PREĊIŻ bħalma kien bassar Ġeħova, Israel jinqasam wara li Salamun abbanduna l-​qima pura. Ibnu Reħobogħam, is-​suċċessur tiegħu, kien aħrax. L-​għaxar tribujiet taʼ Israel irreaġixxew għal dan billi rribellaw u fformaw is-​saltna taʼ Israel fit-​Tramuntana. Żewġ tribujiet baqgħu leali lejn is-​sultan fuq it-​tron taʼ David f’Ġerusalemm, u fformaw is-​saltna taʼ Ġuda fin-​Nofsinhar.

Iż-​żewġ saltniet kellhom storja mimlija inkwiet, primarjament tort tas-​slaten bla fidi u diżubbidjenti. Israel kellu iktar diffikultajiet minn Ġuda, għax mill-​bidu nett is-​slaten tiegħu inkuraġġew il-​qima falza. Minkejja l-​għemejjel setgħanin taʼ profeti bħal Elija u Eliżew—li t-​tnejn li huma rxoxtaw lill-​mejtin—Israel kien dejjem idur lura lejn it-​triq ħażina. Fl-​aħħar mill-​aħħar, Alla ħalla lill-​Assirja teqred lis-​saltna fit-​Tramuntana.

Ġuda dam ftit iktar minn seklu iżjed minn Israel, imma dan ukoll iffaċċja kastig minn Alla. Ftit kienu s-​slaten taʼ Ġuda li semgħu mit-​twissijiet tal-​profeti t’Alla u li pprovaw ireġġgħu l-​ġens lura lejn Ġeħova. Pereżempju, is-​Sultan Ġosija beda jnaddaf lil Ġuda mill-​qima falza u rrestawra t-​tempju taʼ Ġeħova. Meta nstabet kopja oriġinali tal-​Liġi t’Alla li kienet ngħatat lil Mosè, Ġosija tqanqal profondament, u għalhekk żied l-​isforzi tiegħu fil-​kampanja taʼ tibdil li kien qed imexxi.

Iżda, b’dispjaċir, is-​suċċessuri taʼ Ġosija ma segwewx l-​eżempju tajjeb taʼ dan is-​sultan. B’hekk, Ġeħova ħalla l-​ġens taʼ Babilonja jirbaħ lil Ġuda u jeqred lil Ġerusalemm u t-​tempju tagħha. Dawk li baqgħu ħajjin ittieħdu fl-​eżilju f’Babilonja. Alla bassar li l-​eżilju kellu jdum 70 sena. Ġuda baqgħet ħerba tul dak iż-​żmien kollu—sakemm, bħalma ġie mwiegħed, il-​ġens tħalla jerġaʼ lura lejn artu.

Madankollu, ħadd iktar mil-​linja taʼ David ma kellu jsaltan sakemm beda jaħkem il-​Ħellies imwiegħed, il-​Messija mbassar. Il-​biċċa l-​kbira mis-​slaten li kienu poġġew fuq it-​tron taʼ David f’Ġerusalemm urew b’dak li għamlu li l-​bnedmin imperfetti mhumiex kwalifikati biex jaħkmu. Il-​Messija biss kien se jkun tassew kwalifikat. Għalhekk, Ġeħova qal lill-​aħħar wieħed minn dawk is-​slaten taʼ dar David: “Inżaʼ l-​kuruna. . . . Ma tkun taʼ ħadd sakemm jiġi dak li għandu d-​dritt legali, u nagħtihielu.”—Eżekjel 21:26, 27.

—Ibbażat fuq l-​1 Slaten; t-​​2 Slaten; 2 Kronaki kapitli 10 sa 36; Ġeremija 25:8-​11.