KʼE LIBRO Salmos ba e̱je̱ kja ne Biblia, gua e̱je̱ na punkju̷ capítulo ke kʼo ñaja libro, go dyopju̷ji na punkju̷ alabanzanu, o mezhe mil kje̷e̷ gua opju̷jikʼo. Kʼo bʼe̷zo kʼu̷ o opju̷ji kʼo salmo mi ejmeji kja o mu̷bʼu̷ Mizhokjimi, me mi sʼiyaji Mizhokjimi ngekʼua mi opju̷ji o alabanza. Me ma zo̷o̷ nrrexe kʼu̷ o opju̷ji, o opju̷ji jama zoʼo o mu̷bʼu̷ji, o opju̷ji jama zoʼo ma mi ma̷ji, jama zoʼo ma mi gueeji, ma pje kʼo ma zichʼi kja o mu̷bʼu̷. Ra nujiba pje jitsʼkʼoji kʼo salmo.

E Jeoba nge in Jmuji ajensʼe o dya̷trʼa̷ nrrexe, ngekʼua ra sʼiyaji ra kjaji kʼo mama angeze. Kʼe Salmo 83:18 mama: “Ni chju̱tsʼkʼe Jeoba, ixi ngextrjotsʼkʼe me na notsʼkʼe kja texe ne Xoñijomu̷”. Kʼo bʼe̷zo kʼo o opju̷ji kʼo salmo o unu̷ji alabanza e Jeoba, o opju̷ji ke e Jeoba o dya̷trʼa̷ kʼo bʼu̷bʼu̷ ajensʼe yo seje ñe o dya̷trʼa̷ yo añimale, yo nzha̷jna̷ kʼo bʼu̷bʼu̷ kja ne Xoñijomu̷ ñe na joo jagua dya̷trʼa̷ o kuerpo yo ntee (Salmos 8, 19, 139 ñe 148). Xo o bʼu̷bʼu̷ bʼe̷zo o alabao e Jeoba, mi manji Mizhokjimi pjosʼu̷ yo ntee yo kjaji kʼo nee angeze, dya jezi kja o dye̷e̷ kʼo ntee kʼo me u̷mbu̷ji (Salmos 18, 97 ñe 138). Xo go bʼu̷bʼu̷ kʼo o to̱njo̱ji trjo̱njo, mi manji e Mizhokjimi me na jonte angeze pjosʼu̷ yo ntee kʼo me supjre, kʼo kjaa kʼo na sʼoo ra zu̷bu̷ Mizhokjimi (Salmos 11, 68 ñe 146).

Yo ntee kʼo sʼiyaji e Jeoba ma supjreji, e Jeoba pjosʼu̷kʼo. Na punkju̷ ntee pa̱ra̱ji pje mama kʼe Salmo 23, e David o mamanu, e Jeoba ngeje nzakja na mbo̷ru̷ kʼu̷ me sʼiyazgoji, pjokʼu̷zu̷ji, sinzgoji kja na jñii kʼu̷ na joo. Kʼe Salmo 65:2 mama ma pje kʼo ri otu̷ e Jeoba angeze a̷tka̷goji. Ma e David o tsjaa kʼo na sʼoo mi pa̱ra̱ na joo ke e Mizhokjimi ro ponbu̷ kʼo bi tsjaa, ngekʼua o nzhogu̷ o mu̷bʼu̷ e Mizhokjimi. E David o opju̷ jama zoʼo kja o mu̷bʼu̷ kja kʼe Salmo nu capítulo 39 ñe nu capítulo 51. Nudya yo ntee kʼu̷ me sentio kja o mu̷bʼu̷ji nange o tsjaji kʼo na sʼoo, me na joo ga zoʼoji ma xoru̷ji kʼe Salmokʼu̷. Kʼe Salmo 55:22 jitsʼkʼoji ra ejmeji kja in mu̷bʼu̷ji e Jeoba, jitsʼkʼoji ke ma ra kjogu̷ji kʼo nrrumu̷ kʼo ix na se̷zhi chjenjui ke ri tunsʼu̷ na po̷jo̷ kʼo na jyu̷u̷, ra otu̷ji e Jeoba, angeze ra mboxkʼu̷goji.

E Jeoba ra ñeme kʼe Mesías ra manda kja o Reino, ra tsjaa ne Xoñijomu̷ me rga zo̷o̷. Kja ne Salmo o dyopju̷ji pje ra tsjaa kʼe Mesías. Kja Salmo nu capítulo 2 mama ke ra kjuatu̷ nrrexe yo gobierno ke dya neeji o Reino e Mizhokjimi. Kʼe Salmo 72 mama ke ma ra manda kʼe Rey dya kja ra bʼu̷bʼu̷ ntee yo ra kjogu̷ trjijmi, ra mbosʼu̷ yo ntee, dya kja ra bʼu̷bʼu̷ ntee kʼo ra tsjapu̷ji kʼo na sʼoo nu minteji. Kʼe Salmo 46:9 mama e Mizhokjimi ra ñeme kʼe Mesías, ra kjuatu̷ yo ntee kʼo kjaji chu̱ʼu̱ kʼo ñaja país, ra chjotu̷ yo zapju̷, texe yo trʼezi kʼo potrʼu̷nte. Kʼe Salmo 37 mama kʼe xoñijomu̷ kʼu̷ me rga zo̷o̷, kʼo na jonte ra nga̱ra̱jinu dya kja ra nrru̱u̱ji, ra bʼu̷bʼu̷ji na joo, dya kja ra bʼu̷bʼu̷ kʼo na sʼonte.

(Nu kʼo gua e̱je̱ba xo ri jyodʼu̷ kja kʼe libro Salmos.)