MAVỌ yen akpeyeren cha dia siẹrẹ ihwo re dia ẹgborho ọvo vẹ osun rayen da reyọ Jihova vwo ru Osun je yan nene irhi Rọyen? A mrẹ ẹkpahọnphiyọ rẹ onọ nana vwẹ ẹgbukpe 40 rẹ Solomọn vwo sun.

Devid ki rhi ghwu, ọ vwẹ ọmọ rọyen, Solomọn vwo mu ovie rọ vwọ reyọ ẹdia rọyen. Vwevunrẹ evwerhẹn, Ọghẹnẹ da vuẹ Solomọn nẹ ọ nọ obo rọ guọnọre. Solomọn nokpẹn rẹ aghwanre vẹ erianriẹn ro se vwo guẹdjọ rẹ ihwo na vwẹ idjerhe abavo. Oma vwerhen Jihova, ọ da vwẹ aghwanre vẹ ẹruọ vwọ kẹ. Jihova ji ve nẹ ọ cha vwẹ efe, urinrin kugbe otọvwen vwọ kẹ siẹrẹ ọ da kerhọ rọyen.

Usi rẹ Solomọn da rhe ro asan eje fikirẹ orhiẹn-ebro aghwanre rọyen. Vwẹ ẹdia ọvo, eya ivẹ ki sivwin ọmọshare re vwiẹ nu obọ. Solomọn da tanẹ a ghare ọmọ na ibro ivẹ rere a vwẹ ubro ọvuọvo vwọ kẹ eya na. Aye ẹsosuọ da rhọnvwe, ẹkẹvuọvo aye ro vwiẹ ọmọ na da rẹ nẹ a vwẹ ọmọ na kẹ aye ochekọ na. Solomọn kọ rhe mrẹvughe nẹ aye ro vwo arodọnvwẹ kpahen ọmọ na yen oni rọyen, o de muo kẹ. Ihwo rẹ Izrẹl ejobi de nyo orhiẹn rẹ Solomọn bruru na, kẹ ayen rhe riẹn nẹ aghwanre rẹ Ọghẹnẹ rhere.

Ọvo usun rẹ iruo ri Solomọn rọ ma rho, ọyehẹ uwevwin ri Jihova rọ bọnre vwẹ Jerusalẹm rẹ ihwo rẹ Izrẹl da cha ga Ọghẹnẹ. Ọke ra vwọ reyọ uwevwin na vwọ kpahotọ, Solomọn da nẹrhovwo nẹ: “Nighere, odjuvwu kugbe odjuvwu ro me kpenu na sa gba wẹ-ẹ; komavọ uwevwi ọhahavwe nana re me bọnre na!”—1 Ivie 8:27.

Usi rẹ Solomọn da ro irere efa, tobọ re te Sheba rẹ Arebia. Ovie rẹ aye ri Sheba da ra mrẹ ọrho vẹ efe ri Solomọn, kugbe obo rọ ghwanre te. Aghwanre ri Solomọn vẹ oborẹ akpọ yovwẹn ihwo rẹ Izrẹl te gberunu, te ẹdia ro de jiri Jihova rọ vwọ vwẹ ovie ro vwo aghwanre tiọyena vwo mu. Vwọrẹ uyota, fikirẹ ebruphiyọ ri Jihova, usuon ri Solomọn kọyen me yovwin kparobọ, ọ je vọn vẹ ufuoma vwẹ ikuegbe rẹ ihwo rẹ Izrẹl ọke awanre.

Ọ da ohwo mamọ nẹ, ọke ọvo rhi vwo te, Solomọn rhe ru nene aghwanre ri Jihova-a. O chukoku urhi rẹ Ọghẹnẹ, kọ rhe rọvwọn eya buebun, evo rayen egọẹdjọ. Eya rọyen da rhe riẹriẹ udu rọyen vwo nẹ ẹga ri Jihova, edjọ kọyen ọ ga. Jihova da vuẹ Solomọn nẹ a cha ghare uvie rọyen na. Ẹbẹre ọvo kọyen che te orua rọyen fikirẹ uve rẹ Ọghẹnẹ ve kẹ ọsẹ rọyen, Devid. Dede nẹ Solomọn dobọ rẹ ẹga ri Jihova ji, Jihova je fuevun kpahen ọphọ rẹ Uvie rọ vẹ Devid rere.

​—E muro kpahen 1 Ivie uyovwin 1 re te 11; 2 Ikun Ivie uyovwin 1 re te 9; Urhi Rivẹ 17:17.