MVUHˇ MIˬ teˇ peˆ ve uˉ peunˍ shehˍ hpaˇ leh chaw yaˇ Hkunˉ hawˉ hkanˇ Yaˬhoˉvaˬ awˬ hawˉ lo chehˇ leh Yawˇ ve awˬ liˇ htaꞈ na yuˬ kʼo, a shaꞈ teꞈ hkʼaˇ hkʼaˬ hkʼe kʼai le tehꞈ Jawˇmawˇ Sawˉlaꞈmonˍ 40 hkʼawꞈ uˉ peunˍ ve teˇ co˗e hkʼaw hpeuꞈ maw laˇ ve yoˬ.

Daˍviˆ maˇ suh sheˍ gʼuˇ suhˍ htaˇ, yawˇ awˬ tan jawˇ mawˇ te tuˬ yawˇ ve yaˇ paˍ Sawˉlaꞈmonˍ htaꞈ teh taˍ ve yoˬ. Zuhꞈ maˆ hkʼaw Sawˉlaꞈmonˍ loˍ ve awˬ ceuˬ htaꞈ lawˬ hpehꞈ ve yoˬ tehꞈ, Gʼuiˬ sha yawˇ htaꞈ kʼoˆ piˇ ve yoˬ. Sawˉlaꞈmonˍ lehˬ, chaw yaˇ hui htaꞈ hteˇ cawˇ ve hkʼaw uˉ peunˍ tuˬ cuˇ yiˍ lawˬ ve yoˬ. Yaˬhoˉvaˬ dawˇ cawˇ leh Sawˉlaꞈmonˍ htaꞈ shiˍ puiˉ ve cuˇ yiˍ peꞈ piˇ ve yoˬ. Yaˬhoˉvaˬ yawˇ htaꞈ ka tiꞈ kʼawꞈ te htehˍ piˇ ve, Gʼuiˬ sha hkawˇ htaꞈ na yuˬ ve kʼo, yawˇ paw sha ve, awˬ meꞈ awˬ hponˇ leh co zuhˬ ha zuhˬ kaꞈ cawˬ tuˬ yoˬ.

Sawˉlaꞈmonˍ cuˇ yiˍ cawˬ ve hkʼaw suhˉ jehˬ ve pa taw awˬ meh bvuhˬ ve yoˬ. Teˇ pawˆ htaˇ, yaˇ ehˉ teˇ gʼaˇ htaꞈ yaˇ miˇ nyiˇ gʼaˇ veh daꞈ ve yoˬ. Sawˉlaꞈmonˍ lehˬ, yaˇ ehˉ htaꞈ jiˆ hkoˇ leh yaˇ miˇ htaꞈ teˇ gʼaˇ teˇ hkoˇ pehˍ piˇ˗oˆ tehꞈ tawˇ piˇ ve yoˬ. Yaˇ miˇ awˉ lawˉ teˇ gʼaˇ lehˬ, nyi ma cawˇ ve yoˬ. Yaꞈ hkʼaˇ, awˬ e tehˬ tehˬ ve teˇ gʼaˇ lehˬ, yaˇ chi yaˇ miˇ oˇ ve htaꞈ piˇ˗oˆ tehꞈ laꞈ haˉ lawˬ hkawˉ ve yoˬ. Sawˉlaꞈmonˍ lehˬ, ha kʼaˉ puiˉ ve yaˇ miˇ teˇ gʼaˇ awˬ e hpehꞈ ve htaꞈ hkʼa tawˍ lehˆ gʼa mawˬ leh yaˇ ehˉ yawˇ htaꞈ piˇ ve yoˬ. Maˇ maw maw gaˬ leh Iˉsaˍreˍlaˆ chaw hkʼa peu˗eˬ awˬ lawn chi htaꞈ gʼa kaˇ leh Sawˉlaꞈmonˍ Gʼuiˬ sha geh cuˇ yiˍ gʼa ve yoˬ tehꞈ gʼa mawˬ gʼa shiˍ ve yoˬ.

Sawˉlaꞈmonˍ te gʼa ve daꞈ jaˇ ve teˇ ceuˬ lehˬ, Yaˬhoˉvaˬ ve bon yehˬ yoˬ. Yeˍruˆsaˍlehnˍ venˇ lo awˬ meꞈ awˬ hponˇ cawˬ ve bon yehˬ chi ve Iˉsaˍreˍlaˆ mvuhˇ miˬ hkʼaw a yeˇ uiˍ jaˇ ve oˉ kʼoˍ pui kuiˬ hpehꞈ ve yoˬ. Bon yehˬ chiˇ aꞈ htaˇ Sawˉlaꞈmonˍ chi hkʼe bon lawˬ ve, “Mvuhˇ naw ma chi taw taw uiˍ jaˇ kʼehˬ jaˇ ve kaꞈ, nawˬ chehˇ maˇ lawꞈ sheˍ ve yoˬ. Hkʼaˬ hkʼe te leh, ngaˬ te taˍ ve bon yehˬ chi ve hkʼaw lo nawˬ chehˇ gʼa tuˬ ve le.” (1 Jawˇmawˇ 8:27)

Sawˉlaꞈmonˍ ve awˬ meh awˬ kaˍ awˬ nu mvuhˇ miˬ leh Aˍraˆ hkʼaw Sheˍbaˆ mvuhˇ miˬ lo hkʼa gaˬ bvuhˬ kʼai ve yoˬ. Sheˍbaˆ ve Jawˇmawˇ ma lehˬ, Sawˉlaꞈmonˍ ve awˬ meꞈ awˬ hponˇ leh paw sha ve awˬ ceuˬ htaꞈ ca nyi la leh yawˇ ve cuˇ yiˍ hkʼaˬ naˉ naˉ cawˬ ve htaꞈ lawˇ nyi piˇ ve yoˬ. Sawˉlaꞈmonˍ ve cuˇ yiˍ leh, Iˉsaˍreˍlaˆ mvuhˇ miˬ uiˍ la daꞈ la ve htaꞈ jawˇ mawˇ ma nyi ma cawˇ jaˇ leh cuˇ yiˍ cawˬ ve Jawˇmawˇ Sawˉlaꞈmonˍ htaꞈ teh taˍ piˇ ve Yaˬhoˉvaˬ htaꞈ chiˇ mvuh piˇ ve yoˬ. Yaˬhoˉvaˬ awˬ bon naꞈ piˇ ve pa taw, aˬ sho˗eˬ htaˇ teˇ caˉ peuˬ teˇ caˉ Iˉsaˍreˍlaˆ hkʼaw Sawˉlaꞈmonˍ uˉ peunˍ ve teˇ ceuˬ shu aꞈ kehˉ uiˍ la daꞈ la leh dawˇ sha ve yoˬ.

Sheˉ lai jaˇ, Sawˉlaꞈmonˍ lehˬ Yaˬhoˉvaˬ ve cuˇ yiˍ htaꞈ hkʼaˬ htaˆ kaꞈ maˇ gʼaꞈ te. Yawˇ Gʼuiˬ sha tawˇ piˇ taˍ ve htaꞈ maˇ na leh yaˇ miˇ laiˉ ha gʼaˇ htaꞈ heuˆ leh laiˉ gʼaˇ kʼo, awˬ kaˍ awˬ nu gʼuiˬ sha htaꞈ oˉ kʼoˍ pui ve yoˬ. Yawˇ ve awˬ miˇ ma hui lehˬ, Yaˬhoˉvaˬ htaꞈ awˬ meuˇ awˬ meuˇ maˇ na yuˬ tuˬ yawˇ htaꞈ beˬ leh shaˉ hoꞈ htaꞈ oˉ kʼoˍ pui tcuh ve yoˬ. Yawˇ ve mvuhˇ miˬ teˇ hpaˍ hpaˍ htaꞈ pehˍ tawˆ˗e tuˬ yoˬ tehꞈ, Yaˬhoˉvaˬ yawˇ htaꞈ kʼoˆ piˇ ve yoˬ. Yaꞈ hkʼaˇ, Gʼuiˬ sha kʼoˆ piˇ ve, Sawˉlaꞈmonˍ ve awˬ pa Daˍviˆ mehˆ hpfuhˇ htaꞈ nyi ve pa taw, yawˇ ve awˬ ceuˬ awˬ hkʼaˇ awˬ pon teˇ hpaˍ hpaˍ leuˉ taˍ sheˍ ve yoˬ. Sawˉlaꞈmonˍ Yaˬhoˉvaˬ htaꞈ hpfuhˆ ve htawˇ, Daˍviˆ htaꞈ ka tiꞈ te taˍ ve oˇ ve htaꞈ Gʼuiˬ sha vawˆ tiˍ taˍ ve yoˬ.

—1 Jawˇmawˇ liꞈ 1 te leh 11; 2 Raˍsaˍvanˍ liꞈ 1 te leh 9; Bon maˍ ve 17:17 hkʼaw yuˬ laˬ ve yoˬ.