JÓSʼIN koasenkaoná tsa si̱tjosoán kjoatéxomale Jeobá. Kʼianga jchaa jebi, machjén nga chótʼajiaan jotso je Énle. A ñaki nda je kjoafaʼaitsjen xi nya. A basenkaoná nga ngisa nda biyoaa. Ya libro xi tsʼe Proverbios, je rey Salomón siento kjoafaʼaitsjen tsakʼétʼa xi nchjani tojmeni xi machjénná. Kataʼyala kʼaa.

Josʼin tiyoaa xi kao Niná. Kʼianga ndasʼin kuiyoaa xi kao Jeobá tjínnele nga jé si̱nʼiotʼaa yaoná. Je Salomón kitso: “Tinʼiotʼai Jeobá kao ngayeje ni̱ma̱li, kʼoa ali tokuijin ʼmini josʼin machoyali. Jé kuenta tʼiain tojmeni xi sʼiain, kʼoa jesoa sikixiya je ndiaali” (Proverbios 3:5, 6). Jósʼin koakoá nga je Niná ninʼiotʼaa. Kʼiaa nga kʼoaiʼndee nga jé katabándiaaná kʼoa nga si̱tjosoán kjoatéxomale. Tsa kʼoasʼiaan, kjoáyatsjoañá je ni̱ma̱le Nʼainá xi tíjna ngʼajmi kʼoa koakoñá nga ñaki to chjotandisoni je Na̱i (Proverbios 27:11).

Xi tjío yaniʼyaná kʼoa kao miyoná. Nichxin xi tiyoaa ndʼaibi, nga jngó jngó niʼya chjota nʼio machjénle je kjoafaʼaitsjen xi tsʼe Niná. Je xi xʼin i̱ ʼmile: “Titsjoayakoai je chjoón xi chixankoai saʼnda nga sʼa xti”. Én jebi kui xi tsonile nga je xi xʼin likui koa̱n kʼoanachale je chjoónle (Proverbios 5:18-20). Kʼoa je chjoón xi je chixan, jngo choa̱ sʼejnale ya kapítulo 31 xi tsʼe Proverbios tʼatsʼe jngo chjoón xi nʼio ndasʼín. Tsakui choa̱ jebi koaitjenngi jchaxkónní ya yaniʼyale. Kʼoa je xi xti kʼoaʼmile nga katasítjosonle je xijchále (Proverbios 6:20). Je libro xi tsʼe Proverbios kʼoati tso nga nʼio machjén nga sʼe̱ná miyo kʼoa nga likui ndatjín tsa to ñá chʼaa yaoná (Proverbios 18:1). Tonga tjín miyo xi koa̱nle sikitsónná kʼoa kuinga machjénsíni nga tojekjoan si̱miyoaa je chjota xi ndasʼín (Proverbios 13:20; 17:17).

Josʼin si̱kuindaa yaoná. Je libro xi tsʼe Proverbios nʼio tse kjoafaʼaitsjen tsjoá xi basenkaoná nga nda biyoaa kʼoa nga nda sʼe tokoán. Basenkaoná nga tsínkui tsjentʼalee xi chʼao síkaoná, jolani tsa xán. Saʼnda basenkaoná nga ngisa nda chjota nixá maa (Proverbios 6:6; 14:30; 20:1). Kʼoati tsoná nga nʼio chʼaosʼin kuichotsjoá tsakui koanngintjenngiaa kjoafaʼaitsjen xi kontra tíjnale kjoatéxomale Niná (Proverbios 14:12). Kʼoatso nga nda si̱kuindaa ni̱ma̱ná ánni nga tsínkui kjoaʼasʼenjinsíni xi chʼaotjín, “nga kui xi tjín jinni̱ma̱ná xi kuitsoni tsa so̱koná kjoabijnachon kʼoa tsa mai” (Proverbios 4:23).

Miyón mani chjota xi nda tjíobatio nga tjíofitjenngi je kjoafaʼaitsjen xi nya libro xi tsʼe Proverbios. Kʼoa chjota jebi tjíobení nga ngisa nda biyoaa kʼianga nitjosoán kjoatéxomale Jeobá.

(Yaa yʼangini libro xi tsʼe Proverbios.)