SALOMÓN omano rire Israel oñembojaʼo ha oiko chugui mokõi tetã Jehová heʼi haguéicha. Hendaguépe ojupi Rehoboam ha oñepyrũ ojopyeterei umi héntendi, upévare umi 10 trívu norteygua ojei ipoguýgui. Umi mokõi trívu surpegua katu opyta David ñemoñare poguýpe.

Umi rréi oisãmbyhýva koʼã mokõi tetãme naiñeʼẽrendúi ha ndojeroviái Jehováre. Upévare ndohoporãi chupekuéra ha ndaikatúi oiko hikuái pyʼaguapýpe. Péro umi norteyguápe oho vaive, upe tetã oñepyrũre voi omombaʼeguasúma taʼangakuérape. Upévare Ñandejára omondo iproféta ohekomboʼe hag̃ua chupekuéra. Pór ehémplo Elías ha Eliseo ojapo heta milágro ha omanovaʼekuépe jepe omopuʼã jey vaʼekue. Ni upeichavérõ umi hénte nopenái hesekuéra ha upévare Ñandejára oheja umi Asiriaygua ojagarra Israel.

Ohasa rire 100 áño rupi, Ñandejára okastiga avei pe rréino Judayguápe. Heta proféta oñemoñeʼẽ umi mburuvichakuérape okambia hag̃ua, péro saʼi oĩ openáva hesekuéra ha oñehaʼãva oraha pe tetãme tape porã rehe. Umíva apytépe oĩ rréi Josías, haʼe oñehaʼã oipeʼapa pe taʼanga ñemombaʼeguasu ha omyatyrõuka Jehová témplo. Ojapouka aja upéva ojetopa Moisés léi kuatiañeʼẽ, Josías ovyʼaiterei ha koʼýte oñehaʼã oipeʼa upe tetãgui pe taʼanga ñemombaʼeguasu.

Umi rréi ojupíva Josías rendaguépe ndojapói Jehová oipotáva. Upévare Haʼe ohejámante umi Babiloniaygua ojagarra Judá ha ohundi Jerusalén ha itémplo. Hetápe ojegueraha tembiguairã Babilóniape ha Ñandejára heʼi haguéicha opyta hikuái upépe 70 áñore. Judá opyta itapere ou jey peve hikuái.

Upéi Jehová heʼi pe rréi ipahaiteguápe: ‘Eipeʼa pe koróna og̃uahẽ meve che aiporavovaʼekue, ha che amoĩmbáta opaite mbaʼe ipópe’ (Ezequiel 21:​26, 27). Upéicharõ og̃uahẽ meve pe Rréi térã Mesías oñeprometevaʼekue, noisãmbyhymoʼãvéima ni peteĩ David ñemoñare. Ha añetehápe umi rréi David familiare oisãmbyhyvaʼekue, ohechauka yvyporakuéra ndaikatuiha ogoverna porã. Pe Mesías añoite ikatupyry ñanesãmbyhy hag̃ua.

(Oñeguenohẽ 1 Reyes, 2 Reyes; 2 Crónicas kapítulo 10-36; ha Jeremías 25:​8-11-gui.)