INUUNEQ qanoq issagaluarpa inuiaat tamarmik taakkualu naalakkersuisui Jehova Naalakkamissut kisimi oqartussaasutut isigalugu taassumunnga siulersortikkaluarpata taassumalu inatsisaanut naalakkaluarpata? Tamatumunnga akissut kunngip Salomop ukiuni 40-ni naalakkersuineranit erserpoq.

Daavip toqutinnani ernini Salomo kingoraartissamisut toqqarpaa. Guutip Salomo sinnattukkut kajumissaarpaa arlaannik kissaateqaqqullugu. Salomop ilisimassuseq silaqassuserlu qinnutigai naapertuilluartumik silatuumillu inunnik eqqartuussisinnaaqqulluni. Taama qinnuteqarnera Jehovap iluaraa, Salomolu uummatikkut ilisimassuseqalersillugulu silaqassuseqalersippaa. Jehovap aamma neriorsorpaa imminut naalattuarpat pisuunngortikkumallugu, ataqqisaatikkumallugu inuummersortikkumallugulu.

Salomop silatuumik eqqartuussisarnini tusaamasaassutigilerpaa. Ilaanni arnat marluk naalungiarsuk assortuussutigaat, marluullutik taassumunnga anaanaanerarlutik. Salomop naalungiarsuk marlunngorlugu aveqquaa arnallu taakku marluk immikkut affarmik tuneqqullugit. Aappaa isumaqataavoq, anaanaviusulli ingerlaannaq Salomo ilungersorluni qinnuigaa naalungiarsuk arnap aappaanut tunniuteqqullugu. Maanna Salomop paasilluarpaa arnaq misigittartoq anaanaasoq, nukappiararlu taassumunnga tunniuppaa. Sivitsunngitsoq Israelikkut tamarmik eqqartuussineq tamanna tusaamalerpaat, paasivaallu Salomop ilisimassusia Guutimeersuusoq.

Salomop suliaanut alutornarnerpaanut ilaavoq Jehovap naalaffianik sananera — Israelimi guutisiornermi qitiusussamik kusanartorsuarmik Jerusalemimi naalaffiliornera. Naalaffik atoqqaartinneqarmat Salomo ima qinuvoq: “Qilak qilaallu qilaat ilinnut najugassatut mikivallaareermata illu manna sanaara suli mikiginerujussuussavat!” — 1 Kunngit 8:27.

Salomo aamma nunani allani, allaat Arabiami Sabatut ungasitsigisumiittuni, tusaamaneqalerpoq. Sabap dronningia tikippoq Salomop naalannassusia pisuussutaalu takuniarlugit taannalu qanoq ilisimassuseqartiginersoq paasiniarlugu. Salomop ilisimassusia Israelikkullu pigissaartuunerat dronningip tupigusuutigingaaramigit Jehova unnersiutigaa taama silatutigisumik kunnginngortitsisimammat. Aap, Jehovap pilluaqqusineratigut Salomop naalakkersuinerata nalaa itsaq Israelimi oqaluttuarisaanermi pigissaarfiunerpaallunilu eqqissisimaffiunerpaavoq.

Ajoraluartumik Salomo Jehovap ilisimassusianut naapertuuttumik iliuuseqartuaannanngilaq. Guutip inatsisaa sumiginnarlugu arnat hundredelikkuutaat, ilaatigut guutinik allanik pallorfiginnittorpassuit, nuliartaarai. Nuliaasa taanna Jehovamik tunussisikkiartuaarpaat, guutipilussiulerporlu. Jehovap Salomo nalunaarfigaa naalagaaffiup ilaanik arsaarneqassasoq. Jehova oqarpoq Salomop angutaanut Daavimut neriorsuutini pissutigalugu naalagaaffiup ilaminiinnaa kinguaavisa pigiinnassagaat. Salomo tunussigaluartoq Jehova naalagaaffik pillugu Daavimik angerutsiminut ilumoorfiginnippoq.

— Tunngavigineqartut: 1 Kunngit kapitalit 1-11; 2 Nalunaarsuutit kapitalit 1-9; 5 Mosesi 17:17.