NISAN kum bara ai kingka ba Jehova kupia lâka daukisa kaka, ¿nahki iwbia? Salaman 40 mani king aimaki kan piua ra, naha makabi walanka ansika yaban.

Debit kau pruras kan piua ra, ai luhpia Salaman king baku mangkan. Yu kum, Gâd ba Salaman ra yaprisauhkanka kum ra param takan bara witin ra win dîa makabia ba yabia. Salaman ba sins lâka bara kasakka lâka wal king aimakaia dukiara makaban. Jehova naha ba pain kaikan. Baku sin win, Witin bîla walbia kaka, yuyaka manis, kulkanka tara bara ai rayaka ba yari kabia.

Salaman sins lâka tara bri kan ba mita, upla sut witin ra kakaira kan. Yu kum, mairin wâl witin ra balan. Mairka wâlsut ba aisi kan bibi kum yaptika kan. ¿Salaman dîa daukan? ¡Witin win bibika ba klaki lilak baikbia! Pas mairka ba âu win, sakuna wala ba win pas mairka ra bibika ba yabia. Baku natka ra Salaman nu takan ya rait pali yaptika kan. Upla wala nani ba naha nu takan taim, ai tânka brin Salaman Jehova sinska lâka bri kan.

Salaman diara kau painkira daukan ba sika tempel pranakira kum paskaia. Naha ba Jerusalem ra paskan. Naha pliska ra Israel nani Jehova ra mayunaia sip kan. Bara tempel ba paski danh takan taim liliaka kum daukan. Bahara Salaman ai pura suni naku win: “Bara kaiks kasbrika pura ba bara yahpika ba sip alki briras sa, bara nahki sip kabia naha tempel yang bui paski maikri na” (1 King Nani 8:27).

Salaman upla sut kakaira kan ba mita, plis laihura uplika nani sin, sampla baku Sabá kuntrika (naha ba Arabia kuntrika sa) kat witin dukiara walan kan. Naha kuntrika kwinka ba Israel tasbaya ra impakan, kan witin kaikaia want kan Salaman prana bara yuyaka nani ba. Baku sin, Salaman sinska lâka ba traika kaikaia want kan. Sakuna naha kwinka Salaman sinska lâka kaikan ba mita tâ iwan, bara Jehova ra kulkanka lâka yaban, kan waitna sinskira kum king baku mangkan. Jehova hilpka wal Salaman kingka lâka ra Israel uplika nani ba kupia kumi lâka bara ai âuyapah lâka ra iwi kan.

Sari sa wiaia, sakuna Salaman ban Jehova sinska lâka briras kan. Sampla baku, Gâd adar kum yaban mairin ailal bribia apia, sakuna witin mairin handat handat wal marit takan. Bara naha mairka nani ba gâd bahki nani ra mayuni kan. Baha tâka mita, tawa tawa naha mairka nani ba witin kupia lakan bara Salaman aidul nani ra mayuni kan. Jehova Salaman ra win ai kingka lâka ba baiki sakan kabia. Sakuna Jehova Debit ra pramis kum daukan kan ba mita Salaman ai kingka lâka sut tiwbia apia. Rait pali Salaman Gâd mapara buan, sakuna Jehova Debit ra dîa pramis munan ba ai âuya tikras kan.

(1 King Nani sapta 1 wina 11, 2 Kronikas sapta 1 wina 9 bara Kli Smalkanka 17:17 wina sakan sa.)