¿JAS ubʼanik riʼ ri kʼaslemal we konojel ri e winaq rech jun tinamit xuqujeʼ ri ajqʼatal tzij e sukʼ chuwach ri Jehová xuqujeʼ nim kkil wi ri utaqanik? Ri uqʼatbʼal tzij ri Salomón, che xuchʼij 40 junabʼ, xukʼutu.

Chiʼ naqaj chi kʼo wi ri ukamikal, ri David xukoj ri ukʼojol ubʼiʼ Salomón che ukʼaxel. Pa jun qʼij, ri Dios xukʼut ribʼ pa jun rachikʼ ri Salomón xubʼij che kuya ri kraj. Ri Salomón xutaʼ nojibʼal xuqujeʼ etaʼmabʼal rech kkunik kuqʼat tzij pa kiwiʼ ri winaq rukʼ sukʼilal. Ri Jehová utz xrilo ri xutaʼ rumal laʼ xuya che. Xuqujeʼ, xubʼij we knimanik, kuya qʼinomal che, kbʼan nim che xuqujeʼ naj kkʼaseʼik.

Ri Salomón sibʼalaj xchʼobʼ uwach rumal ri unojibʼal. Pa jun qʼij, xeʼopan kebʼ ixoqibʼ rukʼ rumal che tajin kechʼojin puwiʼ jun neʼ rumal che e kebʼ kkibʼij che kal. ¿Jas xubʼan ri Salomón? ¡Xubʼij che kqʼat ri neʼ pa kebʼ! Ri nabʼe ixoq xubʼij che utz, ri ukabʼ chanim xubʼij che kyaʼ che ri nabʼe ixoq. Rukʼ waʼ ri Salomón xuchʼobʼo che ri ukabʼ ixoq are ri qas unan ri neʼ. Chiʼ ri winaq re ri tinamit xkitaʼ waʼ, xkichʼobʼo che rumal ri Dios kʼo unojibʼal ri Salomón.

Jun chike ri nim ubʼanik che xubʼan ri ajawinel are uyakik ri nimalaj rachoch ri Jehová pa Jerusalén, chilaʼ kbʼan wi ri qas qʼijilanik pa Israel. Chiʼ xtzʼaqat uyakik ri ja, ri Salomón xubʼan jun uchʼawem che ri Jehová xubʼij che: «Ri kaj rukʼ ronojel ri unimalil man kakuʼin taj che uqʼiʼik, ¡e ta kʼu lo ri achoch la riʼ ri nuyakom che la!» (1 Reyes 8:27).

Ri Salomón qas xchʼobʼ uwach che xtzijox chirij pa taq tinamit che naj e kʼo wi jun chike are ri Seba (o Saba), pa Arabia. Jun ixoq nim ubʼanik rech ri tinamit riʼ xpe pa Israel rech qas xrilaʼ ri uqʼinomal, ri nim ubʼanik ri Salomón xuqujeʼ we qastzij kʼo retaʼmabʼal. Rumal che xrilo che sibʼalaj nim ubʼanik rukʼ waʼ xuya uqʼij ri Jehová che xuchaʼ jun ajawinel che kʼo unojibʼal. Rumal che ri Dios xutewchij ri uqʼatbʼal tzij ri Salomón are más nim ubʼanik xuqujeʼ ri israelitas xkiriq jororibʼal pa kikʼaslelmal.

Sibʼalaj bʼisobʼal, ri Salomón xuya taj che ri nimalaj unojibʼal ri Jehová xukʼam ubʼe pa ronojel ri ukʼaslemal. Jun kʼutbʼal, ri Dios ubʼim che ri ajawinelabʼ utz taj che kkʼojiʼ kʼi kixoqil, ri Salomón xkʼuliʼ kukʼ kʼi ixoqibʼ xuqujeʼ, ri más xnimarisan ri umak, kʼi chike ri ixoqibʼ riʼ kkiqʼijilaj ri dioses che e qastzij taj. Ri xubʼan che, are che nojimal, xuya kan ri Jehová xuqujeʼ xkikoj ukʼuʼx che uqʼijilaxik tyox. Rumal laʼ, ri Dios xubʼij che xaq xiw ta chi ri ufamilia keʼajawinik. Ri rumal che kesax ta ronojel ri ajawbʼal che are rumal ri xutzujuj ri Dios che ri David. Rumal laʼ, pa neʼ ri Salomón xniman taj, ri Jehová sukʼ rukʼ ri pacto xubʼan rukʼ ri David.

(Esam chupam ri capítulo 1 kopan 11 rech 1 Reyes, ri capítulo 1 kopan 9 rech 2 Crónicas xuqujeʼ Deuteronomio 17:17.)