စီၤပၤဒီးထံဖိကီၢ်ဖိခဲလၢာ် မ့ၢ်အၢၣ်လီၤတူၢ်လိာ်ဝဲ ယဟိဝၤယွၤဒ် တၢ်ပၢကစၢ်အဒိၣ်ကတၢၢ်အသိး ဒီးအဝဲသ့ၣ်မ့ၢ်လူၤပိာ်ထွဲ ကစၢ်အတၢ်မၤလိာ်တဖၣ်န့ၣ် အတၢ်အိၣ်မူကမၤအသးဒ်လဲၣ်. တၢ်စံးဆၢအံၤအိၣ်ဖျါဝဲဖဲ စီၤပၤၡလိၤမိၤပၢတၢ်အနံၣ် ၄၀ အတီၢ်ပူၤန့ၣ်လီၤ.

ဖဲစီၤဒၤဝံးတချုးသံအခါန့ၣ် ပာ်ထီၣ်ဝဲအဖိခွါစီၤၡလိၤမိၤလၢ အလီၢ်န့ၣ်လီၤ. ကစၢ်ယွၤလီၣ်ဖျါထီၣ်အသးလၢစီၤၡလိၤမိၤအတၢ်မံမီၢ်အပူၤ ဒီးကွဲမုာ်အီၤလၢ ကဃ့တၢ်လၢအအိၣ်တမံၤမံၤန့ၣ်လီၤ. စီၤၡလိၤမိၤဃ့ဝဲ တၢ်ကူၣ်သ့ဒီး တၢ်သ့ၣ်ညါနၢ်ပၢၢ် ဒ်သိးကစံၣ်ညီၣ်ပှၤဟီၣ်ခိၣ်ဖိတဖၣ် လၢတၢ်တီတၢ်လိၤဒီး တၢ်ကူၣ်သ့အပူၤန့ၣ်လီၤ. ယဟိဝၤယွၤဘၣ်သူၣ်ဘၣ်သးဝဲအဃိ ကစၢ်ဟ့ၣ်လီၤစီၤၡလိၤမိၤတၢ်ကူၣ်သ့ဒီး တၢ်သ့ၣ်ညါနၢ်ပၢၢ်န့ၣ်လီၤ. တကးဘၣ်အမဲာ်ညါ, ယဟိဝၤယွၤအၢၣ်လီၤပာ်ဝဲလၢ အဝဲမ့ၢ်ဒိကနၣ်အကလုၢ်ထီဘိန့ၣ် ကစၢ်ကဟ့ၣ်အီၤတၢ်ထူးတၢ်တီၤ, တၢ်လၤတၢ်ကပီၤဒီး တၢ်အိၣ်ကၢအိၣ်ခိးန့ၣ်လီၤ.

ခီဖျိလၢ စီၤၡလိၤမိၤစံၣ်ညီၣ်တၢ်လၢ တၢ်ကူၣ်သ့အဃိ အမံၤဟူထီၣ်သါလီၤဝဲလီၤ. အဒိ, ဘၣ်တဘျီန့ၣ် ပိာ်မုၣ်ခံဂၤ အ့ၣ်လိာ်အသးလၢ ဖိသၣ်ပိာ်ခွါတဂၤအဃိလီၤ. ဒီးအဝဲသ့ၣ်ခံဂၤလၢာ် စံးဝဲလၢ အမ့ၢ်ဖိသၣ်အံၤအမိၢ်န့ၣ်လီၤ. စီၤၡလိၤမိၤ ဟ့ၣ်လီၤအကလုၢ်လၢ ပှၤကဒီၣ်တဲာ်ကွံာ်ဖိသၣ်အံၤခံကူာ်ဝံၤဒီး ဟ့ၣ်လီၤပိာ်မုၣ်ခံဂၤအံၤ တဂၤတကူာ်န့ၣ်လီၤ. ပိာ်မုၣ်တဂၤန့ၣ်ဘၣ်သူၣ်ဘၣ်သးဝဲလီၤ. မ့မ့ၢ်အမိၢ်နီၢ်နီၢ်န့ၣ် ဃ့ကညးဝဲတဘျီဃီလၢ ပှၤကဟ့ၣ်လီၤဖိသၣ်အံၤဆူ ပိာ်မုၣ်အဝဲတဂၤန့ၣ်လီၤ. ဖဲန့ၣ်အခါ စီၤၡလိၤမိၤသ့ၣ်ညါဘၣ်ဝဲလီၤတံၢ်လီၤဆဲးလၢ ပိာ်မုၣ်လၢအအိၣ်ဒီး တၢ်သးကညီၤတဂၤအံၤ မ့ၢ်ဖိသၣ်အမိၢ်အဃိ ဟ့ၣ်က့ၤအီၤအဖိန့ၣ်လီၤ. တယံာ်ဘၣ်ဒီးတၢ်ကစီၣ်အံၤ ဟူထီၣ်သါလီၤလၢကီၢ်အံၣ်စရ့လးဒီဘ့ၣ်ညါအဃိ ပှၤသ့ၣ်ညါဘၣ်ဝဲလၢ စီၤၡလိၤမိၤန့ၣ်အိၣ်ဒီးတၢ်ကူၣ်သ့လၢ ယွၤဟ့ၣ်အီၤန့ၣ်လီၤ.

စီၤၡလိၤမိၤအတၢ်မၤလၢ အဒိၣ်ကတၢၢ်တမံၤန့ၣ် မ့ၢ်တၢ်သူၣ်ထီၣ်ယဟိဝၤယွၤ အတၢ်လုၢ်ဟံၣ်န့ၣ်လီၤ. တၢ်အံၤမ့ၢ်တၢ်သူၣ်ထီၣ် လီၤဘီလီၤမုၢ်တခါလၢ ဝ့ၢ်ယရူၤၡလ့ၣ်အပူၤ ဒီးမ့ၢ်တၢ်လီၢ်ခိၣ်သ့ၣ်လၢ ပှၤကဘူၣ်ထီၣ်ဘါထီၣ် ယဟိဝၤယွၤလၢကီၢ်အံၣ်စရ့လးအပူၤန့ၣ်လီၤ. ဖဲတၢ်ပာ်စီဆှံတၢ်လုၢ်ဟံၣ်အခါ, စီၤၡလိၤမိၤ ဃ့ဘါထုကဖၣ်ဝဲဒ်အံၤလီၤ, “မူခိၣ်ဒီးမူခိၣ် အထီကတၢၢ်န့ၣ် တတြီၢ်ဘၣ်လၢနဂီၢ်ဘၣ်. ဟံၣ်လၢယမၤတဖျၢၣ်အံၤ ဆံးန့ၢ်အန့ၣ်ဆံးဒိၣ်လဲၣ်.”—၁ စီၤပၤ ၈:၂၇.

စီၤၡလိၤမိၤ အမံၤဟူသၣ်ဖျါသကုၤလၢ ထံကီၢ်အဂၤတဖၣ်တုၤလၢ ၡဘၤဘီမုၢ်လၢအအိၣ်လၢ ကီၢ်ဧ့ရ့းအပူၤန့ၣ်လီၤ. ၡဘၤအနီၢ်ပၤမုၣ်န့ၣ် လဲၤဝဲဆူကီၢ်အံၣ်စရ့လးဒ်သိး ကထံၣ်ဘၣ်ဝဲစီၤၡလိၤမိၤအတၢ်ထူးတၢ်တီၤ ဒီးအတၢ်ဖံးတၢ်မၤလၢအလီၤဘီလီၤမုၢ်လီၤ. ဒီးအဲၣ်ဒိးမၤကွၢ်ဝဲစီၤၡလိၤမိၤအတၢ်ကူၣ်သ့ အိၣ်ထဲလဲၣ်န့ၣ်လီၤ. နီၢ်ပၤမုၣ်တဂၤအံၤဆိကမိၣ်ဒိၣ်ဝဲ စီၤၡလိၤမိၤအတၢ်ကူၣ်သ့ဒီး ကီၢ်အံၣ်စရ့လးအတၢ်ဂုၤထီၣ်ပသီထီၣ်အဃိ စံးထီၣ်ပတြၢၤယဟိဝၤယွၤလၢ အပာ်ထီၣ်ဝဲစီၤပၤတဂၤလၢ အကူၣ်တၢ်သ့ထဲအံၤန့ၣ်လီၤ. မ့ၢ်လီၤ, လၢပျၢၤကီၢ်အံၣ်စရ့လး အတၢ်စံၣ်စိၤတဲစိၤဒီကတီၢ်ညါအပူၤ စီၤၡလိၤမိၤပၢတၢ်အကတီၢ်န့ၣ် မ့ၢ်တၢ်ဆၢကတီၢ်လၢ ပှၤအံၣ်စရ့လးဖိတဖၣ် အိၣ်ဒီးတၢ်လဲၤထီၣ်လဲၤထီ ဒီးတၢ်မုာ်တၢ်ခုၣ်အါကတၢၢ်န့ၣ်လီၤ. တၢ်အံၤကဲထီၣ်အသးခီဖျိလၢယဟိဝၤယွၤအတၢ်ဆိၣ်ဂ့ၤအဃိလီၤ.

လီၤသးအုးဒိၣ်မးလၢ စီၤၡလိၤမိၤန့ၣ်တအိၣ်မူမၤထွဲ ဒ်ယဟိဝၤယွၤအတၢ်ဘၣ်သးအသိးထီဘိဘၣ်. အဝဲဃၣ်ကွံာ်အနၢ်လၢ ယွၤအတၢ်မၤလိာ်ဒီး ဒိးတ့ဒိးဖျီအသးဒီး ပိာ်မုၣ်လၢအကယၤတဖၣ်, ဃုာ်ဒီးပိာ်မုၣ်လၢ အဘူၣ်ထီၣ်ဘါထီၣ်ဝဲယွၤလၢအကမၣ်တဖၣ်န့ၣ်လီၤ. လၢခံန့ၣ် အမါတဖၣ် မၤယံၤထီၣ်အသးလၢ ယဟိဝၤယွၤအအိၣ်ဒီး ကွဲန့ၢ်လွဲန့ၢ်အီၤလၢကဘူၣ်ထီၣ်ဘါထီၣ်တၢ်ဂီၤတၢ်ဖှီၣ်န့ၣ်လီၤ. လၢတၢ်န့ၣ်အဃိ, ယဟိဝၤယွၤစံးဘၣ်ဝဲ စီၤၡလိၤမိၤလၢ ကဟံးထီၣ်ကွံာ် ဘီမုၢ်လၢအအိၣ်န့ၣ်လီၤ. ဘၣ်ဆၣ်ကစၢ်ယွၤ တထုးထီၣ်ကွံာ်ဘီမုၢ်ခဲလၢာ်ဘၣ်. မ့ၢ်လၢကစၢ်အၢၣ်လီၤအီလီၤတ့ၢ်ဝဲ စီၤၡလိၤမိၤအပၢ် စီၤဒၤဝံးအဃိ ပာ်တ့ၢ်ဝဲဘီမုၢ်တနီၤလၢ စီၤၡလိၤမိၤအဒူၣ်ဖိထၢဖိအဂီၢ်န့ၣ်လီၤ. စီၤၡလိၤမိၤတတီလၢ ယဟိဝၤယွၤအဖီခိၣ်သနာ်က့ ကစၢ်တီဒီးဘီမုၢ်အတၢ်အၢၣ်လီၤအီလီၤလၢ အမၤတ့ၢ်ဝဲဒီး စီၤဒၤဝံးန့ၣ်လီၤ.

​—ဘၣ်တၢ်ဒိးသန့ၤထီၣ်အီၤလၢ ၁ စီၤပၤ အဆၢဒိၣ် ၁ တုၤလၢ ၁၁; ၂ ကွဲးနီၣ်တၢ် အဆၢဒိၣ် ၁ တုၤလၢ ၉; ၅ မိၤၡ့ ၁၇:၁၇ န့ၣ်လီၤ.