TAKTABT akk meqqren deg Wedlis Iqedsen ţ-ţaktabt iwumi qqaren Ihellilen.Taktabt-a tjemmel-ed ccnawi iqedsen, yeţwaketben di lmudda n 1 000 iseggasen. Di ccnawi-ya, llan kra n lehduṛ yeččuṛen d liman, lehduṛ lqayen yerna yeţḥazen ul n wemdan. Werǧin llin lehduṛ am wigi ɣef lqaεa! Di ccnawi-yagi llan daɣen waṭas n leḥsas yemxalafen. Di yiwet n tama, neţţaf lfeṛḥ, ţţewḥid (atεeǧǧeb) akk-d westeεṛef. Di tama nniḍen, neţţaf leḥzen, nndama akk-d ţţuba. Akken i d-iban lḥal, wid yuran ihellilen llan d wid iţeklen ɣef Ṛebbi yerna yesεan lεalaqat iǧehden yid-es. Atentan kra n leḥwayeǧ iɣef i d-iheddeṛ wedlis-agi n Ihellilen:

Yahwa d Agellid i geţţalasen leḥkem. Istahel leεbada d leḥmadi. Atan wayen yuran deg Uhellil 83:18: “Kečč, i geţţusemman Yahwa, telliḍ weḥd-ek d Win Σlayen ɣef lqaεa meṛṛa!” Llan waṭas n ihellilen i geţḥemmiden Yahwa, Win i d-ixelqen igenwan d yetran akk-d leḥwayeǧ yeεnan tudert ɣef lqaεa. Ger leḥwayeǧ-agi tella lǧeţţa n wemdan issedhacen. (Ihellilen 8, 19, 139, 148) Kra n ihellilen nniḍen ţţaken tamanegt i Yahwa axaṭer yeţsellik yerna yeţḥarab ɣef iqeddacen-is unṣiḥen. (Ihellilen 18, 97, 138) Ma d wiyaḍ, heddṛen-d ɣef lḥeqq-is. Ih, Yahwa yesnefsusuy taεkemt n wid iţwaqehren yerna yeţεaqab wid ixeddmen cceṛ.—Ihellilen 11, 68, 146.

Yahwa yeţεawan yerna yeţṣebbir wid i t-iḥemmlen. Izmer lḥal d ahellil wis 23 i geţwassnen akk ger ihellilen. Deg uhellil-agi, Dawed imettel Yahwa ɣer Umeksa yeččuṛen d leḥmala i geţwellihen, i geţḥaraben yerna i gesburruyen leḥnana i wakraren-is. Ahellil 65:2 ismektay-ed i iqeddacen n Yahwa belli yella d Win i d-isellen i tẓallit. Xilla n lεibad i gxedmen ccmata ţţafen athedden n wul deg Ihellilen 39 akk-d 51. Deg Ihellilen-agi, Dawed ihdeṛ-ed s wul yeṣfan ɣef nndama-s yeεnan lɣelṭat yexdem akk-d liman yesεa di ssmaḥ n Ṛebbi. Ahellil 55:22 inehhu-yaɣ a neţkel ɣef Yahwa yerna a s-nḍegger ayen akk iẓẓaẓayen tudert-nneɣ.

Yahwa ad ibeddel ddunit s Tgelda n Lmasiḥ. Iban-ed akken ilaq belli aṭas n yefyar n Ihellilen i geεnan Lmasiḥ, Agellid yewεed Ṛebbi. Ahellil wis 2 icar-ed belli aneḥkam-agi ad yemḥu leǧnas i t-iţxaṣamen. Ahellil wis 72 isbeggen-ed belli ad yekkes laẓ, lbaṭel d leqher. Σlaḥsab n Uhellil 46:9, s Tgelda n Lmasiḥ, Ṛebbi ad yeḥbes lgirrat yerna ad issenger ula d leslaḥ. Nezmer a nɣer deg Uhellil wis 37 belli imcumen ad ɣaben ma d iḥeqqiyen ad εicen i lebda ɣef lqaεa di lehna ţ-ţdukli ara yilin di ddunit meṛṛa.

—Ayagi yers ɣef wedlis n Ihellilen.