KII Salômô a ntjôô Yéhôva, Israél i kéba, inyu yônôs kii Yéhôva a bôg pot. Man wé nu munlôm nu a bi yoñ yééne ane yé le Rôbôam a bé mut a ñaglana. Inyu hala nyen, jôm li matén ma Israél ma nyagbene nye, ni bo ba bot ane i ñombok le Israél. Matén ima mon ma bi yégle ni kiñe i yoñ yééne David i Yérusalem, ba yila ane i ñwelmbok le Yuda.

Biane bini gwobiba bi kôhna ngandak mandutu téntén inyule bikiñe gwap bi ba ndog ni ngi hémle. Ane i ñombok le Israél i kôhna mandutu iloo ane i Yuda inyule bôdôl yaga i bibôdle bi ane, bikiñe gwé bi ba gwélél mob ma bitembee. Tolaki bapôdôl kiki Élia ni Élisa ba ba boñ bihélha bi mam, ba tuglag yak bawoga, Israél a kônde ndik boñ béba. Jon Djob a sôk bañ a nwas le bôt ba Asiria ba tjé ane i ñombok.

Yuda a kônde nom mbôgôl ñwii ni jam i mbus tjiba i Israél. Ndi yak Yuda a sôk kôhna kogse i Djôb. Ndik ndég bikiñe bi Yuda yon i emble mabéhna ma bapôdôl ba Djob, i noode ki témbna litén i pañ Yéhôva. Kiki héga, kiñe Yôsia a bôdôl héa mob ma bitembee ikété Yuda, a kahal ki tibil témpel i Yéhôva. Ngéda ba bi léba kaat Mbén Djob a ti Môsé, hala a tihba ñem Yôsia ngandak, a ti ki nye maként i kônde kena bôlô i pubus loñ ni bisu.

Ndi ngoo jam i ba le bikiñe bi bi tééba mbus Yôsia, bi nigle bé ndémbél yé. Ni Yéhôva a nwas le bôt ba Babilôn ba tét loñ Yuda, ba tjé ki Yérusalem ni témpel yé. Bôt ba bi pei tjiba ba bi ke minkôm i Babilôn. Djob a bôg kal le ba ga yén i minkôm 70 ma ñwii. Loñ Yuda i bi yén hôlô ngéda i yosôna, letee ngeñ i kola le litén li témb i tison yap le Yérusalem kiki Djob a bôn bo.

Kiñe yo kii yo i bé lama ha bé pémél i lihaa li David letee Mésia, Ntohol Djop a bi bôn, a lo. Ngandak bikiñe bi bi ane Yérusalem bi éba ni njel maboñog map mabe le bangitelepsép ba gwé bé kunde ane. Ndik Mésia nyen a kôli toi ane. Jon Yéhôva a kal kiñe i sôk pémél i lihaa li David le: “Héa hikôtô. . . . Mam m’a ba ndigi hala letee mut a yé kunde i pémés mbagi a’ lo, ndi m’a ti nye kunde i.”​—Ezékiel 21:31, 32.

​—Biniigana bini bi nyôñna i bikaat bi 1 Bikiñe; 2 Bikiñe; 2 Miñañ pes 10 i pam 36; Yérémia 25:8-11.