DONGO 11
Myenge mi wu na Loba mena mi malo̱kē̱ na jókwe̱le̱
David na bato bape̱pe̱ ba malule̱ myenge ońol’a jowē̱. Kalat’a Myenge e kombe̱ 150 ma mi myenge
KALATI ni kolo buka ye̱se̱ o Bibe̱l ńe nde nduta po̱ ńa myenge ma bosangi. Mo̱ ńe̱se̱ e tilabe̱ o pambo a póndá ńa lambo ka 1 000 a mbu. Kalat’a Myenge e be̱n byala ba njiba be buki be̱se̱ ońol’a dube̱ bena be si tilabe̱ o longe̱. Besengedi jita ba mot’a benama be maso̱be̱ oten: muńe̱nge̱, esese, masoma, yuka, jombwē̱ na jate̱le̱. E me̱ne̱ne̱ na bwē ná balo̱ngedi ba ta ba be̱ne̱ mulatako ma bo̱ibo̱i na Loba. Jombweye tema iwo̱ ya mi myenge.
Yehova e nde Mwanedi Ńāsam nu te̱m na sim, ńangame̱n edube na esese. Di malanga o Myenge 83:19 ná: “Wame̱ne̱ mō̱ nu be̱n dina ná Yehova nde we Ńāsam omo̱ń a wase ńe̱se̱!” Myenge jita mi masesa Yehova ońol’a ebol’ao ya weka mambo, ka mo̱ń ni londi na ngengeti, mambo ma betańsedi me longe̱ o wase, na ma ma mubisanē̱ ma ńol’a moto. (Myenge 8, 19, 139, 148) Mipe̱pe̱ mi mapandise̱ Yehova ka Loba la bebolo ba ngum di masunge̱ na tata pe̱ ba be mo̱ jemea. (Myenge 18, 97, 138) Minē̱ pe̱ mi mabwe̱le̱ mo̱ ka Loba la te̱me̱ la sim di mawanē̱ wumse̱ ońol’a bańo̱so̱be̱, beko̱kisedi pe̱ ońol’a ba bobe.—Myenge 11, 68, 146.
Yehova a mawanea ba bato̱ndi mo̱ jóngwane̱ na belo̱ko̱medi. Yen ebe mwenge mu londe̱ 23, nde mu bian buka me̱se̱, David a makwalea ońol’a Yehova oten ka Mutate̱ byembe ńa ndolo, nu madie̱lē̱, nu matatē̱ na nu mombweye̱ pe̱ mido̱ngi mao. Myenge 65:3 mu mabola bato ba mowē̱ Loba ná bō̱nge̱le̱ ná Yehova e nde “Musenge̱ muka.” Bato jita bena ba boli bobe bonde̱ne̱ ba makusa belo̱ko̱medi o Myenge 39 na 51, wuma David a bolane̱no̱ byala be matape̱ mulema o kwalea ońol’a jate̱le̱ lao o bobe bonde̱ne̱ na pase̱le̱ pe̱ dube̱ a be̱nedino̱ Yehova nu malakisē̱. Myenge 55:23 mu mome̱le̱ biso̱ ná di lakisane̱ Yehova, di wise̱ pe̱ myūna masu omo̱ń Ao.
Yehova a me̱nde̱ tukwa wase tongwea na Janea la Mesia. Bepasi jita ba kalat’a Myenge be malondea nde Mesia Kiṅe̱ ni se̱le̱ bīsabe̱. Myenge 2 mwe nde edinge̱ e malangwē̱ ná nu Mudiedi a me̱nde̱ bumbise̱ matumba ma bobe ma mate̱nge̱ne̱ mo̱. Myenge 72 mu mabīse̱ ná ni Kiṅe̱ e me̱nde̱ bo̱le̱ njai, si te̱me̱ la sim na mabandan. Bupisane̱ Myenge 46:10 Loba a me̱nde̱ bo̱le̱ bila nde a ńo̱so̱ pe̱ belongisan ba bila be̱se̱ tongwea na Janea la Mesia. O Myenge 37, di malanga ná, ńa bobe a si me̱nde̱ pe̱ be̱ nde bate̱m na sim ba me̱nde̱ ja o wase o bwindea, ba bwane̱ musango na jaso̱ṅtane̱le̱ muńe̱nge̱.
—Nika e se̱medi o kalat’a Myenge.
