¿NDIXI ví kandoyi na̱yivi tá iin níí ñuu na̱ xíʼín ta̱ néʼe chuun nuu̱ ná, ná kukuu na na̱yivi ndaa̱ nuu̱ Jeová Ndio̱s ta ná kunijo̱ʼo na chuun saʼndá si? Tá ni̱ saʼnda Salomón chuun uvi̱ xiko kuia̱ jaá ni̱ naʼa̱ ndixi kandoyi na.

Tá kúmani̱ kivi David já ni̱ ja̱yáʼa ra̱ chuun ni̱ si̱neʼe ra nu̱ú de̱ʼe ra Salomón. Iin kivi̱ ti̱xi iin sa̱ni ni̱ kaʼa̱n Ndio̱s xíʼín Salomón ña̱ ná kaka̱ ra̱ ndíki̱án kúni̱ mií vá rá nuu̱ sí. Ta ni̱ sika̱ Salomón ña̱ ndichí nuu̱ Ndio̱s, já ná kandaa̱ ini ra ndixi kuu kaja ndaa̱ ra chuun. Ni̱ na̱taʼan ini Jeová Ndio̱s ña̱ ni̱ sika̱ ra̱ nuu̱ sí, ta ni̱ si̱ʼa si ña̱ ni̱ sika̱ ra̱. Ta ni̱ kachi Ndio̱s xíʼín rá ña̱ jaá ní ki̱ʼa si ña̱ kui̱ká nuu̱ rá, ta kua̱ʼá na̱yivi kasini̱ na̱ saʼa̱ rá, ta naʼá ndiva̱ʼo koo ra tá ná kunijo̱ʼo ra chuun saʼndá si.

Sa̱ʼá ña̱ ndichí ni̱ si̱io Salomón, kuaʼa̱ ná ni̱ si̱síni̱ na saʼa̱ rá. Iin kivi̱ ni̱ saa̱ uvi̱ na̱ ñáʼa̱ nu̱ú nákaa̱ Salomón jáchi̱ naá na̱ saʼa̱ iin leé, ndindiví na kachí na ña̱ de̱ʼe na kúú na̱ leé yóʼo. ¿Ndíki̱án ni̱ kee Salomón? Ni̱ kachi Salomón ña̱ ná kaʼnda java na leé yóʼo, ta ná ki̱ʼo na iin ñaʼni xi nuu̱ iin iin na̱ ñáʼa̱ yóʼo. Iin ñá ñáʼa̱ yóʼo ni̱ kachián ña̱ va̱ʼa va ná kaʼnda na na̱, jo ñá kúú ndisa naná leé yóʼo ni̱ sika̱ndaʼví ñá ña̱ va̱ʼa ka̱ ná ki̱ʼa na leé yóʼo nuu̱ ñá ni̱ kaʼa̱n xinañúʼú. Yóʼo kúú nu̱ú ni̱ ka̱ndaa̱ kásí ini Salomón ña̱ ñá ni̱ si̱io ndaʼví ini saʼa̱ leé yóʼo ñá yóʼo kúú ndisa naná na̱, ta ni̱ si̱ʼa ra leé yóʼo nuu̱ ñá yóʼo. Tá ni̱ niʼi̱ na̱ ñuu Israel tu̱ʼun ña̱ jaá ni̱ si̱io jaá kía̱n ni̱ ka̱ndaa̱ ini na ña̱ Ndio̱s kúú ta ni̱ si̱ʼa ña̱ ndichí nuu̱ Salomón.

Iin ña̱ káʼno chááka̱ ni̱ kee Salomón yóʼo ni̱ si̱kuu iin veʼe káʼno ni̱ ka̱va̱ʼa ra nuu̱ ñuu Jerusalén, nu̱ú ni̱ si̱kandañu̱ʼu na̱ ñuu Israel Jeová Ndio̱s. Tá kivi̱ ni̱ ka̱sáʼá káchúun na veʼe yóʼo, ni̱ sika̱taʼvi̱ Salomón nuu̱ Ndio̱s ta ni̱ kachi ra: “¡Kunde̱ʼé ní! Indiví nu̱ú ió ní o̱ju̱ú ña̱ káʼno kíán nuu̱ ní víʼa̱ ka̱ ví veʼe lóʼo̱ ni̱ ka̱va̱ʼa yuʼu̱” (1 Reyes 8:27).

Kua̱ʼá na̱yivi ni̱ si̱síni̱ na̱ saʼa̱ Salomón ta ni̱ niʼi̱ ná tu̱ʼun saʼa̱ Salomón nuu̱ java ka̱ ñuu si̱ká naní Seba ña̱ kúú iin sio Arabia. Sa̱ʼá ña̱yóʼo ni̱ saʼa̱n ñá reina ñuu ikáa já kande̱ʼé ñá á ndaa̱ ndisa kuíká Salomón, ta kande̱ʼé ñá á ndaa̱ ndisa ndichí ra̱. Ni̱ naá ndiva̱ʼo ini ñá ni̱ kee Salomón ña̱káa ni̱ kaʼa̱n va̱ʼa ñá saʼa̱ Jeová Ndio̱s ña̱ ni̱ ka̱si si iin ta̱ rey ndichí ndiva̱ʼo. Kuia̱ ni̱ si̱neʼe Salomón chuun, ni̱ si̱kuu kuia̱ va̱ʼa chááka̱ ta vií chááka̱ ni̱ si̱ndoyi na̱ ñuu Israel sa̱ʼá ña̱ ni̱ kee̱ máni̱ ñaʼá Ndio̱s.

Va̱árá ta̱ ndichí ni̱ si̱kuu Salomón jo o̱ju̱ú nditáʼa̱n kivi̱ ní sinajo̱ʼo ra ña̱ ni̱ kaʼa̱n Jeová Ndio̱s xíʼín rá. Jáchi̱ ni̱ saʼnda Ndio̱s chuun, ña̱ ko̱ kánian koo kuaʼa̱ ñajiʼí ta̱ kúú rey, jo ko̱ ní sinajo̱ʼo ra chuun saʼndá Ndio̱s, ta ni̱ ta̱ndáʼa̱ rá xíʼín cientó na̱ ñáʼa̱ ta kua̱ʼá na̱yóʼo ni̱ si̱ keekáʼno na java ka̱ ndio̱s ña̱ ko̱ kúú Ndio̱s ndaa̱ ndisa. Cháá cháá ni̱ ja̱kúsíká na̱yóʼo Salomón nuu̱ Jeová Ndio̱s ta ni̱ ja̱síno̱ na̱ ini ra já ná keekáʼno ra toʼó. Sa̱ʼá ña̱yóʼo ni̱ kachi Ndio̱s xíʼín rá ña̱ o̱káneʼe ka̱ ra̱ chuun nuu̱ ndijaá na̱ ñuu Israel. Ta sa̱ʼá ña̱ ni̱ ka̱ndo̱o Ndio̱s kee si xíʼín David ta̱ ni̱ si̱kuu tatá Salomón yóʼo va ko̱ ní kíndaa si chuun nuu̱ ndáʼa̱ rá. Va̱árá ni̱ ya̱ʼa Salomón ni̱ kee ra kua̱chi kini nuu̱ Jeová Ndio̱s, jo kee tá kee i̱í vá Ndio̱s ña̱ ni̱ ka̱ndo̱o si kee si xíʼín David.

(Ña̱yóʼo va̱sian nuu̱ capítulo 1 nda̱ 11 1 Reyes, 2 Crónicas capítulo 1 nda̱ 9 xíʼín Deuteronomio 17:17.)