BUGU khulwane Bivhilini yo vhumbwa nga nyimbo khethwa. Nyimbo khethwa dzo ṅwalwa miṅwahani i ṱoḓaho u vha 1000. Bugu ya Psalme i na mibulo ya lutendo ya ndeme na i ṱuṱuwedzaho ye ya vhuya ya ṅwaliwa. Psalme i amba nga ha maḓipfele manzhi a vhathu o fhambanaho, u bva kha maḓipfele a dakalo, thendo, na u livhuha u ya kha u pfa vhuṱungu, u ṱungufhala, na u ḓisola. Zwi tou vha khagala uri vhapsalme vho vha vha tshi fulufhela nahone vhe na vhushaka ha tsini-tsini na Mudzimu. Ṱhogomelani zwiṅwe zwiṱoho zwa dzenedzi nyimbo.

Yehova ndi Muvhusahoṱhe o teaho, o tewaho nga u gwadamelwa na u rendwa. Psalme ya 83:18 i ri: “Dzina ḽau ḽi pfi Yehova, Wa-Ṱaḓulu-ṱaḓulu. Mashangoni oṱhe ndi Iwe u woṱhe.” Psalme dzo vhalaho dzi renda Yehova nga mishumo yawe ya tsiko, i ngaho maṱaḓulu, zwithu zwi tshilaho zwi re kha ḽifhasi, na muvhili wa muthu u mangadzaho. (Psalme ya 8, 19, 139, 148) Vhaṅwe vho renda Yehova sa Mudzimu ane a dzhia vhukando u itela u tshidza na u tsireledza vhane vha mu fulufhela. (Psalme ya 18, 97, 138) Vhaṅwe vha mu hulisa sa Mudzimu wa khaṱulokwayo, ane a thusa vhathu vho tsikeledzeaho na ane a ṱarafa vhathu vhavhi.—Psalme ya 11, 68, 146.

Yehova u thusa na u khuthadza vhane vha mu funa. Khamusi psalme i re na bvumo ndi ya vhu-23, hune Davida a ṱalusa Yehova sa Mulisa wa lufuno, ane a livhisa, u tsireledza, na u ṱhogomela nngu dzawe. Psalme ya 65:2 i humbudza vhagwadameli vha Mudzimu uri Yehova ndi “Mupfi wa dzithabelo.” Vhathu vhanzhi vhe vha ita zwithu zwo khakheaho vho wana uri Psalme ya 39 na 51 i a vha khuthadza vhukuma, nga uri ndi hune Davida a amba zwi tshi bva mbiluni nga ha u ḓisola hawe nga vhukhakhi vhuhulwane he a vhu ita na u sumbedza hawe lutendo uri Yehova u ḓo mu hangwela. Psalme ya 55:22 i ri ṱuṱuwedza uri ri fulufhele Yehova na uri ri Mu kumedzele zwithu zwashu zwoṱhe zwine zwa ri lemela.

Yehova u ḓo shandula shango a tshi shumisa Muvhuso wa Vhumessia. Ndima dzo vhalaho dzi re kha Psalme dzi a ambela kha Messia, Khosi yo dzulaho yo ambiwa. Psalme ya 2 i porofita uri onoyu Muvhusi u ḓo fhelisa tshaka mmbi, dzine dza mu hanedza. Psalme ya 72 i dzumbulula uri yeneyi Khosi i ḓo fhelisa nḓala, tshiṱalula, na u tsikeledzea. U ya nga Psalme ya 46:9, a tshi shumisa Muvhuso wa Messia, Mudzimu u ḓo fhelisa nndwa na zwiṱhavhane zwa nndwa. Kha Psalme ya 37, ri vhala uri vhathu vhavhi vha ḓo fheliswa, hu uri vhathu vho lugaho vha ḓo tshila kha ḽifhasi nga hu sa fheli, vha tshi takalela mulalo na vhuthihi.

—Enea mafhungo a wanala kha bugu ya Dzipsalme.