MA NA jñiñi ñe o rey ro a̷ta̷ji e Jeoba ro tsjaji kʼo nee angeze, ¿jargua mimiji? Ro mimiji nzakja ma o manda e Salomón kʼo kuarenta kje̷e̷.

Ma ya ro nrru̱u̱ e David o ñeme o trʼii Salomón ro tsjaa rey. Na nu paa e Salomón o ngi̱chʼi̱ na trʼiji, mi nge e Mizhokjimi mi zopju̷, mi xipji: Dyotkʼu̷ kʼo ri ñege, ra dakʼu̷. O nrru̷ru̷kʼua e Salomón ba xipji: Ri otrʼkʼu̷ ri dyakʼu̷ ra mbeñe na joo ngekʼua ra pa̱ra̱go ja nge kʼo na joo ñe kʼo na sʼoo. Ngekʼua ra soo ra pa̱ra̱go na joo jarga manda ñe jarga kjapu̷go na joo o justicia yo in nteege. Nukʼua e Jeoba o nuu na joo kʼo mi oru̷ e Salomón, ngekʼua ba xipji: Ra dakʼu̷ kʼo i̱ nege. Ma ri tsjage kʼo ri neego, dya ra bʼu̷bʼu̷ o rey nzakjatsʼkʼe, ri ju̷̱u̷̱ge na punkju̷ chʼopju̷, ri minkʼe na punkju̷ tsje̷e̷.

Na nu paa, o e̱je̱ na yeje ndinxu kja o jmii e Salomón. Mi sobi ñaa, na nrrinxu o mama: Ne nrrinxujnu o zidyi nu in chʼiigo. Kʼu̷ naja nrrinxu o mama: Dya mejme kʼo mamajnu, nge in chʼiigo nu ri trje̷go. Nukʼua e Salomón o mama: Dyokʼu̷ji anrreʼe ne tsʼilele. Na nrrinxu o mapju̷: ¡Dya ri dyokʼu̷ji anrreʼe, unu̷ji ne nrrinxujnu dya ri potrʼu̷! Nukʼua e Salomón o unu̷ nguenrra kʼe nrrinxu mi nge o nana kʼe tsʼilele, kjanu o unu̷. Ma o mba̱ra̱ kʼo israelita kʼu̷ o tsjaa na joo justicia, ix ko mba̱ra̱ji mi nge Mizhokjimi kʼu̷ o unu̷ ro mba̱ra̱ na punkju̷ jarba manda.

E Salomón pje nrre me go dya̷trʼa̷, kʼu̷ me nrro ma joo o dya̷trʼa̷ nge ke trʼangumu̷ ja mi matrʼu̷kjimi Jeoba kʼo israelita. Ma o nguaru̷ kʼe trʼangumu̷ e Salomón o tsjaa na mbaxkua. Kjanu e Salomón o dyotu̷ Mizhokjimi, o mama ga kjaba: “Ajensʼe dya i̱ su̷kʼu̷ge ¡Ora ja ri ñutrkʼo ke ri bʼu̷bʼu̷geba kja ne ngumu̷ nu ro ja̷bʼkʼo!” (1 Reyes 8:27).

Kʼo jñiñi kʼu̷ mi bʼu̷bʼu̷ na je̱e̱, o dya̷ra̷ji nrrexe kʼu̷ o tsjaa e Salomón, mi pa̱ra̱ji kʼe mi pe̷sʼi na punkju̷ merio, kʼu̷ me mi pa̱ra̱ jarba manda, jesta kʼo mi ka̱ra̱ kja kʼe jñiñi kʼu̷ mi chju̱u̱ Seba o mba̱ra̱jikʼo. Kʼe jñiñi Seba mi bʼu̷bʼu̷ a Arabia. Kʼe reina kʼu̷ mi mandanu, o maa a Israel o maa nuu e Salomón, mi nee ro jñanrratsje kjo bʼemi kʼo mi manji. Ma o dya̷ra̷ kʼo o xipji e Salomón me ko kentrjodyakʼua, o mama kʼu̷ e Jeoba nge kʼu̷ o unu̷ e Salomón ro pa̱ra̱ na punkju̷. E Mizhokjimi o pjosʼu̷ e Salomón ngekʼua ma o manda, kʼo israelita o nga̱ra̱ji na joo ko in minteji, o mimiji na joo, mi pe̷sʼiji na punkju̷ pje ro ziiji, mi pe̷sʼiji na punkju̷ chʼopju̷.

E Jeoba o mama kʼo rey dya ro chju̷ntu̷ji ko na punkju̷ nrrinxu. E Salomón dya go ngotrʼbʼu̷ ñiʼi kʼo bi mama Mizhokjimi, o chju̷ntu̷ ko na punkju̷ nrrinxu kʼu̷ mi xorpu̷ yo santo. Kʼo nrrinxukʼo, o tsjapu̷ ke e Salomón ro jyezi Mizhokjimi. Ngekʼua e Jeoba o xipji e Salomón ke o mboxbʼechekʼu̷ dya kja ro manda nrrexe kja Israel, xe ro jyezi yeje tribu nu xe ro mandaji. ¿Pjenga dya go jñu̷mbu̷ texe kʼo tribu? Nange e Jeoba ro cumple nu promesa kʼu̷ bi ñaabi ko e David.

(Nu kʼo gua e̱je̱ba xo ri jyodʼu̷ kja yo libro 1 Reyes nu capítulo 1 ra za̷trʼa̷ nu capítulo 11; 2 Crónicas nu capítulo 1 ra za̷trʼa̷ nu capítulo 9 ñe Deuteronomio 17:17.)