AN PINAKAHILABA nga libro ha Biblia usa nga koleksyon han sagrado nga mga kanta, ngan ginhimo ito ha sulod hin mga 1,000 ka tuig. An libro han Salmo nagsusulod han pipira han pinakahilarom ngan makapabantad hinduro nga kapahayagan han pagtoo nga naisurat. Naghuhulagway ito han iba-iba nga pagbati han tawo sugad han kalipay, pagdayaw, pagpasalamat, kasubo, kabido, ngan pagbasol. Ipinapakita hito nga an mga salmista may-ada pagsarig ngan duok nga relasyon ha Dios. Tagda an pipira nga tema hini nga mga kanta.

Hi Jehova an may katungod ha pagin Soberano, takos han pagsingba ngan pagdayaw. “Ikaw la, nga an ngaran hi Jehova, amo an Gihitaasi ha bawbaw han tuna,” siring han Salmo 83:18. May pipira nga salmo nga nagdadayaw kan Jehova tungod han iya mga linarang sugad han mga bitoon ha langit, urusahon nga kinabuhi ha tuna, ngan pagkaurusahon han lawas han tawo. (Salmo 8, 19, 139, 148) Gindadayaw han iba nga salmo hi Jehova sugad nga Dios nga nagios ha pagluwas ngan pagpanalipod han mga maunungon ha iya. (Salmo 18, 97, 138) Dugang pa, gindadayaw liwat hiya han pipira nga salmo sugad nga an Dios han hustisya, nga nagdadara hin pagliaw ha mga gintalumpigos ngan nagsisirot ha mga magraot.​—Salmo 11, 68, 146.

Hi Jehova nabulig ngan nagliliaw ha mga nahigugma ha iya. Posible nga an pinakapopular nga salmo amo an kapitulo 23, diin iginhuhulagway ni David hi Jehova sugad nga mahigugmaon nga Magbarantay hin karnero nga naggigiya, nagpapanalipod, ngan nag-aataman han iya panon. An Salmo 65:2 nagpapahinumdom ha mga nagsisingba kan Jehova nga hiya an ‘Parapamati han pag-ampo.’ Damu han seryoso nga nakasala an naliaw gud ha Salmo 39 ngan 51, diin tangkod nga ginhulagway ni David an iya pagbasol ha seryoso nga mga sala ngan an iya pagtoo ha pagpasaylo ni Jehova. An Salmo 55:22 nag-aaghat ha aton nga tumapod kan Jehova ngan isarig ha Iya an tanan naton nga problema.

Babag-ohon ni Jehova an kahimtang ha kalibotan pinaagi han Ginhadian han Mesias. Damu han teksto ha Salmo an matin-aw nga nagtutudlok ha Mesias, an igintagna nga Hadi. An Salmo 2 nagtatagna nga bubungkagon hini nga Magmarando an magraot nga nasud nga nakontra ha iya. An Salmo 72 nagpapakita nga tatapuson hini nga Hadi an kagutom, kawaray hustisya, ngan panalumpigos. Sumala ha Salmo 46:9, wawad-on han Dios an girra ngan bubungkagon pa ngani an ngatanan nga hinganiban pinaagi han Ginhadian han Mesias. Ha Salmo 37 mababasa naton nga an magraot wawad-on, samtang an magtadong magkikinabuhi ha tuna ha waray kataposan, ngan magpapahimulos han kamurayawan ngan pagkaurosa ha bug-os nga kalibotan.

​—Iginbasar ha libro han Salmo.