¿KEN yetoskia se altepetl tla nochtin tlakamej iuan itekiua yetoskiaj yolmelajkej uan kitlakaitaskiaj itlayekanalis Jehová? Itekiuajkayo Salomón tlen ouejka 40 xiuitl, tlanankilia.

Achto mikiskia, David okimakak itekiuajkayo ikone Salomón. Se tonal, toTajtsin Dios omonexti inauak Salomón itech se kochtemikilis uan okitekiuilti tlen ye kinekiskia. In telpochtli ueyi tekiua okitlajtlanili ixtlamatilis uan tlamatilistli pampa tlayektlaliskia ika melajkayotl. Jehová okiyolpakti tlen okitlajtlanili, uan okimakak. Noijki, okilui, ke tla ye nochipa kitlakamatiskia, yetoskia tominyo, uan nochtin kiueyichiuaskiaj uan yoltoskia miak xiuitl.

Ken Salomón okipiaya miak ixtlamatilis, nochtin okixmatiaj. Itech se tonal, ome siuamej okitatoj Salomón uan yejuan okijtoayaj inmiaxka se konetl. ¿Tlen okichi Salomón? ¡Otlanauati ma kitlajkotekikan konetl uan ma kinmakakan siuamej! Se siuatl okijto kema, okse siuatl omotlatlaujti amo ma kimiktikan uan ma kimakakan achto siuatl. Ijkon Salomón okimatki ke siuatl tlen teiknomatki ye akin melauak okatka inana konetl. Ijkuak nochi altepetl okimatki tlen opanok, okajsikamatkej ke Salomón okipiaya iixtlamatilis toTajtsin Dios.

Nin ueyi tekiua okichijchi ueyi uan kuakualtsin teokali pampa Jehová itech Jerusalén, nin tlen okachi ueyi itlachiualis, kanin Israel melauak kiueyichiuaskia Jehová. Ijkuak okiteochijkej teokali, Salomón omotlatlaujti inauak toTajtsin Dios uan okilui: “¡Xikita! Iluikak, kema, nochi iluikak amo mitsxikoa, ¿ken uelis mitsxikos teokali tlen onimitschijchiuili?” (1 Reyes 8:27).

Salomón okixmatiaj itech miakej altepemej tlen uejka katka ken itech Seba (noso Saba), itech Arabia. Se siuatl tlen okatka ueyi tekiua itech Seba oyaj Israel pampa kitaskiaj iueyitilis uan itominyo tlen okipiaya Salomón, uan noijki kiyejyekoskia iixtlamatilis. Uan kema okitlajtlachialti tlen okitak uan okiueyichiuak Jehová pampa okipejpenki se ueyi tekiua tlen ixtlamatki. Ika itlateochiualis toTajtsin Dios, itekiuajkayo Salomón okatka okachi kuali tekiuajkayotl itech nochi itonaluan Israel.

Maski teyolkokoa, Salomón amo nochipa omotekauili ma kiyekana iixtlamatilis Jehová. Se neskayotl, maski itlanauatiluan toTajtsin Dios amo kinkauiliaya ueyi tekiuajkej ma kipiakan miakej insiuauan, omonamikti iuan miakej siuamej uan, tlen okachi, miakej in yejuan kinueyichiuayaj oksekimej teotsitsintin, uan okichijkej Salomón noijki ma kinueyichiua. Ik non, toTajtsin Dios okilui ke ichanejkauan kipoloskiaj tekiuajkayotl, maski ijkon, amo nochi kipoloskiaj pampa Jehová okichi se tlajtolsenkaualis inauak David. Maski Salomón amo nochipa okitlakamatki, Jehová okinexti melajkayotl itech tlajtolsenkaualis tlen okichi inauak David.

(Okisak itech 1 Reyes tlakotonaltin 1 a 11, 2 Crónicas tlakotonaltin 1 a 9 uan itech Deuteronomio 17:17.)