XIMODO nibani binni pa guidubi naca ti guidxi ne binni ni cayuni mandar luni nuzuubacaʼ stiidxaʼ Jiobá ne ñuni respetarcaʼ ley stibe yaʼ. Modo biʼniʼ mandar Salomón cuarenta iza bisihuinni ximodo nibani binni pa ñúnicaʼ zacá.

Ante gati David, gudíxhebe chuʼ Salomón xiiñibe lugar stibe casi rey. Lu ti bacaandaʼ gudxi Dios Salomón zudiibe laa intiica ni gacalaʼdxiʼ. Xi gunabaʼ Salomón laabe yaʼ. Salomón gunabaʼ gudiibe laa guendabiaaniʼ ne guendariene ti ganda guni juzgar jneza. Nabé guyuulaʼdxiʼ Jiobá ni gunábabe laa que, ngue runi bidii cani laabe. Ne laaca gudxi Jiobá laabe zudii laabe bidxichi pa guzuubabe stiidxaʼ, zusisaca stale binni laabe ne zabánibe xadxí.

Pur guendabiaaniʼ ni gupa Salomón que nabé binibiáʼ binni laa. Ti biaje guyé chupa gunaa ra nuube purtiʼ guirópacaʼ guniʼcaʼ xiiñicaʼ ti baʼduhuiiniʼ. Xi biʼniʼ Salomón óraque yaʼ. ¡Gunábabe gúnicabe baʼduhuiiniʼ que chupa ndaa! Primé gunaa que na zaa gúnicabe ni, peru stobi que na zaa guicaabe baʼduhuiiniʼ que. Zaqué bidii Salomón cuenta guiropa gunaa que nga xiiñiʼ baʼduhuiiniʼ que. Ora gunna guidxi que xi guca la? bidiicabe cuenta Dios ngue cudii guendabiaaniʼ Salomón.

Tobi de ca dxiiñaʼ naroʼbaʼ biʼniʼ rey riʼ nga bicuibe yuʼduʼ stiʼ Jiobá ndaaniʼ guidxi Jerusalén ne raqué si nga naquiiñeʼ guni adorar ca israelita que Jiobá. Dxi biluxe yuʼduʼ que guniʼné Salomón Jiobá lu ti oración ne gúdxibe laa: «¡Biiyaʼ! Pa nin guibáʼ ca, neca naroʼbaʼ ni, qué rudiini para lii, ¡laxa yoo ni bicuéʼ riʼ!» (1 Reyes 8:27).

Nabé binibiáʼ binni Salomón, dede ndaaniʼ ca guidxi ni nuu jma zitu gúnnacabe de laabe, casi guidxi Seba (o Saba) ni nuu Arabia. Reina stiʼ guidxi Seba que guyé Israel para guʼyaʼ pabiáʼ rusisácacabe laabe, pabiáʼ nápabe bidxichi ne guʼyaʼ pa dxandíʼ nuu xpiaanibe. Nabé bidxagayaa reina riʼ pur guiráʼ ni biiyaʼ que dede bisisaca Jiobá purtiʼ gulí ti rey nabé nuu xpiaaniʼ. De lade guiráʼ ca rey ni biʼniʼ mandar guidxi Israel, ca dxi si biʼniʼ mandar Salomón nga qué ñapa ca israelita que guendanagana ne gúpacaʼ stale cosa purtiʼ guluu Jiobá ndaayaʼ laabe.

Nabé triste ni bizaaca despué, purtiʼ Salomón maʼ qué nudii lugar ñacané guendabiaaniʼ ni bidii Jiobá laa. Dios maca gudixhe cadi naquiiñeʼ gapa ca rey que stale xheelacaʼ, peru laabe bichaganabe gayuaa gunaa ne ni jma feu nga purtiʼ stale de laacaʼ biʼniʼ adorarcaʼ dios ni cadi dxandíʼ. Ca gunaa que chaahuidugá bixhélecaʼ laabe de Jiobá ne bicaacaʼ laabe guni adorarbe bidóʼ. Ngue runi gudxi Dios laabe maʼ qué zuni mandar binnilídxibe lu guidubi naca reinu que. Ne ziaananebe sti ndaa si pur pactu ni biʼniné David. Neca bisaana Salomón de ñuni ni na Dios, peru Jiobá qué nusiaandaʼ pactu ni biʼniné David.

(Zeedani lu capítulo 1 dede 11 stiʼ 1 Reyes, capítulo 1 dede 9 stiʼ 2 Crónicas ne Deuteronomio 17:17.)