta kẹe inọ ọ yare oware nọ ọ gwọlọ kpobi mi ei. Solomọn ọ yare areghẹ gbe eriariẹ nọ o re ro bruoziẹ ahwo nọ a rrọ otọ esuo riẹ ziezi. Onana o were Jihova gaga, ọ tẹ kẹ Solomọn areghẹ gbe orimuo. Jihova ọ tẹ jẹ ya eyaa kẹe inọ ọ te kẹe efe, oruaro, gbe uzuazọ uthethei nọ o te yoẹme kẹe.

A tẹ te riẹ Solomọn evaọ oria kpobi wọhọ ovie nọ o re bruoziẹ areghẹ gaga. Ẹdẹjọ, eyae ivẹ jọ a te je hrowo ọmọzae ọboba jọ, ọjọ nọ ọye o wo rie, ọdekọ nọ ọmọ na ọriẹ. Solomọn ọ tẹ ta nọ a bru ọmọ na ibro ivẹ re aimava a rehọ ọvuọ ubro riẹ. Aye ọsosuọ ọ rọwo, rekọ oni nọ o gine wo ọmọ na o te bo ẹsiẹvo inọ a bru ọmọ na ha, inọ ukpoye jọ a rehọ iẹe kẹ aye ọdekọ na. Ohrọ aye nana u ru Solomọn ruẹ vevẹ inọ ọye o gine wo ọmọ na, ọ tẹ rọ ọmọ na kẹe. Izrẹl soso o te ti yo kpahe ẹdhoguo nana, aikpobi a tẹ ruẹ vuhumu inọ Solomọn o wo areghẹ nọ o no obọ Ọghẹnẹ ze.

Oware ulogbo jọ nọ Solomọn o ru evaọ etoke esuo riẹ họ, ebabọ etẹmpol Jihova—uwou ulogbo evaọ Jerusalẹm nọ o rẹ te jọ oviede egagọ Jihova evaọ Izrẹl. Nọ a jẹ rọ etẹmpol na mudhe, Solomọn ọ jọ olẹ ta nọ: “Riri, odhiwu gbe odhiwu nọ o kpehru vievie e rẹ gba owhẹ hẹ; kabikọ uwou nana nọ mẹ bọ na!”—1 Ivie 8:27.

Odẹ Solomọn u te ti do ruọ erẹwho efa, makọ rite Shiba, ẹwho obọ Arebia. Ovie-aye obọ Shiba ọ tẹ nyae ruẹ oruaro gbe efe Solomọn, re ọ jẹ dawo epanọ areghẹ riẹ o kpehru te. Areghẹ Solomọn gbe ọruẹriọ nọ ọ jọ ẹkwotọ Izrẹl u gbe ovie-aye na unu te epanọ o ro jiri Jihova fiki ohwo owareghẹ otiọye nọ ọ salọ re ọ jọ ovie. Evaọ uzẹme, esuo Solomọn họ onọ ọruẹriọ gbe udhedhẹ o mae dafia evaọ ikuigbe Izrẹl anwae fiki oghale Jihova.

U yoma kẹhẹ, Solomọn ọ rehọ areghẹ Jihova yeri uzuazọ te urere he. Ọ ghẹmeeyo kẹ uzi Ọghẹnẹ, ọ tẹ rehọ eyae buobu, nọ ibuobu rai e jẹ gọ eghẹnẹ erue. Ẹmẹrera na eyae riẹ a tẹ kpọ udu riẹ no egagọ Jihova nyae gọ emedhọ. Jihova Ọghẹnẹ ọ tẹ ta kẹ Solomọn inọ a ti mi ei abọjọ uvie na, nyasiọ amabọ jọ ọvo ba kẹ uviuwou riẹ fiki Devidi ọsẹ riẹ. Dede nọ Solomọn o yoẹme kẹ Jihova te urere he, Jihova o ru lele ọvọ Uvie nọ ọ re kugbe Devidi.

—Wọhọ epanọ o rrọ obe Ivie Ọsosuọ uzou 1 rite orọ avọ 11; obe Iruẹru-Ivie Avivẹ uzou 1 rite orọ avọ 9; Iziewariẹ 17:17.

◼ Eme Ọghẹnẹ o ru kpahe ayare Solomọn?

◼ Ẹvẹ Solomọn o ro dhesẹ via nọ o wo areghẹ?

◼ Ẹvẹ Solomọn ọ rọ nyasiọ Jihova ba, kọ eme o no rie ze?

Omaa-iruo nọ e rrọ ẹwẹ-obe avọ 13]

Emuhọ

Ọnyano

Iruo-Izerẹ

Ikelakele

Iziewariẹ

Joshua

Ibruoziẹ

Rut

1 Samuẹle

2 Samuẹle

1 Ivie ●

2 Ivie

1 Iruẹru-Ivie

2 Iruẹru-Ivie ●

Ẹzra

Nehemaya

Ẹsta

Job

Ilezi

Itẹ

Ọtausiuwoma Na

Ole nọ O Vi Ile

Aizaya

Jerimaya

Enuobro

Izikiẹl

Daniẹl

Hosia

Joẹl

Emọs

Obedaya

Jona

Maeka

Nahum

Habakuk

Zefanaya

Hagai

Zekaraya