MURUSUN dan lárigiñe lagarabaagun Salomón lun Heowá aba lafareinragun Ísüraeli lidan biama arúeihani kei lariñaguni Heowá. Roboamü, le galagantebalin ridi, furundeti meha, aba lubéi desidírü hamá diisi türibu nórutena houngua hamá. Biama türibu ha úaraguabaña lun lálana larúeihan Dawidi Herusalén hagía lílanabaña arúeihani le súruna Hudá.

Ladüga maganbadi hamá ani lougua ligía hafiñen harúeitegu, úati ni aban lídangiñe arúeihani le agundaaruti lau darangilaü luma awanseruni luagu saragu dan. Arúeihani le nórutebei ligía wuribatimabei, ladüga hagía ínchahabaliña gürigia lidoun áhuduraguni mama inarüniti lúmagiñe furumiñeti dan. Óunahati Bungiu profetagu kéiburi Elíasi luma Eliséu, íbini saragüda hamá hilaaña, madügüntiña gasu hau. Lagumuhóun aba lígirun Bungiu lun hagañeiruni asiriana Ísüraeli.

Lóugiñe aban sígulu lárigiñe, súfuriti giñe arúeihani le súrubei Hudá abeichúni lúmagiñeti Bungiu. Rutiña lánigu Bungiu profeta eweridihani houn urúeigu, ani fiúrügüñanu gaganbaditiña ani houcha hagía lun hasansiruni gürigia housan. Kéiburi Hosíasi, desidírüti lagumuchun lau kultu houn guáriua ani aranseloun litenpulun Heowá. Lidan taransehóun, dariwati Lúrudu le labürühabei Moisesi. Lau lanarime ugundani, ábatima lawanseragüdüni Hosíasi luadigimari kóntüra áhuduraguni houn guáriua.

Híruti masigirun hamani ha arúeihabaña leweñegua Hosíasi lubuidun lani hénpulu. Ligía lígirunbei Heowá lun hábürühan babilóniana luagun Hudá ani günringua haméi Herusalén tuma litenpulun. Ha erederubaña wínwanñu, aba hanügǘn adaürǘwa Babilónia. Ariñagati Bungiu lásügürüba lan 70 irumu lubá hagiribudun hageiroun. Sun dan ligía lerederuba Hudá málouga.

Darime lachülürün Urúei le füramasewabei o Mesíasi, mañuurunbei ni aban ladügawagun Dawidi arúeiha. Hibe-agei urúeigu ha ladügawagun Dawidi arufuda hamuti lau hóuserun madügǘn hamá gürigia lun harúeihan. Mesíasirügüñein gabafu lun ladügüni. Ligía lariñagunbei Heowá luagu: “Lagumadirubei Ísüraeli lun sun dan, ani magumuchadibei larúeihan” (Lúkasi 1:33).

(Lídangiñeti 1 luma 2 Urúeigu, 2 Krónikasi kapítulu 10 darí 36 luma Heremíasi 25:8-11.)