ACU ara yeḍrun lukan yiwen lǧens s lekmal-is akk-d uneḥkam-is ad qeblen Yahwa ad yili d agellid yerna ad ţţaɣen awal i leqwanen-is? D 40 n sna n leḥkem n Sliman ara d-yerren lǧawab i westeqsi-yagi.

Dawed yextaṛ, uqbel ad yemmet, mmi-s Sliman akken ad yuɣal d aneḥkam deg wemkan-is. Di yiwet n targit, Ṛebbi yeḍleb i Sliman a s-yessuter ayen yebɣa. Sliman yeḍleb lekyasa ţ-ţmusni akken ad yeḥkem akken i glaq ɣef wegdud. Annect-a yeεǧeb aṭas i Yahwa, dɣa yefka-yas lekyasa yerna-yas leεqel. Iεuhed-as daɣen a s-yefk ttrika, tamanegt (lεaḍima) ţ-ţeɣzi n leεmeṛ ma yeţţaɣ-as dima awal.

Ccan n Sliman yewweḍ mkul amḍiq imi iferru timsal s lekyasa. Yiwen wass, usant-ed snat tlawin ɣur-es s yiwen n llufan. Yal yiwet seg-sent teqqar belli d neţţat i d yemma-s n weqcic-nni. Sliman yefka ihi lameṛ akken ad yeţwagzem ɣef sin, w’ad fken azgen i yiwet azgen i tayeḍ. Yiwet teqbel, ma ţ-ţayeḍ tḥellel din din akken ad fken llufan-nni i tmeṭṭut-nni nniḍen. Swakka, Sliman yefhem belli ţ-ţameṭṭut-nni i gɣaḍ weqcic-nni i d yemma-s n ṣṣeḥ, dɣa yefka-yas-t. S lemɣawla, At Isṛayil meṛṛa yewweḍ-iten lexbaṛ n temsalt-agi. Steεṛfen irkulli belli lekyasa n Yahwa tella ger ifassen n Sliman.

Yiwet ger leḥwayeǧ akk yessewhamen i gexdem Sliman d lemqam n Yahwa di Yarucalim. Lemqam-agi d lebni yetεeddan ara yilin d amkan n leεbada i wat Isṛayil. Di tmeɣra i xedmen i wexxam-agi ajdid, Sliman yenna i Ṛebbi: “Atnan igenwan s yiman-nsen, ih igenni n igenwan, ur k-wwin ara, xelliεad ay axxam-agi i k-bniɣ!”—1 Igelliden 8:27.

Aṭas n tmura i yeslan s ccan n Sliman. Cciεa-s tewweḍ armi d yiwet n tgelda ibeεden, iţţusemman tagelda n Caba, i d-iṣebḥen di tmurt n Σarab. Tagelliṭ n Caba tṛuḥ akken aţ-ţwali lεaḍima d ttrika n Sliman yerna aţ-ţjeṛṛeb acḥal meqqret lekyasa-ines.Tameṭṭut-a tedhec seg wayen i twala, dɣa teḥmed Yahwa imi yerra ɣef ukersi n lḥekma agellid ukyis am neţţa. S lbaṛaka n Yahwa, leḥkem n Sliman yethedden yerna iεum di lxiṛ akteṛ akk n wiyaḍ seg wasmi i d-yeflali lǧens n Isṛayil!

Acu kan, Sliman yeǧǧa leţkal-nni yesεa di lekyasa n Ṛebbi. Ur yeḥriz ara lqanun n Yahwa, dɣa yezweǧ neţţa d xilla n tlawin. Gar-asent, llant waṭas i geţεebbiden iṛebbiten ibeṛṛaniyen. Ciṭ ciṭ, tilawin-agi ssebεdent ul-is ɣef Yahwa akken a t-awint ad yeεbed lmeṣnuεat. Yahwa yenna-yas ihi belli amur ameqran n tgelda-s a s-yeţwakkes. Kra kan si tgelda-ya ara yeqqimen ger ifassen n twacult-is i wudem n baba-s. Γas Sliman yeǧǧa Yahwa, Yahwa yeṭṭef di lemεahda yexdem neţţa d Dawed ɣef yiwet n tgelda.

—Ayagi yers ɣef 1 Igelliden ixef amezwaru alamma d wis 11; 2 Amezruy ixef amezwaru alamma d wis 9; Asmekti 17:17.