লৈঙাকপশিং য়াওনা মীপুম খুদিংমক্না যেহোবানা পুঙম ঙমজবনি হায়বা য়াজদুনা মহাক্কী ৱায়েল য়াথং ময়াম অদুবু ইন্জদুনা হিংজরবদি মীওইবগী পুন্সি অসি য়াম্নমক তোঙানলম্লোইদ্রা? সোলোমোন নিংথৌগী চহি ৪০গী শাসন অদুনা ৱাহং অসিগী পাউখুম পীজৈ।

দেবিদনা শিদ্রিঙৈদা মহাক্কী মচানুপা সোলোমোনবু মহাক্কী মহুৎ শিনবা ওইনা হাপ্পিরম্মী। সোলোমোন্না মঙ অমা মঙলম্মী, অমসুং ঈশ্বরনা মহাকপু মহাক্কী অপাম্বা অমা নিজনবা খংহল্লম্মী। সোলোমোন্না মহাক্কী প্রজাশিংবু ফজনা লৈঙাক শাসন তৌবা ঙম্নবগীদমক লৌশিং অমদি গ্যান পীবিয়ু হায়জরম্মী। যেহোবানা হরাওনা সোলোমোনবু হৈশিংবা অমসুং খংজিনবা ঙম্বা থম্মোয় অমা পীবিরম্মী। মহাক্না হায়বা ইন্জনা লৈরবদি লন, মতিক মঙাল লৈবা অমসুং পুন্সি নুংশাংবা পীবিগনি হায়দুনা যেহোবানা ৱাশকপিরম্মী।

মহাক্কী হৈশিংবা ৱায়েল বিচারগীদমক সোলোমোনবু মীয়ম্না শক খংবিরম্মী। নোংমদি নুপী অনিখক্না পীক্লিবা অঙাং নুপামচা অমগী মতাংদা য়েৎনরম্মী। নুপী অনিদুমক্না অমনশু-অমনশু অঙাং অদুগী মমানি হায়রম্মী। সোলোমোন্না অঙাং অদু তংখায় তানা খায়দোক্লগা নুপী অনিদুদা অমম্ম য়েন্ননবা য়াথং পীরম্মী। মদুদা অহানবা নুপী অদুদি য়ারম্মী অদুবু অঙাং অদুগী অপোকপী মমা অদুনদি য়াখিদে। হৌজিক্তি অঙাং অদুগী অশেংবা মমা অদু কনানো হায়বা সোলোমোন্না খংলদুনা অঙাং অদু নুপী অদুদা পীখি। থৌদোক্তুগী মরমদা মীয়াম পুম্বনা তাখি। মীয়াম্না সোলোমোনবু ঈশ্বরগী লৌশিং চেল্লি হায়না খংনরকখি।

সোলোমোন্না ফজরবা অচৌবা য়ুমশিং শাখি অদুবু অদুগুম্বশিং অদুগী মনুংদা খ্বাইদগী হেন্না ফজরম্বদি যেহোবাগী লাইশংদুনি। মদু যেরূশালেমগী মনুংদা য়াম্না চাওবা য়ুমজাও অমা ওইরম্মী অমসুং ইস্রায়েলগী মরুওইবা লাইনিংফম ওইখি। লাইশং অদু শঙ্গাবা মতমদা সোলোমোন্না প্রার্থনাদা হায়জরম্মী: “য়েংউ, অতিয়া অমসুং অতিয়া নোংদোনগী অতিয়াদসু নহাক লৈবা চন্দে। ঐনা শাখিবা য়ুম অসিদি কয়াদা পিকখ্রবা!”—১ নিংথৌশিং ৮:২৭.

অরাবিয়াদা লৈবা শেবা হায়না খংনবা মপালগী লম অদু ফাওবদা সোলোমোনগী মীং তারম্মী। শেবাগী মহারানীনা সোলোমোনগী মতিক মগুন অমদি লন য়েংন্নবা অমসুং সোলোমোনগী লৌশিংগী পনখৈ চাংয়েং তৌবা লাক্লম্মী। মহাক য়াম্না ঙক্লম্মী। মহাক্না অদুগুম্বা গ্যান লৈবা মীশক অমবু নিংথৌ ওইহনবীরম্বগীদমক যেহোবাবু থাগৎলম্মী। যেহোবানা সোলোমোনগী শাসনবু থৌজানবীরম্মী। থায়নগী ইস্রায়েলগী ইতিহাস্তা সোলোমোন্না পাল্লম্বা মতম অদু খ্বাইদগী চাওখৎপা অমদি শান্তি লৈবা ওইখিবদু মরম অদুননি।

য়াম্না নুংঙাইতবদি সোলোমোন্না ঈশ্বরগী লৌশিং অদুগী মাইয়োক্তা থবক তৌরকখি। মহাক্না যেহোবাগী হায়বা ইনবগী ওন্ন তৈনবদা অতোপ্পা লাইনিং চৎপা নুপী চা কয়া মহাক্কী লোয়নবী ওইনা লৌখি। তপ্ন-তপ্না মহাক্কী লোইনবীশিংদুনা মহাকপু যেহোবাগী লাইনিংদগী লাপথোকহনখ্রগা মুর্তি লাৎপদা চিংশিনখি। নিংথৌ লৈবাক অদুগী শরুক অমা লৌথোকখ্রগনি হায়না যেহোবানা সোলোমোন্দা হায়রম্মী। সোলোমোনগী মপা দেবিদকী য়েংলগা শরুক অমখক্তি মহাক্কী ইমুংগী ওইনা খাকপিরমগনি হায়দুনা ঈশ্বরনা হায়রম্মী। সোলোমোন্না অচুম্বা লম্বী অদু থাদোকচরম্লবশু দেবিদকা তৌনখিবা ৱারেপ্নবা অদুদা যেহোবানা লেংদনা লৈরম্মী।

​—১ নিংথৌশিং পন্দুপ ১​দগী ১১; ২ ইতিহাস পন্দুপ ১​দগী ৯; অনীশুবা ৱায়েন ১৭:১৭​দা য়ুম্ফম ওইবা।