JIIHÓVAH ánínę́ęgi átʼéego, Sálaman éí Jiihóvah bitsʼą́ąjįʼ dashdiiyáádóó bikʼijįʼ Ízrel dineʼé ałtsʼákai. Sálaman bikééʼ góneʼ naatʼáanii náánásdlı̨́ʼígíí biyeʼ Riihobówam, éí doo yitsʼííd da ńtʼééʼ. Éí biniinaa Ízrel dineʼé dah yikahígíí ałtsʼákai, áádóó náhookǫsjígo Ízrel binahatʼaʼ ádayiilaa. Naakigo éí Jerúsalemgi David binahatʼaʼ tʼáá yikééʼ naazı̨́. Díí éí shádiʼááhjígo Júdah binahatʼaʼ ádayiilaa.

Díí nahatʼaʼ ałtsʼákaiígíí yéigo bichʼįʼ nahwiisʼnááʼ. Háálá bibee daʼoodląʼ yę́ę ádin, dóó naatʼáanii danilínę́ę doo akʼeh da hóółʼįįdígíí biniinaa. Ízrel binahatʼaʼígíí yéigo bichʼįʼ nidahwiisʼnááʼ, Júdah binahatʼaʼígíí biláahdi. Háála Ízrel binaatʼáanii éí Jiihóvah doo yikʼeh hółʼı̨́ı̨́góó yee hodeezʼą́ągo hayííłtʼiʼ. Iiláíjah dóó Iiláísha éí ayóó ádaatʼéii ádaʼjiilaa. Éí tʼáá ájíłah łaʼ daaztsą́ą́dę́ę́ʼ náábizhdiiłáh, ákótʼéii ndi Ízrel doo yáʼáshǫ́ǫ́góó oodááł bichʼįʼ tʼą́ą́ʼ aníjiikááh. Áko God éí Asíriya yá yee hoołʼaʼgo náhookǫsjígo Ízrel binahatʼaʼígíí íísdįįd.

Júdah hooʼáałgo ląʼí nááhai, Ízrel biláahdi. Júdah ałdóʼ God há nihoníʼą́. Tʼáá díkwííhígo Júdah binaatʼáanii God yá dahalneʼii bikʼehgo ádajiidzaa áádóó hodineʼé Jiihóvah bichʼįʼ kónídajiidlaa. Júdah binaatʼáanii Josáíyah, éí Jiihóvah dílzinígi, dóó biiʼ sohodizin yę́ę hashtʼéiizhdoodlíiłgo bizhdeeshnish. Tsʼídá átséedi God bibee hazʼáanii bikʼínáʼneetą́ąʼgo Josáíyah bidiisnááʼ, áko hashtʼéii hojiidlaa.

Ákótʼée ndi, Josáíyah bikééʼdóó naatʼáanii náádaasdlı̨́ʼígíí yáʼátʼéehgo binááł ájíítʼįįdígíí tʼáadoo hakʼehgóó ádaadzaa da. Biniinaa Jiihóvah éí Bábilan binahatʼaʼ yaa hodiníʼą́, éí Jerúsalem hazʼą́ągi dóó kin biiʼ sohodizin yę́ę íísdįįd. Dajoodzííʼ yę́ę éí 70 nááhaijįʼ Bábilangóó dahoʼdisnááh, éí díí God tʼáá íídą́ą́ʼ ákwíí nídoohah níigo yee haadzííʼ. Áko Júdah kéyahgi doo bikááʼ kééhajóotʼı̨́ı̨́ʼ átʼéégóó hazʼą́ągo 70 nááhai. Áádóó bee haʼoodzííʼ yę́ęgi átʼéego Júdah dineʼé nátʼą́ą́ʼ hakéyahgóó hwééʼílniiʼ.

Áko éí David bitsʼą́ą́dóó naatʼáanii doo nááhodoodleeł da. Yisdáʼiiníiłii, Mesáíyah baa hóóneʼ yę́ę níyáago índa naatʼáanii náhodoodleeł. Jerúsalemdi ląʼígo naatʼáanii dajílı̨́ı̨́ ńtʼééʼ yę́ę binahjįʼ díí bééhoozin; éí bílaʼashdlaʼii dahojóoʼáałgi doo bídazhneelʼą́ą da. Mesáíyah tʼéiyá yíneelʼą́. Áko Jiihóvah éí akéedi David bitsʼą́ą́dóó naatʼáanii danilínę́ę kwííłní: “Naatʼá chʼah nahjįʼ kónílééh . . . bí dooleełii níyáajįʼ doo bitsáskʼeh hazʼą́ą da dooleeł, áko éí baa dideeshʼááł.”​—Ezekiel 21:26, 27.

​—Naaltsoos 1 Kings; 2 Kings; 2 Chronicles wóltaʼii 10dóó 36jįʼ; Jeremiah wóltaʼii 25:8dóó 11jįʼ biiʼ baa haneʼ.