ANTO kasi resulta no say interon nasyon tan say manuley to et ontumbok ed si Jehova bilang Soberano tan onuren da ray ganggan To? Naamtaan so ebat no aralen so 40 a taon ya uley nen Arin Solomon.

Antis ya inatey si David, tinuro toy anak ton Solomon pian onsublay ya ari. Diad sakey a kugip, binagaan na Dios si Solomon ya onkerew labat na labay to. Say kinerew nen Solomon et say karunongan pian patas tan dugay panhusga to ed totoo. Aliketan si Jehova tan inikdan toy Solomon na karunongan tan pakatebek. Insipan met nen Jehova ed sikato so kayamanan, inkabantog, tan andukey a bilay basta mansiansian matulok.

Kabkabat si Solomon lapud marunong a pakatebek to. Diad sakey a kaso, walay duaran bii a pankokolkolan day sakey ya ugaw, a pareho dan ipipilit a sikaray akan-anak. Ingganggan nen Solomon a pampalduaan da so ugaw. Inmabuloy so inmunan bii, balet samay peteg ya ina et tampol ya akikasi ya ipalugar to lay ugaw ed samay manasamsam. Diman naamtaan nen Solomon a samay biin maabagey so peteg ya ina tan niiter ed sikato so ugaw. Abalitaan itan na interon Israel, tan binidbir dan say panlalapuan na dunong nen Solomon et say Dios.

Sakey ed saray abalbaleg ya agawaan nen Solomon et say impangipaalagey toy templo nen Jehova—sakey a balibalin paalagey ed Jerusalem a sentro na panagdayew ed Israel. Diad inagurasyon na templo, impikasi nen Solomon: “Nia, say tawen tan say tawen na katawenan agda ka nalugan; agni nagkalalo so saya ya abung ya impaalagey ko!”—1 Arari 8:27.

Say kagalangan nen Solomon so abalitaan anggad arum a nasyon, a singa diad Sheba, ed Arabia. Say reyna na Sheba so nambiahe pian nengnengen so gloria tan kayamanan nen Solomon tan suboken so inkadunong to. Nandinayew so reyna ed dunong nen Solomon tan ed inkayaman na Israel, kanian indayew toy Jehova lapud say inyan Ton ari et marunong. On, lapud panamendisyon nen Jehova, say uley nen Solomon so sankaaligwasan tan sankareenan ed amin a nanuley ed Israel.

Makapaermen ta agnantultuloy si Solomon a kinmiwas unong ed dunong nen Jehova. Imbaliwala toy ganggan na Dios tan angasawa na nilasus a bibii, kaiba lay dakel a mandadayew ed arum a dirios. Sikatoy kalkalnan sinagyat na kaasawaan to ya ibeneg si Jehova, tan nandayew ed saray imahen. Inkuan nen Jehova ed si Solomon a naekal ed sikato so kabiangan na panarian to. Inkuan na Dios a melag labat a kabiangan na panarian so nakera ed pamilya to, lapud sipan ed ama ton si David. Anggaman ed ag-intulok nen Solomon, siansian matoor si Jehova ed sipan ton Panarian ed si David.

—Nibase ed 1 Arari kapitulo 1 anggad 11; 2 Awaran kapitulo 1 anggad 9; Deuteronomio 17:17.