ЦУМА еугур адӕм дӕр ӕма паддзӕхтӕ дӕр Йеговӕмӕ ку игъустайуонцӕ, уӕд цард цӕхуӕн адтайдӕ? Е бӕрӕг ӕй, 40 анзей дӕргъи Соломон паддзах ку адтӕй, уӕд цӕхуӕн цард адтӕй, уомӕй.

Давид ӕ мӕлӕти размӕ паддзахӕй исӕвардта ӕ фурт Соломони. Хуцау Соломонмӕ ӕ фуни фӕззиндтӕй ӕма ’й бафарста, ци дин раттон, зӕгъгӕ. Соломон си ракурдта зунд ӕма лӕдӕргӕдзийнадӕ, цӕмӕй ӕ бон адтайдӕ ӕ адӕмӕн раст тӕрхон кӕнун. Е Йегови зӕрдӕмӕ фӕццудӕй ӕма си ци ракурдта, уой ин равардта. Уомӕй уӕлдай ма ин зӕрдӕ байвардта, ку имӕ игъоса, уӕд ин гъӕздугдзийнадӕ, кадӕ ӕма берӕ цӕрӕнбонтӕ ке ратдзӕй.

Соломонмӕ цӕхуӕн зунд адтӕй, уой туххӕй беретӕ фегъустонцӕ. Еу хатт дууӕ силгоймаги сувӕллони туххӕй фӕххилӕ ’нцӕ. Алкедӕр ӕй ӕхе худта. Соломон сӕмӕ байгъуста ӕма бардзурд равардта, цӕмӕй сувӕллони дууӕ хаййи ракодтайуонцӕ ӕма си алкӕмӕн дӕр еу хай равардтайуонцӕ. Силгоймӕгтӕй сӕ еу исарази ӕй, фал ӕцӕг мадӕ ка адтӕй, е ба сувӕллони фӕййервӕзун кӕнуни туххӕй арази адтӕй, цӕмӕй ӕй иннемӕн равардтайуонцӕ. Уотемӕй Соломон балӕдӕрдтӕй, ӕцӕг мадӕ си ка адтӕй, уой, ӕма сувӕллони уомӕн раттун кодта. Еци хабар ӕгас Израилбӕл райгъустӕй, ӕма ’й еугурӕйдӕр балӕдӕрдтӕнцӕ, Соломонӕн Хуцауӕй лӕвӕрд зунд ке адтӕй.

Соломони гъуддӕгтӕй тӕккӕ устурдӕр адтӕй, ковӕндонӕ ке искодта, е. Еци ковӕндонӕ адтӕй Йерусалими ӕма ӕгас израилӕгтӕ дӕр Йеговӕн ковунмӕ уордӕмӕ цудӕнцӕ. Соломон ковӕндонӕ арӕзт ку фӕцӕй, уӕд Йеговӕмӕ искувта: «Уӕлӕрвти ӕма сауӕнгӕ арви кӕрӕнтти дӕр ку нӕ цӕуис, уӕд дин ӕз ке исаразтон, еци хӕдзари куд гъӕуама бацӕуай!» (1 Паддзӕхти 8:27).

Соломони кадӕ райгъустӕй ӕндӕр бӕстити, сауӕнгӕ ма Аравий, Сави паддзахади дӕр. Сави паддзахуосӕ Йерусалиммӕ ӕрцудӕй, цӕмӕй Соломони кадӕ, гъӕздугдзийнадӕ ӕма зунд ӕхе цӕститӕй фӕууидтайдӕ. Соломони зунд ӕма израилӕгти гъӕздуг цард ку фӕууидта, уӕд ӕ десӕн кӕрон дӕр н’ адтӕй, ӕма Йегови искадгин кодта, уӕхӕн зундгин адӕймаги паддзахӕй ке исӕвардта, уой туххӕй. Йеговӕ Соломонӕн арфӕ кодта, ӕма цалинмӕ паддзах адтӕй, уӕдмӕ Израили адтӕй фарнӕ ӕма хуарз цард.

Фал, гъигагӕн, Соломон, Йеговӕ ин ци зунд равардта, уомӕ гӕсгӕ нӕбал архайдта. Йегови фӕдзӕхститӕ нецӕмӕбал дардта ӕма ӕхецӕн цалдӕр сӕдӕ уоси ӕрхудта, беретӕ си ӕндӕр хуцӕуттӕн кувтонцӕ. Сабургай ӕй ӕ уоститӕ сӕхе ’рдӕмӕ расайдтонцӕ ӕма син сӕ хуцӕуттӕн ковун райдӕдта. Уой туххӕй Йеговӕ Соломонӕн загъта, ӕ паддзахадӕ си ке байсдзӕй, фал Давидӕн зӕрдӕ ке байвардта, уомӕ гӕсгӕ ба ин минкъий хай ниууадздзӕй. Йеговӕ Давиди хӕццӕ ци бадзурд искодта, уой нӕ фехалдта, кӕд си Соломон ӕхе рахадта, уӕддӕр.

1 Паддзӕхти, 1–11 сӕртӕ; 2 Анзфинстити, 1–9 сӕртӕ; Дуккаг закъон 17:17.