¿KENON nemiskiaj se ueyikalpan tla yejuamej niman intekiuaj kitlakamatiskiaj Jehová niman kitlakaitaskiaj itlayekanalis? Itekiuajyo Salomón, tlen ouejkauj cuarenta xiujtin, techijlia kenon.

Ijkuak ximikiya David, okijto ika ikoneuj Salomón kitekipatlaskia. Se tonajli, Salomón ipan se temiktli okitak toTajtsin niman okijli ika kimakaskia maski san tlenon kitlajtlaniskia. Yejuin tekiuaj okitlajtlan tlamachilistli niman tlaixmatilistli tlen kipaleuis matlayekana ika melajkayotl. Jehová okuelitak tlen okitlajtlanili niman okimakak. Niman okijli ika tla nochipa kitlakamati, noijki kipiyaskia miyek tomin, ueyilistli niman uejkaujtipan nemiskia.

Pampa Salomón tlamachilise katka, melak miyekej kixmatstoyaj. Se tonajli, omemej siuamej oyajkej itech, pampa omemej kijtouayaj ika intlatki katka se konetsintli. ¿Tlen okichiuj Salomón? ¡Otlanauati makitlajkotekikan konetsintli! Se okinek ijkon makichiuilikan, niman okse okikneli konetsintli niman okijto ika maski makimakakan siuatl akin kinektoya makitlajkotekikan. Ijkon Salomón okimat ika akin okikneli konetsintli yejua melauak nantli katka. Ijkuak nochimej okimatkej tlen opanok, okasikamatkej ika Salomón kipiaya itlamachilis toTajtsin.

Se melak ueyi tekitl tlen okichiuj yejuin tekiuaj, okichijchiuili iteopan Jehová ipan ueyikalpan Jerusalén, kampa kiueyichiuaskiaj. Ijkuak opeuj ompa kiueyichiuaj Jehová, Salomón okichiuili se teoyotl niman okijli: “¡Xkita! Tla ipan kech ika ueyi iluikak , xonaki moueyilis; ¡kenon uelis onakis moueyilis ipan yejuin kajli tlen onikchijchiuj!” (1 Reyes 8:27).

Salomón melak okixmatkej niman noijki kiteneuayaj kampa melak uejka, ken ipan país Seba (noso Saba), ipan Arabia. Se siuatl akin tekiuaj katka ipan yejon país, oyaj Israel pampa kinekiya yejua kitas iueyilis niman nochi kech kipiaya Salomón, niman noijki kinekiya kitlatlatas tla yemelak tlamachilise katka. Melak okimojkaitak niman okiueyiteneuj Jehová ika okitlapejpeni se tekiuaj melak tlamachilise. Itech nochi akin otekiuajtikej ipan kalpan Israel, san ijkuak Salomón otlayekan, nochi israelitas chantiyaj ika yolseuilistli niman kipiayaj miyek tlemach tlen kuajli pampa kipiayaj itlateochiualis toTajtsin.

Teyolkoko ika Salomón xnochipa onokauili makiyekana toTajtsin akin tlamachilise. Xokitlakamat itlanauatil toTajtsin niman ononamikti iuan melak miyekej siuamej, niman miyekej isiuauan kiueyichiuayaj tajtsitsintin. ¿Tlenon ipan onochiuj? Ika yolik okichiujkej makitlalkaui Jehová niman makinueyichiua tajtsitsintin. Ika yejon, toTajtsin okijli Salomón ika ichanejkauan kipoloskiaj miyek tlen yokisentlalijka ipan itekiuajyo. San xkipoloskiaj nochi, pampa Jehová yokijlika David tlenon kichiuas. Jehová xokipatlak tlen iuan yonotlajtolkaujka David maski Salomón okitlalkaui.

(Onokixti itech 1 Reyes itlaxeloluan uejueyimej 1 ontlami 11, niman itech 2 Crónicas itlaxeloluan uejueyimej 1 ontlami 9 niman itech Deuteronomio 17:17.)