BIBLE chhûnga lehkhabu lian ber chu fakna hla thianghlimte lâwr khâwm a ni a. Chu mi lehkhabua hla awmte chu kum 1,000 vêl chhûnga ziak a ni hlawm a ni. Sâm lehkhabu-ah chuan rinna chungchâng ziak chhuah tawh azawnga thu rîl ber leh nung ber berte a chuang a. Hêng hlaahte hian hlimna te, fakna te, leh lâwmthu sawina te aṭanga lusûnna te, lungngaihna te, leh inlamlêtna te thlengin, mihringte rilru veizâwng chi hrang tam tak a chuang a ni. Fakna hla phuahtute hian Pathian nêna inlaichînna nghet tak leh ṭha tak an nei tih a chiang hle. Hêng hlaa a hla thu ṭhenkhatte hi lo ngaihtuah ta ila.

Jehova chu biak leh fak phu Lalchungnungber dik tak a ni. “Nangmah chauh hi JEHOVA hming pu, leilung zawng zawng chunga Chungnungber i nih an hriat theih nân,” tiin Sâm 83:18-ah chuan kan chhiar a. Fakna hla tam tak chuan Pathian Jehova chu a thil siam, arsi pêt unna vân boruak zau tak te, leia nunna nei thil mak tak takte, leh mihring taksa insiam dân mak danglam takte avângin a fak a ni. (Sâm 8, 19, 139, 148) Hla dangte chuan Pathian Jehova chu a chunga mi rinawmte vênghim tûra thil titu Pathian angin a chawimawi bawk. (Sâm 18, 97, 138) Tin, hla dangte chuan ani chu awp beha awmte chhan chhuaktu leh mi sualte hrem thîntu rorêltu dik Pathian angin a chawimawi cheu bawk a ni.—Sâm 11, 68, 146.

Jehova chuan amah hmangaihtute chu a ṭanpuiin a thlamuan ṭhîn. Fakna hlate zînga hriat hlawh ber chu, Davida’n Jehova chu a berâmte kaihruai a, vênghim a, enkawltu hmangaihna nei tak Berâm Vêngtu anga a sawina, fakna hla 23-na hi a nih ngei a rinawm. Sâm 65:2 chuan Pathian Jehova chu “ṭawngṭaina ngaithlatu” a nihzia amah betute a hriatnawntîr a ni. Thil sual nasa tak titu mi tam takte chuan, Davida’n thil sual pawi tak a tihna ata a inlamlêt thu leh Pathian ngaihdamna a rinzia tih tak zeta a sawina, Sâm 39 leh 51-na chu nasa takin an thlamuanpui a. Sâm 55:22-ah chuan Pathian Jehova rinchhan a, kan mi mal phurrit zawng zawngte a chunga nghat tûra fuihna a chuang a ni.

Pathian Jehova chuan Messia Lalram hmangin khawvêl a thlâkthleng ang. Sâm bu chhûnga thuziak tlar tam tak chu sawi lâwk Lal, Messia chungchâng sawina liau liau a ni a. Sâm 2-na chuan he Rorêltuin amah dotu hnam suaksualte a tihboral vek tûr thu a hrilh lâwk a ni. Sâm 72-na hian he Lalberin ṭâm te, rorêl dik lohna te, leh inhnehchhiahna te a titâwp dâwn tih a târ lang a. Sâm 46:9 sawi dân chuan Pathianin Messia Lalram hmangin indo a titâwp ang a, râlthuam zawng zawng a tiboral vek ang tih a sawi. Sâm 37-naah chuan mi suaksualte tihboral an ni ang a, mi felte erawh chu leiah hian chatuanin an chêng ang a, khawvêl pumah inlungrual takin remna an chên ang tih kan chhiar bawk.

—Sâm bu a ṭanchhan.