¿KENIJKATSA itstoskiaj tlaj nochi maseualmej uan inintlanauatijka amo kikauaskiaj kitekipanosej Jehová uan kitlepanitaskiaj itlanauatijkayo? Ni nesi ipan 40 xiuitl kema Salomón tlanauatijtoya.

Kema nechka mikiskia David, kiijtok ikone Salomón kitekipatlaskia. Se tonali, ipan se temiktli toTeotsij kiiljuik Salomón ma kitlajtlani tlen ya kinekiskia. Yeka Salomón kitlajtlanik ma kimaka tlalnamikilistli uan tlaixmatili, kej nopa xitlauak tetlajtolsenkauaskia. Jehová kipaktik tlen kitlajtlanik, yeka kimakak. No kiiljuik, tlaj nochipa kineltokaskia, tlatomipiaskia miak, kitlepanitaskiaj uan itstoskia miak xiuitl.

Salomón miakej kiixmatkej pampa tlauel tlalnamikiyaya. Se tonali, omej siuamej yajkej kiitatoj pampa nopa omej kiijtouayayaj eliyayaj inana se pilkonetsi. ¿Tlake kichijki Salomón? ¡Tlanauatik ma kintlajtlakouikaj! Se siuatl kiijtok ma kej nopa kichiuakaj, uan nopa se nimantsi tlajtlanki ma kimakakaj nopa seyok siuatl. Yeka Salomón kimatki ya ni siuatl nelia eliyaya inana. Kema nochi kikajkej tlen panotoya, kimatkej toTeotsij kimakatoya Salomón nopa tlalnamikilistli.

Nopa ueyi teokali tlen Salomón kichiuilik Jehová ne Jerusalén, kampa tlaueyichiuaskiaj kej toTeotsij kinekiyaya ne Israel altepetl, ya nopa tlen tlauel ueyi kichijki Salomón. Kema peuaskia kitekiuisej nopa teokali, Salomón momaijtok iixpa toTeotsij uan kiijtok: “Yon nopa iluikaktli tlen tikitaj, ni yon nopa iluikaktli tlen más uejkapa tlen axueli tikitaj, axueli mitskuis pampa tlauel tiueyi. Uajka, ¿kejatsa mitskuis ni piltiopantsi tlen na nimitschiuilijtok?” (1 Reyes 8:27).

Kampa ueli miakej kiixmatiyayaj Salomón, yeka no kiixmatkej ipan uejka altepemej kej Seba (o Saba), katli eltok ne Arabia. Nopa siuatlanauatijketl tlen Seba yajki Israel pampa kinekiyaya kiitati kenijkatsa kitlepanitayayaj Salomón uan nochi tlen tlapijpixtoya, no kinekiyaya kiitas tlaj nelia tlauel tlalnamikiyaya. Nochi tlen kiitak tlauel kiyololinik, yeka kiueyichijki Jehová pampa kitlapejpenijtoya se tlanauatijketl tlen tlauel tlalnamiki. Ne Israel tlauel tlapijpixtoyaj uan amo onkayaya kualantli pampa toTeotsij kiteochijki Salomón kema tlanauatiyaya.

Salomón amo nochipa kikajki ma kiyakana nopa tlalnamikilistli tlen Jehová kimakatoya. Ya tlemach tlachijki, pampa maske toTeotsij kiijtojtoya tlanauatianij ma amo kinpiakaj miakej ininsiuajuaj, ya mosiuajtik ininuaya tlauel miakej siuamej uan miakej kiueyichiuayayaj teotsitsij tlen amo melauakej. Yeka yolik kikajtiajki Jehová uan kichijkej ma kinueyichiua sekinok teotsitsij. Uan toTeotsij kiiljuik, ichampoyouaj kipoloskiaj miak tlali kampa tlanauatiyaya. Inijuantij amo nochi kipoloskiaj pampa toTeotsij amo kiilkajtoya tlen kiiljuijtoya David kimakaskia. Maske Salomón ayokmo kitekipanok toTeotsij, Jehová amo kema kiilkajki nopa tlajtolsenkaualistli tlen kichijtoya iuaya David.

(Mokixtijtok ipan 1 Reyes, capítulo 1 uan tlami ipan 11; 2 Crónicas, capítulo 1 uan tlami ipan 9 uan Deuteronomio 17:17.)