BUKU leyi ya Bibele, leyi nga ni tindzima to tala swinene, yi ni tinsimu to tala to hambana-hambana leti kwetsimaka. Swi teke malembe ya kwalomu ka 1 000 leswaku ku tsariwa buku leyi. Buku ya Tipisalema yi ni marito ya vutlhari ni lama tiyisaka ripfumelo lama tshameke ma tsariwa. Buku ya Tipisalema yi hlamusela tindlela to hambana-hambana leti vanhu va titwaka ha tona, ku nga ntsako, ku dzunisa ni ku nkhensa, gome, nhlomulo ni ku hundzuka. Swi le rivaleni leswaku vaqambhi va tipisalema a va tshemba Xikwembu naswona a va ri ni vuxaka lebyi tiyeke na xona. Xiya tinhloko-mhaka tin’wana ta tinsimu leti.

Yehovha i Hosi leyi Lawulaka, leyi faneriwaka hi ku gandzeriwa ni ku dzunisiwa. Buku ya Pisalema 83:18 yi ri: “Wena loyi vito ra wena u nga Yehovha, wena u ri wexe u La nge Henhla-henhla emisaveni hinkwayo.” Tipisalema to hlaya ti dzunisa Yehovha hikwalaho ka mintirho yakwe yo tumbuluxa, yo tanihi matilo lama nga ni tinyeleti, swivumbiwa leswi hlamarisaka leswi hanyaka emisaveni ni miri wa munhu lowu hlamarisaka. (Pisalema 8, 19, 139, 148) Van’wana va vangamisa Yehovha tanihi Xikwembu lexi ponisaka ni ku sirhelela lava tshembekaka eka xona. (Pisalema 18, 97, 138) Nakambe, van’wana va xi tlakusa tanihi Xikwembu xa vululami, lexi ntshunxaka lava tshikileriweke ni ku xupula lavo homboloka.—Pisalema 11, 68, 146.

Yehovha u pfuna ni ku chavelela lava n’wi rhandzaka. Swi nga ha endleka leswaku Pisalema ndzima 23 yi tiviwa hi vanhu vo tala hikuva eka yona Davhida u hlamusela Yehovha a ri Murisi loyi a nga ni rirhandzu, loyi a kongomisaka, a sirhelelaka ni ku khathalela tinyimpfu ta yena. Pisalema 65:2 yi tsundzuxa vagandzeri va Xikwembu leswaku Yehovha i “Mutwi wa xikhongelo.” Vanhu vo tala lava endleke xidyoho lexikulu va chaveleriwe swinene hi Pisalema ndzima 39 na ndzima 51, laha Davhida a hlamuselaka ndlela leyi a hundzukeke ha yona eka swidyoho swa yena leswikulu ni ndlela leyi a ri phofuleke ha yona ripfumelo rakwe hileswi Yehovha a n’wi rivaleleke. Pisalema 55:22 yi khutaza vanhu ku tshemba Yehovha ni ku lahlela mindzhwalo ya vona hinkwayo eka Yena.

Yehovha u ta hundzula misava hinkwayo hi ku tirhisa Mfumo wa Mesiya. Swiyenge swo tala eka Tipisalema swi vulavula hi Mesiya, loyi a nga Hosi leyi ku profetiweke ha yona. Pisalema ya vumbirhi yi profete leswaku Mufumi yoloye u ta lovisa matiko yo homboloka, lama n’wi kanetaka. Pisalema 72 yi vula leswaku Hosi yoleyo yi ta herisa ndlala, vuhomboloki ni ku tshikileriwa. Hi ku ya hi buku ya Pisalema 46:9, Xikwembu xi ta tirhisa Mfumo wa Mesiya leswaku xi herisa tinyimpi ni matlhari hinkwawo ya nyimpi. Eka Pisalema 37, hi hlaya leswaku lavo homboloka va ta lovisiwa, kasi vanhu lavo lulama va ta hanya emisaveni hilaha ku nga heriki, va tiphina hi ku rhula ni vun’we lebyi nga ta va kona emisaveni hinkwayo.

—Xi sekeriwe ebukwini ya Tipisalema.