ҺӘРГЕ тʹәмамийа щьмәʹте у пʹадшайе ԝан гӧрʹа Йаһоԝа Хԝәде бькьрана у ԛанунед ԝи бьԛәдандана, әʹмьре ԝан ԝе чаԝа буйа? Ԝәʹде сәрԝертийа Сьлеманә 40 сали, щаба ве пьрсе әʹйан бу.

Пешийа мьрьна хԝә, Даԝьд кʹьфш дькә Сьлеман ча пʹадша. Хәԝнеда Хԝәде ԝирʹа хӧйа бу у жь ԝи пьрси, кӧ әԝи ԝе чь жь Хԝәде бьхԝәста. Сьлеман билани у занәбун хԝәст, ԝәки рʹаст у бь аԛьлайи диԝана щьмәʹте бькә. Хԝәстьна ԝи гәләк дьле Йаһоԝа хԝәш һат, ләма жи Йаһоԝа билани у сәрԝахти да ԝи. Хенщи ве йәке Йаһоԝа соз дабу ԝи, кӧ һәрге әԝ гӧрʹа ԝи бькә, әԝе навдарийе, һәбуне у әʹмьре дьреж бьстинә.

Сьлеман пе диԝанкьрьна хԝәйә бь аԛьлайи, бу йәки навдар. Щарәке, дӧ кʹӧлфәт һатьн щәм Сьлеман. Ԝана һәврʹа шәрʹ дькьр сәва кӧрʹәки тʹәзәбуйи. Һәр кәс жь ԝана дьгот, кӧ әԝ ә дийа зарʹоке. Сьлеман фәрман да, ԝәки зарʹе ортʹеда текьнә дӧ кәра, у һәр йәкерʹа кәрики бьдьне. Кʹӧлфәтәк ԛайил бу, ле әԝ кʹӧлфәта кӧ бь рʹасти дийа зарʹоке бу, дәстпекьр лавайа Сьлеман бькә ԝәки зарʹе бьдьнә кʹӧлфәта дьн, тʹәне нәкӧжьн. Һьнге Сьлеман пʹадша фәʹм кьр, ԝәки әв ә дийа зарʹокейә рʹаст. Әԝи зарʹ һьлда у да дийа ԝи. Ԝәʹдә шунда, тʹәмамийа щьмәʹта Исраеле пеһʹәсийа дәрһәԛа биланийа Сьлеман, у фәʹм кьр ԝәки биланийа ԝи жь Хԝәде бу.

Шьхӧлед Сьлемани лапи мәзьн, авакьрьна пʹарьстгәһа Йаһоԝа бу Оршәлимеда, кʹидәре кӧ Исраели дькарьбун Йаһоԝарʹа дӧа кьрана у ԛӧрбан жи ԝирʹа банийана. Сәр әʹйда вәкьрьна пʹарьстгәһе, Сьлеман дӧайед хԝәда Йаһоԝарʹа гот: «Ԝа әʹзмане-әʹзмана нькарьн тә щиԝар кьн, ле кʹӧ ма әԝ пʹарьстгәһ, йа кӧ мьн ава кьр» (1 Пʹадшати 8:27, ДТʹ).

Нав у дәнге Сьлеман гьһиштә гәләк щийед дур, һʹәта шәһәре Әʹрәбьстане у Шәбайе жи. Ханьм-пʹадшайа Шәбайе чу Оршәлиме, ԝәки бьвинә рʹумәт у дәԝләмәндтийа Сьлеман пʹадша, ӧса жи ԝәки пе пьрсед хԝәйә чәтьн ԝи бьщерʹьбинә. Чахе ханьм-пʹадша, биланийа Сьлеман у ӧса жи пешдачуйина Исраеле дит, әԝ гәләк әʹщебмайи ма у наве Йаһоԝа һӧрмәт кьр, кӧ пʹадшаки ӧса билан дайә сәр тʹәхт. Йаһоԝа сәрԝертийа Сьлеман кʹәрәм кьр у ләма жи нава тʹәрихийа Исраеле, тʹәне пʹадшатийа Сьлеманда әʹдьлайи у бәхтәԝари һәбу.

Йазьх ԝәки Сьлеман әԝ биланийа кӧ Хԝәде дабу ԝи, ԛимәт нәкьр. Әԝи гӧһ нәда ԛанунед Йаһоԝа у бь сәда жьн хԝәрʹа анин. Һʹәчʹи зәʹф жь ван жьна, хӧданед ԛәлпрʹа хьзмәт дькьрьн. Һеди-һеди ԝана дьле Сьлеман хьраб кьр у әԝ жь Йаһоԝа дур кʹәт. Әԝи дәстпекьр сәре хԝә бәр пʹута дайнә. Хԝәде готә Сьлеман, ԝәки ԝе пʹадшатийе ле бьстинә у тʹәне сәва хатьре Даԝьд, пʹарәкә бьчʹук ԝе бьһелә малбәта ԝирʹа. Рʹаст ә Сьлеман Хԝә де һишт, ле Йаһоԝа диса жи һьндава пәймана Пʹадшатийе амьн ма, йа кӧ тʹәви баве ԝи Даԝьд гьреда бу.

​—Сәр һʹиме кʹьтебед 1 Пʹадшати сәре 1 һʹәта 11; 2 Дирок сәре 1 һʹәта 9; Ԛануна Дӧщари 17:17.