КЫӴЕ улон луысал, вань калык но солэн эксэез Иеговалэсь Кузёлэсь кадь кылзӥськысалзы но Инмарлэсь катъёссэ быдэсъясалзы ке? Та юанлы валэктон сётӥз Соломон эксэйлэн 40 ар ӵоже кивалтэмез.

Кулон азяз Давид аслэсьтыз Соломон пизэ ачиз бере эксэе пуктӥз. Инмар Соломонлы уйвӧтаз адӟиськиз но юаз, мае солэн куремез потэ. Эксэй визьлык но тодон-валан куриз, калыкез шонерлыко но визьмо судъян понна. Иеговалы кельшиз солэн куронэз, но со солы визьлыко, визьнодо сюлэм сётӥз. Озьы ик Иегова Соломонлы ваньбур, данлык но кема улон кузьманы кыл сётӥз, со Инмарлэсь курон-косонъёссэ быдэсъяз ке.

Соломон аслаз визьлыкеныз тодмо луиз. Одӥг пол эксэй доры кык кышномуртъёс лыктӥзы но али вордскем пи понна ченгешыны кутскизы. Кыксы но асьсэды пилэн анаез шуыса верало вал. Соломон косӥз улэп нуныез шори ӵогыны но одӥг люкетсэ огезлы сётыны, мукетсэ — мукетызлы. Одӥгез кышномурт соглаш луиз, нош мукетыз, пизэ жаляменыз, сюлворыса куриз сое вожмаськись кышномуртлы сётыны. Соку эксэй валаз, кудӥз зэмос анай луэ, но солы пизэ сётӥз. Ӝоген быдэс израиль калык Соломонлэн судъямез сярысь кылӥз но валаз, солы Инмар визьлык сётӥз шуыса.

Соломонлэн одӥгез тужгес но бадӟым ужез — Иерусалимын Иеговалы храм пуктон. Со вал быдӟым юрт, кудӥз Израильын Инмарлы йыбырттонлэн шорсюлмыз луиз. Храмез сӥё-дано усьтонын Соломон Иеговалы вӧсяськыса вераз: «Ин но, инъёслэн инзы но Тонэ тэрытыны уг быгато, уката ик таиз, Тынад нимыдлы сӥзьыса пуктэм храме» (3 Эксэйлыкъёслэн 8:27).

Соломонлэн данлыкез сярысь трос шаеръёсын кылӥзы, кыдёкысь Аравиысь Саваын но. Саваысь эксэй кышно Иерусалиме мыныны потӥз, Соломонлэсь данлыксэ но узырлыксэ адӟыны но мадиськонъёс пыр сое эскерыны-чакланы. Соломонлэн визьлыкез но Израильлэн азинскемез эксэй кышнолы туж кельшизы но, со данъяз Иеговаез, кудӥз сыӵе визьмо муртэ эксэе пуктӥз. Иегова Соломонлэсь кивалтэмзэ бакель кариз, соин ик, со кивалтыку кадь, вашкала Израильын ноку но сыӵе тупаса но азинлыко улон ӧй вал.

Жаляса верано, Соломон Иеговалэсь визьлыксэ дунъямысь дугдӥз. Инмарлэн курон-косонэзлэсь кылзӥськытэк, со туж трос кышно басьтӥз, тросэз соос пӧлысь мурт кунъёсысь инмаръёслы йыбыртъязы. Пумен кышноосыз Соломонлэсь сюлэмзэ сӧризы, со Иеговалэсь палэнтӥськиз но сульдэръёслы йыбыртъяны кутскиз. Иегова Соломонлы вераз, солэсь эксэйлыксэ басьтоз, нош Давидлы луыса, кӧня ке люкетсэ семьяезлы кельтоз шуыса. Соломон зэмос Инмарлэсь палэнтӥськиз ке но, Иегова Давидэн кутэм Эксэйлык сярысь тупанкылзэ быдэстэмысь ӧз дугды.

Пыкиськемын: 3 Эксэйлыкъёслэн, 1—11-тӥ люкетъёс; 2 Паралипоменон, 1—9-тӥ люкетъёс; Кыкетӥ Закон 17:17.