¿WEM ba chaʼañonla cheʼ mi la chuc lac bʌ ti Jehová? Chaʼan mi lac ñaʼtan, yom mi la qʼuel jini ticʼojel tac am bʌ tiʼ Tʼan. ¿Am ba i cʼʌjñibal? ¿Muʼ ba i coltañonla chaʼan ñumen wen mi lac chumtʌl? Jini libro chaʼan Proverbios, jini rey Salomón tsiʼ tsʼijbu tiʼ chajp ti chajp bʌ ticʼojel muʼ bʌ i coltañonla. Laʼ laj qʼuel lamital.

Yom mi lac ñop Dios. Cheʼ an wem bʌ laj cʼuxbiya yicʼot Jehová, yom chaʼan mi lac ñop. Salomón tsiʼ yʌlʌ: «Ñopo lac Yum ti pejtelel a pusicʼal. Mach a bajñel ñaʼtan bajcheʼ jach a wom maʼ mel. Ti pejtelel chuqui maʼ mel ñaʼtan lac Yum. Cheʼ jini mux caj i chajpʌbeñet a bijlel» (Proverbios 3:5, 6). ¿Bajcheʼ mi lac pʌs chaʼan mi lac ñop Dios? Cheʼ miʼ lac chʼʌmben i ticʼojel yicʼot cheʼ mi lac jacʼben i mandar tac. Mi cheʼ mi lac mel bajcheʼ jini, mi caj la cʌqʼuen i sujmlel laj cuxtʌlel: mi lac tijicñesʌben i pusicʼal jini lac Tat am bʌ ti panchan yicʼot mi lac pʌs chaʼan jini Diablo juntiquilʌch xlot (Proverbios 27:11).

Lac chaʼañoʼ bʌ yicʼot la camigojob. Ti ili qʼuin wʌle, jini chumuloʼ bʌ ti jumpʼejl otot yom chaʼan mi cʌntesʌntelob ti Dios. Jini am bʌ i yijñam, Dios miʼ suben: «Yom tijicñayet a wicʼot a wijñam tsaʼ bʌ a pʌyʌ cheʼ chʼitoñet to», miʼ cʼajtesʌben jini winic chaʼan chʌn xucʼul mi yajñel yicʼot i yijñam (Proverbios 5:18-20). Jini xʼixic am bʌ i ñoxiʼal, yaʼ ti Proverbios capítulo 31 mi lac taj chuqui yom miʼ mel jini xʼixic chaʼan miʼ qʼuejlel ti ñuc yicʼot ti utsʼat tiʼ tojlel i ñoxiʼal yicʼot i yalobilob. Yicʼot jaʼel miʼ subentelob jini alobob chaʼan miʼ jacʼben i tʼan i tat i ñaʼ (Proverbios 6:20). Cheʼ jaʼel jini libro mi yʌl chucoh yom mi laj qʼuel ti ñuc laj cʼuxbiya yicʼot la camigojob, yicʼot miʼ subeñonla mi tsaʼ lac ñajtʼesa lac bʌ ti tojlelob yañoʼ bʌ mi caj lac cʌy lac piʼleñob ti xʌmbal (Proverbios 18: 1). Anquese an i cʼʌjñibal cheʼ an la camigojob, yom chaʼan mi lac yajcañob yicʼot mach yomic mi lac tempan lac bʌ yicʼot muʼ bʌ i ñajtʼesañoñob la ti Jehová (Proverbios 13:20; 17:17).

Ticʼojel chaʼañonla. Ti Proverbios an cabʌl ñuc tac bʌ ticʼojel chaʼan lac wenlel yicʼot miʼ coltañonla chaʼan mach lecojic lac pensar, yicʼot miʼ coltañonla chaʼan pʼisbil jach miʼ jajpel jini lembal, chaʼan wen chuqui mi lac ñaʼtan lac mel yicʼot chaʼan bʌxonla ti eʼtel (Proverbios 6:6; 14:30; 20:1). Yicʼot jaʼel miʼ subeñonla baqui bʌ wocol mi lac taj mi mach cheʼic mi lac mel bajcheʼ mi yʌl ti Biblia (Proverbios 14:12). Cheʼ jaʼel mi ticʼonla chaʼan mi laj cʌntan lac pusicʼal chaʼan maʼanic mi lac bibʼesan —bajcheʼ yilalonla—, «come bajcheʼ jach an lac pusicʼal cheʼʌch añonla [o yaʼan laj cuxtʌlel]» (Proverbios 4:23).

Ili ticʼojel tac an coltʌbilob i chaʼan bajcʼʌl winicob xʼixicob, wʌle yujilobix chaʼan maʼanic ñumen wem bʌ cheʼ mi lac jacʼbe i tʼan Jehová.

(Loqʼuem yaʼ ti libro chaʼan Proverbios.)